Acts 13

Tibetian NTB (བོད་འགྱུར་གསར་མ།)

1དེ་ཡང་ཨན་ཏི་ཡོག་ཡཱ་ཡི་ཆོས་ཚོགས་ཀྱི་ནང་དུ་ལུང་སྟོན་པ་དང་སློབ་དཔོན་འགའ་ཡོད༌དེ། པཱར་ན་པཱ༌དང༌། ནེ་གེར་ཞེས་ཀྱང་འབོད་པའི་སི་མུ༌ཨོན། ཀི་རེ་ནེ་ཞེས་པའི་ལོ་ཀེ༌ཨོ། ས་གནས་དཔོན་པོ་ཧེ་རོ་དཱ་དང་མཉམ་དུ་བསྙོར་བའི་མཱ་ན་ཧེན་དང་སོ་ལོ་བཅས༌ཡིན་ནོ།།

2ཁོང་རྣམས་ཀྱིས་གཙོ་བོ་ལ་བསྙེན་བཀུར་བྱེད༌ཅིང༌སྨྱུང་གནས་སྲུང་བའི་དུས་སུ། དམ་པའི་ཐུགས་ཉིད་ཀྱིས་འདི་སྐད༌དུ། བདག་གི་ཆེད་དུ་ཁྱོད་རྣམས་ཀྱིས་པཱར་ན་པཱ་དང་སོ་ལོ་གཉིས་བདག་གིས་བསྐུལ་བའི་ཆོས་དོན་བསྒྲུབ་པར་སྐོས་ཤིག་ཅེས་གསུངས་སོ།།

3དེ་ནས་ཁོང་རྣམས་ཀྱིས་ཀྱང་སྨྱུང་གནས་བསྲུངས་ཏེ་གསོལ་བ་བཏབ་པ་དང་ཁོང་གཉིས་ཀྱི་ལུས་ལ་ཕྱག་བཞག་རྗེས་ཡུལ་གཞན་དུ་བཏང༌ངོ༌།།

4དེ་ནས་ཁོང་གཉིས་དམ་པའི་ཐུགས་ཉིད་ཀྱིས་མངགས་ཏེ་མར་སི་ལོ་ཡཱ་རུ་སོང༌ཞིང༌། དེ་ནས་གྲུ་གཟིངས་ལ་བསྡད་དེ་ཀིབ་རིས་ལ་ཕྱིན་པ་རེད།

5ཁོང་གཉིས་སཱ་ལ་མུ་རུ་སླེབས༌ཏེ། ཡ་ཧུ་དཱ་པའི་ཆོས་ཁང་སོ་སོ་ནས་དཀོན་མཆོག་གི་བཀའ་བསྒྲགས༌ཤིང༌། ཡོ་ཧ་ནན་ཡང་ཁོང་གཉིས་ཀྱི་ལས་གྲོགས་སུ་གྱུར་ཏོ།།

6ཁོང་རྣམས་གླིང་ཕྲན་ཡོངས་སུ་བརྒྱུད་པའི༌མཐར། པཱ་ཕོ་རུ་སླེབས་པ་དང་དེ་རུ་སྒྱུ་མ་མཁན་ཡིན་པའི་ཡ་ཧུ་དཱ་པའི་ལུང་སྟོན་པ་རྫུས་མ་ཞིག་དང་ཕྲད་ཅིང་དེའི་མིང་ལ་པཱར་ཡེ་ཤུ་ཟེར།

7མི་དེ་ནི་དུས་རྒྱུན་སྤྱི་དཔོན་སུར་ཀེ་ཕོལ་ལོལ་དང་མཉམ་དུ་གནས༌ཤིང༌། སྤྱི་དཔོན་དེ་ནི་བློ་གྲོས་དང་ལྡན་པ་ཞིག་ཡིན༌ཏེ། ཁོས་དཀོན་མཆོག་གི་བཀའ་ལ་མཉན་པའི༌ཕྱིར། པཱར་ན་པཱ་དང་སོ་ལོ་གཉིས་གདན་དྲངས༌པ་རེད།

