Jeremiah 26

Edo ((E Baibol Ẹdo) Version 1996)

← Chapter 25 Jump to: Chapter 27 →

1E Jehoiakim ne ovbi e Josaia ghi wa da rriọba e Juda.

2E Nọyaẹnmwa keghi tama mwẹ wẹẹ, “Ya mudia ye ọgua nọkhua ọghe Ọgua Osa, ne u talọ ẹmwẹ hia ne I wẹ ne u ta ma emwa nii kevbe avbe ẹvbo ni ke Juda rre do ga vbe evba. Ghẹ sẹ ọkpa rae vbọ.

3Ughaghe avbe emwa nii gha danmwehọ, iran ghi mu uyinmwẹ dan iran fua. Iran gha ru vberriọ, I gha fi ekhọe mwẹ werriẹ vbe ọkhọ ne I ra wẹ ne ọ rruan iran rhunmwuda avbe emwi dan ne iran ru.”

4E Nọyaẹnmwa keghi tama mwẹ wẹ ne I tama avbe emwa nii wẹẹ, “Mẹ ne Nọyaẹnmwa ọ re ọ tama uwa wẹ ne u wa gha họn ẹmwẹ mẹ vbekpa ne uwa gha na gha ya emwi ne I ma uwa ẹre ru emwi.

5Kevbe ne uwa gha danmwehọ ẹmwẹ ne avbe eguọmwadia mwẹ ta, kevbe avbe akhasẹ ne I wa gha gie bu uwa rre. Wa ma he ya emwi ne iran tae ru emwi ẹdẹ.

6Wa gha wa yin ehọ khian vberriọ, vbene I ru e Siailo ọ re I ra vbe ru Ọgua Osa na avbe uhunmwu ẹvbo ni rre otọe agbọn na hia ghi gha ya eni ẹvbo na tie ihẹn.”

7Avbe ohẹn, avbe akhasẹ, kevbe avbe emwa ni hia họẹn vbe I ta ẹmwẹ na vbe Ọgua Osa.

8Ọwarọkpa vbe I ghi wa taa ẹmwẹ ne Nọyaẹnmwa tama mwẹ wẹ ne I ta fo nẹ iran ke gua mwẹ rhie, iran na gha go kha wẹẹ, “Te ọ kere ne a gbe uẹ ua ba ọnọna.

9Vbọzẹ ne u na ye eni e Nọyaẹnmwa tae wẹ Ọgua Osa na gha ye vbe Siailo, kevbe wẹ a gha fuẹn ẹvbo na an, ọmwa rhọkpa i ra vbe gha rrọọ?” Emwa na keghi ma rhu mwẹ.

10Ugbẹn vbe avbe ọkaolotu e Juda ghi họn emwi ne ọ sunu, iran keghi zẹgiẹgiẹ ke ẹguae ọba gha di Ọgua Osa, iran keghi mudia ye Onurho ọgbọn.

11Ọ re avbe ohẹn kevbe avbe akhasẹ na tama avbe ọkaolotu kevbe emwa nii wẹẹ, “Te ọ kere ne a bu ohiẹn uwu gbe ọmwa na rhunmwuda, ọ taa ẹmwẹ dan gie ẹvbo ima na. Wa tobọ uwa ye ehọ uwa họẹn.”

12Ẹre imẹ na kha wẹẹ, “E Nọyaẹnmwa ọ re ọ gie mwẹ wẹ ne I talọ avbe ẹmwẹ ne uwa họẹn vbe unu mwẹ vbekpa Ọgua Osa na kevbe ẹvbo na.

13Wa fi uyinmwẹ uwa werriẹ, kevbe emwi ne uwa ru, ne uwa gha họn ẹmwẹ ne Nọyaẹnmwa ne Osanobua uwa. Wa gha ru vberriọ rẹn gha vbe fi ekhọe werriẹ vbekpa ọkhọ ne ọ wẹ ọ gha rruan uwa.

14Zẹ vbe ọghe imẹ, I rre uwa obọ nẹ! Wa ru mwẹ emwi ne uwa tobọ uwa rẹn wẹ ọ kere, ọ vbe hẹnhẹn.

15Sokpan, wa gie ọna gha rre uwa ekhọe wẹ adeghẹ wa gbe mwẹ uan, wa gha rria abe, kevbe emwa ni rre ẹvbo na wẹ wa gbe ọmwa ne ọ ma rukhọ ua, rhunmwuda, e Nọyaẹnmwa ọ re ọ gie mwẹ ne I do ta ẹmwẹ na yotọ ma uwa.”

16Ẹre avbe ọkaolotu na tama avbe ohẹn kevbe akhasẹ wẹẹ, “Eni e Nọyaẹnmwa ne Osanobua mwa ọ re ọmwa na ya gu ima guaan, ọ ma kei na a gbe ẹe rua.”

17Vbe iyekọnii, eso vbe uwu avbe ediọn keghi kpaegbe, iran na gu avbe emwa ni si koko ye evba guan wẹẹ,

18“Ẹghẹ ne Hẹzekaia na gha re ọba e Juda, e Maika ne akhasẹ ne ovbi ẹvbo ne a tie ẹre Morẹsiẹt keghi tama emwa hia wẹ Nọyaẹnmwa ne Oghodua khare wẹẹ, “ ‘A gha gua vbe e Zaiọn zẹ vbe ugbo E Jerusalẹm gha khian ne itowa na degbe itowa oke ni ne Ọgua Osa ye gha khian ẹgbo.’

19E Hẹzekaia kevbe ivbi e Juda ma gbe Maika ua sokpan, e Hẹzekaia keghi gha mwẹ e Nọyaẹnmwa ọghọ, ọ na gha ho ne ọ miẹn aro nọ maa vbe obọ ẹre. E Nọyaẹnmwa keghi fi ekhọe werriẹ vbekpa ọkhọ ne ọ te wẹ ne ọ rruan iran. Ghe nian, ma ra ye obọ ima si ọkhọ rri egbe ima uhunmwu.”

20(Okpia okpa ọvbehe vbe gha rrọọ, Uraia ne ovbi e Siemaia vbe ẹvbo ne a tie ẹre kirriat Jerim ne ọ vbe ye eni e Nọyaẹnmwa guaan yan ẹvbo na ke uhunmwu ẹvbo zẹ vbene Jerimaia vbe ru.

21Ugbẹn vbe Jehoiakim kevbe avbe ekhaẹmwẹ ọnrẹn kevbe ivbiyokuo ẹre họọn ẹmwẹ ne Uraia tae, ọba keghi te gha ho ne ọ gbẹe rua, sokpan, Uraia keghi họn, ohan na mu ẹẹn, ọ na lẹ fi Igipt.

22Sokpan, e Jehoiakim ne ọba keghi giee Elnatan ne ovbi Akbọ kevbe ikpia ọvbehe eso gha rrie Igipt ne iran ya mu Uraia.

23Iran keghi mu ẹẹn werriegbe bu e Jehoiakim ne ọba gha dee, ọ na gbẹe rua, ọ na fi ikun ẹnrẹn fi itẹ emwa kẹkan.)

24Sokpan ne Ahikam ne ovbi e Siafan na gha rre esa ọghomwẹ, a ma mu mwẹ ne emwa nii ne iran gbe mwẹ uan.

← Chapter 25 Jump to: Chapter 27 →