Jeremiah 35

Edo ((E Baibol Ẹdo) Version 1996)

← Chapter 34 Jump to: Chapter 36 →

1Ẹghẹ ne Jehoiakim ne ovbi e Josaia ne gha re ọba e Juda, e Nọyaẹnmwa keghi tama mwẹ wẹẹ, “Bu ivbi ẹwae.

2Rekab gha khian ne u ya gu iran guan, iyekọnii, u ghi viọ iran gha die ughugha okpa vbe Ọgua Osa, u ghi sa ayọn ne iran.”

3Rhunmwuda ọnii, I keghi wa viọ ivbi ẹwae Rekab hia, avbe Jaazanaia (ovbi ọmwa ọvbehe okpa ne avbe tie ẹre Jerimaia ne ovbi e Hebazinaia) kevbe avbe etiọnrẹn nikpia kevbe avbe ivbi ẹre nikpia. I keghi viọ iran hia gha die Ọgua Osa.

4I keghi viọ iran gha die ughugha erhuanegbe akhasẹ ne a tie ẹre Hanan, ovbi Igdalaia, ughugha na keghi rre odukhunmwu ughugha ọghe Maaseia ne ovbi e Sialọm, ọkhaẹmwẹ kpataki vbe Ọgua Osa, ọ keghi vbe sikẹ ughugha avbe ekhaẹmwẹ nekpa.

5Ẹre I na viọ ukpu kevbe ọkpan ni vuọn ne ayọn yotọ ne ivbi e Rekab na, I na tama iran wẹẹ, “Wa da ayọn.”

6Sokpan, iran keghi wanniẹn wẹẹ, “Ma i da ayọn. Erha ima odede ighe Jonadab ne ovbi e Rekab tama ima wẹ ke ima kevbe ivbi uniẹn ima, ne ọ gha da ayọn rhọkpa i rrọọ.

7Ọ vbe tama ima wẹ ne ima ghẹ bọlọ owa ra ne a vbe mu ugbo ra ne a vbe mu ugbo azara, ra na a vbe dẹ. Ọ tama ima ne a gha di owa ukpọn ya ne ima miẹn ehe na gha rre ẹvbo ne ima ye na zẹ vbe erriọvbe.

8Te ima wa ru zẹ vbene Jonadab tama ima. Ma tobọ ima i da ayọn, avbe amwẹ ima i vbe da kevbe ivbi ima nikpia kevbe nikhuo.

9Ma i bọlọ owa ne ima gha ye, owa ne a ya ukpọn bọ ọ re ima dia, ma i mwẹ ugbo azara ra ugbo ra ọka. Te ima wa ru emwi hia fẹẹrẹ ne Jonadab ne erha ima odede tama ima.

11Sokpan ugbẹn vbe Nebukiadneza ghi mu okuo la ẹvbo na, ọ re ima na wẹ ne a gha die Jerusalẹm ne a miẹn ehe na lẹfe vbe obọ ivbiyokuo e Babilọn kevbe Siria. Ọnii ọ sii ẹe ne ima na rre Jerusalẹm.”

12Ẹre Nọyaẹnmwa ne Oghodua, ne Osanobua Izrẹl na tama mwẹ wẹ ne I gha khian ya tama ivbi e Juda kevbe Jerusalẹm wẹẹ, “Mẹ ne Nọyaẹnmwa, nọ uwa emwi ne ọ zẹe ne uwa na wẹ wa i họn ẹmwẹ mẹ zẹ vbene I ma uwa ẹre.

14Ivbi e Jonadab wa ru vbene ọ tama iran ne iran wẹ ghẹ da ayọn, ye do sẹ ẹdẹ nẹrẹ na, ne ọ da i rre uwu iran. Sokpan, vbe ne I yan gu uwa guaan sẹ, wa ma họn ẹmwẹ mẹ.

15I gie avbe eguọmwadia mwẹ i ghe avbe akhasẹ gie uwa, iran vbe tama uwa ne uwa mu emwi dan ne uwa ru fua ne uwa gha ru emwi ne ọ gbae, iran tama uwa ne uwa ghẹghi ga avbe ẹbọ ọvbehe, ne uwa miẹn ehe na gha yin otọe nii ne I mu ne uwa kevbe avbe erha uwa odede. Sokpan, wa ma danmwehọ mwẹ a ma wẹ te uwa ghi ra zẹ yọ mwẹ re.

16“Ivbi e Jonadab ru zẹ vbene erha iran odede tama iran, sokpan, wa na ma hẹnmwẹ mẹ.

17Rhunmwuda ọnii nian. Mẹ ne Nọyaẹnmwa ne Osanobua Izrẹl, gha gie ẹe gele rruan uwa ne ivbi e Juda kevbe ivbi e Jerusalẹm avbe ọkhọ ne I khare ighẹ ọ gha rruan uwa. I gha ru ẹe vberriọ rhunmwuda wa ma danmwehọ mwẹ vbe I gu uwa guan, wa ma khuẹnniẹn mwẹ vbe I tie uwa.”

18Ẹghẹ nii ọ re I na tama ivbi uniẹn e Rekab wẹ e Nọyaẹnmwa ne Oghodua ne Osanobua Izrẹl khare wẹẹ, “Wa gele ru vbene Jonadab ne erha uwa odede tama uwa, igiodẹ ne ọ ru ma uwa, ọ re uwa wa lele, wa keghi vbe ru avbe emwi hia ne ọ wẹ ne uwa ru.

19Rhunmwuda ọnii mẹ ne Nọyaẹnmwa ne Oghodua ne Osanobua Izrẹl vbe yan nẹ wẹ a i ra miẹn ẹdẹ we ovbi e Rekab ne okpia ma gha rrọ ne ọ gha ga mwẹ.”

← Chapter 34 Jump to: Chapter 36 →