1 Corinthians 8

Bundeli

← Chapter 7 Jump to: Chapter 9 →

1अब मूरतों के सामूं बलि करी भई बस्तों के बारे में - हम जानत आंय, कि हम सबई हां ज्ञान आय: ज्ञान घमण्ड पैदा करत आय, परन्त प्रेम से बढ़ती होत आय।

2जदि कोऊ समझे, कि मोहां कछु पता आय, तो जैसो जानो चईये ऊंसो अबै लौ नईं जानत।

3परन्त जदि कोऊ परमेसुर से प्रेम धरत आय, तो ऊए परमेसुर चीनत आय।

4सो मूरतों के सामूं बलि करी भई बस्तों के खाबे के बारे में -- हम जानत आंय, कि संसार में मूरत कछु बस्त नईंयां, और एक हां छोड़ कोऊ और परमेसुर नईंयां।

5ऊंसे तो आकास में और धरती पे बिलात ईसुर कहात आंय, (जैसो कि बिलात के ईसुर और बिलात के पिरभु आंय)।

6परन्त हमाए ऐंगर तो एकई परमेसुर आय: जाने कि बाप जौन कुदाऊं से सबरी बस्तें आंय, और हम उनईं के लाने आंय, और एकई पिरभु आय, जाने कि यीशु मसीह जिनके द्वारा सबरी बस्तें भईं, और हम सोई उनईं के द्वारा आंय।

7परन्त सबरन हां ऐसो ज्ञान नईंयां; परन्त कितेक जनें अब लौ मूरत हां कछु समजबे के कारण मूरतन के सामूं बलि करी गई कछु बस्त जानके खात आंय, और उन कौ हिया कमजोर होकें असुद्ध होत आय।

8खैबो हम हां परमेसुर के ऐंगर नईं ले जात, जदि हम न खाबें, तो कछु नुकसान नईंयां, और जदि खाबें तो कछु फायदा नईंयां।

9परन्त हुंसयार रओ, ऐसो न होबे, कि तुमाई जा छूट कऊं कमजोर जन के लाने उपटा लगबे कौ कारण बने।

10कायसे जदि कोऊ तोय ज्ञानी हां मूरत के मन्दर में खात तके, और ऊ कमजोर मान्स होबै, तो का ऊ की समज में मूरत के सामूं बलि करी भई बस्त के खैबे की हिम्मत न हो जै है।

11ई परकार से तोरी समज के काजें बो कमजोर भईया जीके लाने मसीह मरो, नास हो जै है।

12सो भईयन को अपराध करबे से और उन की कमजोर समज हां चोट पोंचाबे से तुम मसीह कौ अपराध करत आव।

13ई काजें जदि खैबो मोरे भईया हां ठेस खबाए, तो मैं कभऊं कोऊ भांत से मांस न खै हों, न होबे कि मैं अपने भईया को उपटा कौ कारण बनों।

← Chapter 7 Jump to: Chapter 9 →