8འོན༌ཀྱང༌། གྷི་རིག་སྐད་ཀྱི་ཨི་ལི་མཱ་བྱ་བའི་སྒྱུ་མ་མཁན་ དེས་སྤྱི་དཔོན་ཁོང་ཉིད་དད་པ་ལས་བཟློག་པར་བསམས་ནས་ཁོང་གཉིས་ལ་འགོག་རྒོལ་བྱས་སོ།།

9དེ་ནས་ཕོལ་ལོལ་ཞེས་ཀྱང་འབོད་པའི་སོ་ལོ་ལ་དམ་པའི་ཐུགས་ཉིད་ཀྱིས་ཁྱབ༌ཅིང༌། ཁོང་གིས་མི་དེ་ལ་ཞིབ་ཏུ་བལྟས་ཏེ་འདི་སྐད༌དུ།

10གཡོ་སྒྱུ་དང་ཁྲམ་སེམས་ཀྱིས་ཁེངས་པའི་བདུད་ཀྱི༌བུ། དྲང་བདེན་ཐམས་ཅད་ཀྱི་དགྲ་བོ་ཁྱོད་ཀྱིས་དཀོན་མཆོག་གི་ལམ་ཡང་དག་པ་དེ་འཁྱོག་བཤད་བྱས་ནས་ད་དུང་མཚམས་མི་འཇོག༌གམ།

11ད་ལྟ་གཙོ་བོའི་ཕྱག་གིས་ཁྱོད་ཀྱི་མིག་ལོང་བར་བྱས་ནས་རེ་ཞིག་ཉི་མའི་འོད་མི་མཐོང་བར་འགྱུར་ཞེས་སྨྲས་མ་ཐག ཁོའི་མིག་ལ་མུན་ནག་འཐིབས་ཏེ་ཅི་ཡང་མ་མཐོང་བས་ཕྱོགས་བཞིར་ལམ་ཁྲིད་པ་འཚོལ་བཞིན་གདའོ།།

12དེ་ནས་སྤྱི་དཔོན་གྱིས་དོན་དེ་མཐོང་ནས་གཙོ་བོའི་བཀའ་ཆོས་ལ་ཤིན་ཏུ་ངོ་མཚར་ཞིང་དད་པར་གྱུར༌ཏོ།།

13དེ་ནས་ཕོལ་ལོལ་དང་ཁོང་གི་ཆོས་གྲོགས་རྣམས་པཱ་ཕོ་ནས་གྲུ་གཟིངས་ལ་བསྡད་དེ་ཕཱམ་ཕིལ་ཡ་ཡུལ་གྱི་ཕིར་གེ་རུ་སླེབས༌རྗེས། ཡོ་ཧ་ནན་ཁོང་རྣམས་དང་ཁ་བྲལ་ནས་ཡེ་རུ་སཱ་ལེམ་དུ་ལོག་གོ།

14དེ་ནས་ཁོང་རྣམས་ཕིར་གེ་དང་ཁ་བྲལ་ནས་ཕུ་སིད་ཡཱ་ཡུལ་གྱི་ཨན་ཏི་ཡོག་ཡཱ་རུ་ཕྱིན༌ཏེ། ངལ་གསོ་བའི་ཉིན་མོར་ཆོས་ཁང་དུ་སོང་ནས་བཞུགས་པ་རེད།

15དེ་ནས་བཀའ་ཁྲིམས་དང་ལུང་སྟོན་པའི་མདོ་ལས་ཚན་པ་ཞིག་བཀླགས་ཚར་བ༌ན། ཆོས་ཁང་གི་དབུ་འཛིན་པས་མི་མངགས་ཏེ་ན༌རེ། སྤུན་ཟླ༌རྣམས། གལ་ཏེ་ཁྱེད་ཅག་ལ་མི་རྣམས་ཀྱི་སེམས་སྐུལ་བའི་གཏམ་ཡོད་ན་གསུང་རོགས་ཞུ་ཞེས་ངག་འཕྲིན་བསྐུར༌ཏོ།།

