James 5

Edo ((E Baibol Ẹdo) Version 1996)

← Chapter 4 Jump to:

1Banbanna nian, wa danmwehọ mwẹ, wa ni fee. Wa gha viẹ, wa gha viẹ eve orriara ye ẹmwẹ ọkhọ ne ọ ra do sunu vbe egbe uwa.

2Ẹfe ne uwa fe hia kẹkẹ ua nẹ, arriukpa vbe rri ukpọn uwa hia fo.

3Ọtọn gbe igho nọfua kevbe ne ọ baa ọghe uwa, ọtọn na ọre ọ ra sẹ osẹe gbe uwa, ọ ghi vbe rri uwa efun egbe zẹ vbe erhẹn. Wa silo ẹfe gboo nẹ vbe ẹdẹ okiekie na.

4Wa ma he ha osa ne iran ne uwa ya gbe ugbo. Wa gha họn vbe ne iran gui hẹ! Eve ne iran ni rhọ emwiokọ uwa ne uwa viẹ, sẹ ehọ Osanobua nẹ, Nọyaẹnmwa ne Oghodua.

5Ẹdẹ agbọn uwa vbe agbọn na keghi re ne ọ vuọn ne uyinmwẹ ọmọ ne ọ fuẹn ukhu kevbe uwa sẹ mwẹ obọ nẹ. Wa keghi ya egbe uwa khian ni kpọlọ khẹ ẹdẹ ne a gha gbe emwi.

6Wa bu ohiẹn uwu gbe ne ọ ma ru khọ, wa keghi vbe gbe ẹe rua sokpan, ọ ma vbe gu uwa sinmwi egbe.

7Rhunmwuda ọnii, wa ne etẹn mwẹ, wa ziengbe khẹ ẹghẹ ne Nọyaẹnmwa gha ya rre. Wa ma miẹn vbe ne ọwẹe ziengbe hẹ vbe ọ gha khẹ ne otọ ẹre mọ ọmọ esi ladian. Ọ ghi hẹko, ziengbe khẹ amẹ ne okaro kevbe ne okiekie ne ọ rhọ.

8Erriọ ọre ọ kere ne uwa vbe zin egbe. Wa gie ẹtin gha rre uwa iwu ẹsẹse rhunmwuda Ẹdẹ Nọyaẹnmwa bu otọ nẹ.

9Wa ghẹ gha gui ẹzọ egbe khian, etẹn mwẹ. Ne Osanobua ghẹ vbe bu ohiẹn uwa. Ne ọ bu ohiẹn sẹ emwa fo nẹ, ọ mu egbe nẹ ne ọ la owa.

10Etẹn mwẹ, wa ye avbe akhasẹ, ni ya eni Nọyaẹnmwa guan rre. Wa ye iran ru ne a ghe ru vbene a ziengbe oya hẹẹ.

11Te ima ghi tie iran emwa ni rre oghọghọ rhunmwuda, iran zin egbe. Wa họn ẹn vbene Job ziengbe hẹ, wa vbe rẹn vbene Nọyaẹnmwa ghi fiangbẹe hẹ vbe okiekie. Rhunmwuda, Nọyaẹnmwa vuọn ne itohan kevbe ẹnina.

12Ke odaro ehia, etẹn mwẹ, wa ghẹ gha vẹn ihẹn ya ru eyan. Wa ghẹ ya ẹrinmwi vẹn ihẹn ra agbọn, ra emwi ọvbehe ne ọ rhirhi gha khin. A deghẹ erriọ nọ, wẹ re “Erriọ nọ,” a deghẹ ẹ i re erriọ kha wẹ, “Ẹ i re erriọ.” Ne Osanobua ghẹ miẹn ehe na bu ohiẹn ruẹn.

13Orhiọnkpa rre uwu ọlọghọmwa vbe uwu uwa ra? Wẹ ne ọ na erhunmwu.

14Ne ọyẹnmwẹ sẹ rrọ ra? Wẹ ne ọ so ihuan urhomwẹ. Orhiọnkpa rrọọ ne egbe ma rran ra? Wẹ ne ọ tie eniwanrẹn iko ne iran na erhunmwu nẹẹn, iran ghi vbe ya eni Nọyaẹnmwa nọnọ ori ye ọre uhunmwu.

15Erhunmwu ne a ye iyayi na, gha miẹn ọmwa ne ọ khuọnmwi nii fan, Nọyaẹnmwa gha rhie egberranmwẹ nẹẹn, a ghi vbe ya orukhọ ne ọ te ru bọ ẹe.

16Rhunmwuda ọnii, wa gha miẹn orukhọ uwa kue ma egbe, wa ghi vbe gha na erhunmwu ne egbe. Ne egbe miẹn ehe na rran uwa. Erhunmwu ọmwa ẹmwata wa mwẹ ẹtin ne a ya winna iwinna ẹtin ẹsẹse.

17Egbe ọmwa vbene ima ye, ọre Elaija vbe gha khin. Ọ keghi na erhunmwu wẹ ne amẹ ghẹ rhọ, amẹ ma ghi gele rhọ vbe otọe nii vbe ukpo eha vbe ukhiọnmwẹ.

18Ọ keghi vbe dọlegbe na erhunmwu, iso keghi tue amẹ ladian, otọ keghi ma emwiokọ ne ọ mọẹn ladian.

19Etẹn mwẹ a deghẹ ọkpa vbe uwu uwa bibi odẹ hin ẹmwata rre, ighẹ ọmwa ọkpa ọvbehe na dọlegbe rhie ẹre rre,

20wa ye ọ na rre. Ọmwaikọmwa ne ọ dia ọmwa orukhọ uhunmwu hin odẹ dan ne ọ te ye ladian, rẹn gha miẹn orhiọn ọmwa orukhọ nii fan hin obọ uwu, ọ ghi vbe gie a ya orukhọ ọkhọngborrie bọ ọmwa.

← Chapter 4 Jump to: