Joshua 20

Edo ((E Baibol Ẹdo) Version 1996)

← Chapter 19 Jump to: Chapter 21 →

1Ẹre Nọyaẹnmwa na tama e Jọsua wẹẹ,

2“Ne ọ tama ivbi Izrẹl wẹẹ, ‘Wa zẹ avbe ẹvbo ne emwa gha lẹgbinna, ne I ka wẹ ne Mosis tama uwa.

3Ọmwa ne ọ gbe ọmwa ran vbe ne ẹ i na re ẹmwẹ ọnrẹn, sẹtin lẹ gha rrie evba ne ọ sẹtin lẹ fe vbe obọ ọmwa ne ọ te ra rria ikhi.

4Ọ sẹtin lẹ la ọkpa vbe avbe ẹvbo na, ọ ghi gha rrie ehe ne a na bu ohiẹn vbe onurho ẹvbo nii, ne ọ ya rhan otọ emwi ne ọ sunu ma avbe ọkaolotu. Ẹghẹ nii, iran ghi gie ẹe la uwu ẹvbo nii, iran ghi vbe rhie ehe ne ọ gha dia ne ẹẹn, ne ọ miẹn ehe na gha rre evba.

5A deghẹ ọmwa ne ọ ho ne ọ rria ikhi nii lele gha rrie evba, emwa ni rre ẹvbo ni i rhie ẹre ne iran, iran ghi degue ẹre rhunmwuda ẹ i re te ọ ba gbe ọmwa ni uan. Ẹ i re wẹ te ohu muẹn.

6Ọ ghi gha rre ẹvbo nii rhinrin a te sirra emwa ẹvbo nii gui ẹzọ ẹre ke rhinrin ọmwa ne ọ re ogie ohẹn ẹghẹ nii te wu, iyeke ọnii, ọmwa ni sẹtin werriegbe gha rrie ẹvbo ẹre ne ọ ke rre, ehe ne ọ ke lẹ fua.’ ”

7Rhunmwuda ọnii, vbe odẹ orrie ọghe Jọdan iran na zẹ Kedẹs; vbe Galili ne ẹvbo oke e Naftali; e Siẹkẹm vbe Ifreim ne ẹvbo oke, kevbe Hibrọn vbe Juda ne ẹvbo oke.

8Vbe odẹ abọ ọghe Jọdan, vbe oke ọghe Jẹriko vbe uwu ato, iran ke Bezọ ne ọ rre ẹwae Riubẹn; Ramọt vbe Giliad vbe ẹwae Gad; kevbe Golan vbe Basian ne ọ re ọghe ẹwae Manasẹ.

9Avbe enena ọrọre ẹvbo ne a lẹ gbinna ne a zẹ ne ivbi Izrẹl hia kevbe avbe orhunmwuyẹn ni rre ehe ne iran ye. Ọmwaikọmwa ne ọ gbe ọmwa ran vbe ne ẹ i na re ẹmwẹ ọnrẹn, sẹtin ya lẹ fi evba, ọmwa ne ọ ho ne ọ rria ikhi i ghi gbẹe rua. A ghi sirra emwa hia gui ẹzọ ẹre vbe evba.

← Chapter 19 Jump to: Chapter 21 →