16དེ་ནས་ཕོལ་ལོལ་ཡར་ལངས་ནས་ལག་བརྡ་བྱས་ཏེ་འདི་སྐད༌དུ། ཡེས་ར་ཨེལ་པ་རྣམས་དང་དཀོན་མཆོག་ལ་དད་གུས་ཡོད་པའི་མི་ཐམས་ཅད་ཀྱིས་ཉོན༌ཅིག

17རང་རེ་ཡེས་ར་ཨེལ་མི་རིགས་ཀྱི་དཀོན་མཆོག་གིས་བདག་ཅག་གི་ཕ་མེས་རྣམས་བདམས༌ཤིང༌། མི་དེ་རྣམས་ཨེ་ཅིབ་ཡུལ་དུ་སྡོད་པའི༌ཚེ་ཁོ་རྣམས་ཆེན་པོར་མཛད་པ༌དང༌། ནུས་མཐུ་ལྡན་པའི་སྒོ་ནས་ཡུལ་དེ་ནས་ཕྱིར་ཁྲིད༌ཅིང༌།

18ཡང་དབེན་སྟོང་ཡུལ་ནས་ལོ་ངོ་བཞི་བཅུ་ལྷག་གི་རིང༌ལ་མེས་པོ་རྣམས་ལ་བཟོད་སྒོམ་མཛད༌པ་དང་།

19ཡང་ཁོང་གིས་ཀ་ན་ཨན་ཡུལ་གྱི་མི་རིགས་བདུན་པོ་རྡུལ་དུ་བརླག༌ཅིང༌། ཡུལ་དེ་ཡེས་ར་ཨེལ་པ་རྣམས་ལ་བགོ་སྐལ་དུ་གནང༌བ་ཡིན།

20དོན་དེ་ཐམས་ཅད་ནི་ལོ་ངོ་བཞི་བརྒྱ་ལྔ་བཅུ་ཙམ་གྱི་རིང་ལ་བྱུང་བ་ཡིན། དེའི་རྗེས༌སུ། ཁོང་གིས་ལུང་སྟོན་པ་སཱ་མུ༌ཨེལ་གྱི་བར་དུ་མེས་པོ་དག་ལ་ཁྲིམས་དཔོན་བསྐོས༌པ་དང་།

21ཕྱིས་སུ། ཁོ་རྣམས་ཀྱིས་རྒྱལ་པོ་ཞིག་གནང་བར་ཞུ་བ་ཞུས་པ༌ལ། དཀོན་མཆོག་གིས་པེན་ཡཱ་མེན་གྱི་ཚོ་པར་གཏོགས་པའི་ཁི་སི་ཞེས་པའི་བུ༌སྟེ། སོ་ལོ་ཟེར་བ་དེ་ལོ་བཞི་བཅུའི་རིང་ཁོ་རྣམས་ཀྱི་རྒྱལ་པོར་གནང༌ངོ་།།

22ཡང་ཁོང་གིས་སོ་ལོ་ཕྱིར་བཏོན་པར་མཛད་ནས་དཱ་བིད་ཁོ་རྣམས་ཀྱི་རྒྱལ་པོར་བསྐོས༌ཤིང༌། དེ་ལ་དཔང་པོ་མཛད་ནས་འདི་སྐད༌དུ། ངས་ཡེ་སེའི་བུ་དཱ་བིད་རྙེད་དེ་ཁོ་ནི་ངའི་ཐུགས་སུ་འབྱོན་པའི་མི་ཞིག་ཡིན་ཞིང༌། ཁོས་བདག་གི་དགོངས་དོན་ཐམས་ཅད་ཇི་བཞིན་དུ་བསྒྲུབ་པར་འགྱུར་ཞེས་གསུངས་སོ།།

23དཱ་བིད་ཀྱི་རིགས་རྒྱུད་ལས་དཀོན་མཆོག་གིས་རང་ཉིད་ཀྱི་ཞལ་བཞེས༌ལྟར། ཡེས་ར་ཨེལ་པ་རྣམས་ལ་སྐྱབས་མགོན་དུ་ཡེ་ཤུ་མངགས་པ་ཡིན་ནོ།།

