Leviticus 12

Edo ((E Baibol Ẹdo) Version 1996)

← Chapter 11 Jump to: Chapter 13 →

1E Nọyaẹnmwa keghi yi avbe uhi na ma e Mosis,

2ne ivbi Izrẹl. Okhuo gha biẹ okpia, ọ ghi gha re ne ọ mwẹ awua la ikpẹdẹ ihinrọn, zẹ vbene ọ ye vbe ẹghẹ ne ọ na mu ohọ mwẹ.

3Vbe ikpẹdẹ ne ogierẹnrẹn, a ghi rhuẹ ọmọ nii.

4Okhuo nii ghi ye gbe ikpẹdẹ ehayan ọgban awua nii ke do fo vbe egbe ẹre vbe ekpa ọghe esagiẹn ne ọ gha tue vbe egbe ẹre; wẹ ne ọ ghẹ ya obọ kan emwi ne ọ huanrẹn ra ne ọ la uwu Owa Ukpon Ne ọ huanrẹn a te do miẹn wẹ ẹghẹ akpehuan rẹn gbae.

5Sokpan a deghẹ okhuo ọre ọ biẹe, ọ ghi gha mwẹ awua la ikpẹdẹ iwenẹ zẹ vbene ọ gha ye vbe ẹghẹ ne ọ na mu obọ mwẹ, o ghi ye gbe ikpẹdẹ ehan-yan iyeha ọ te do khian ne ọ huanrẹn vbe ọghe esagiẹn ne ọ tue ẹre.

6Ẹghẹ akpehuan rẹn ghẹ ghi gba nẹ ọre ọghe ọmọ okpia nọ ra ọmọ okhuo, ọ ghi mu ovbi ohuan ne ọ rre ukpo ọkpa bu ohẹn gha die onurho Owa Ukpon Ile ne a ya zọ ese ne agiẹn uan, ke vbe elikhukhu ra idu ne a ya zọ ese orukhọ.

7Ohẹn ghi viọ emwi izọ ese ya muohan gie Nọyaẹnmwa, ọ ghi vbe ru emwi ne a ru yọ ne ọ ya kpe awua ẹre kua ne ọ miẹn ehe na khian ne ẹ i ghi mwẹ awua. Emwi ne ọ kere ne okhuo ru vbe ọ gha biẹ nẹ ọre ọna khin.

8A deghẹ obọ okhuo nii ma gba ohuan, ọ ghi viọ idu eva ra elikhukhu gha dee, ọkpa ne a ya zọ ese na giẹn uan kevbe ọkpa ọghe izọ ese orukhọ. Ohẹn ghi ru emwi ne a ru yọ ne a ya kpe awua ẹre kua, ọ ghi do gha re ne ẹ i mwẹ awua.

← Chapter 11 Jump to: Chapter 13 →