24ཁོང་མ་བྱོན་པའི་སྔོན༌ལ། ཡོ་ཧ་ནན་གྱིས་ཡེས་ར་ཨེལ་པ་ཐམས་ཅད་ལ་འགྱོད་བཤགས་ཀྱི་རྟགས་སུ་ཁྲུས་གསོལ་གྱི་ཆོས་བསྒྲགས༌ཤིང༌།

25ཡོ་ཧ་ནན་གྱིས་དོན་འདི་བསྒྲུབས་ཚར་ལ་ཉེ་བའི་དུས་སུ་འདི་ལྟར་གསུངས་པ་སྟེ། ཁྱོད་ཅག་གིས་ང་རང་སུ་རེད་འདོད༌དམ། ང་ནི་སྐྱབས་མགོན་མཱ་ཤི་ཀ་མིན། ངས་རང་གི་རྗེས་སུ་ཕེབས་ངེས་པ་ཁོང་གི་ལྷམ་མདུད་ཀྱང་དགྲོལ་བར་མི་འོས་ཞེས་པའོ།།

26ཡང་ཕོལ་ལོལ་ན༌རེ། སྤུན་ཟླ་རྣམ་པ། ཨབ་ར་ཧམ་གྱི་བུ་རྒྱུད༌དང་། ཁྱོད་ཅག་ལས་དཀོན་མཆོག་ལ་དད་གུས་ཡོད་པའི་མི༌རྣམ་པ། དཀོན་མཆོག་གིས་འཇིག་རྟེན་སྐྱོབ་པར་བྱེད་པའི་བཀའ་འདི་བདག་ཅག་ལ་གནང་བ་ཡིན་ནོ།།

27ཡེ་རུ་སཱ་ལེམ་དུ་སྡོད་པའི་མི་རྣམས་དང་དེ་དག་གི་དཔོན་རིགས་རྣམས་ཀྱིས་གཙོ་བོ་ཡེ་ཤུ་སུ་ཡིན་མ་ཤེས༌ལ། ངལ་གསོ་བའི་ཉིན་རེ་རེར་བཀླགས་པའི་ལུང་སྟོན་པ་རྣམས་ཀྱི་གསུང་ཡང་མ་གོ༌བར། ཁོང་ལ་སྲོག་ཆད་བཅད་ནས་ལུང་བསྟན་ལྟར་འགྲུབ་པར་བྱས་པ་རེད།

28དེ་དག་གིས་ཁོང་ལ་སྲོག་ཆད་གཅོད་དགོས་པའི་ཉེས་སྐྱོན་ཅི་ཡང་མ་རྙེད༌ནའང༌། པི་ལ་ཏུ་ལ་ཁོང་ཉིད་དགྲོང་དགོས་པའི་རེ་བ་ཞུས་སོ།།

29དེ་ཡང་ཁོ་རྣམས་ཀྱིས་གསུང་རབ་ལས་སྐྱབས་མགོན་ཡེ་ཤུའི་སྐོར་བཀོད་ཡོད་པའི་དོན་ཐམས་ཅད་བསྒྲུབས༌རྗེས། མི་གཞན་རྣམས་ཀྱིས་ཁོང་གི་སྐུ་པུར་སྡོང་པོ་ལས་མར་བླངས་ཏེ་དུར་ཁུང་ཞིག་ཏུ་དུར་ལ་བཅུག་གོ།

30འོན༌ཀྱང༌། དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་པ༌དང༌།

31དེ་སྔར་ག་ལིལ་ཡུལ་ནས་ཁོང་དང་མཉམ་དུ་ཡེ་རུ་སཱ་ལེམ་ལ་ཡོང་མཁན་རྣམས་ཀྱིས་ཀྱང་ཉིན་མང་པོར་ཁོང་ཉིད་མཐོང་མྱོང་བ༌དང༌། མི་དེ་དག་ནི་ད་ལྟ་མི་རྣམས་ཀྱི་མདུན་དུ་ཁོང་ལ་བདེན་དཔང་བྱེད་མཁན་ཡང་ཡིན་ནོ།།

32ངེད་རྣམས་ཀྱིས་ཀྱང་ཁྱོད་ཅག་ལ་འཕྲིན་བཟང་འཆད་པར༌བྱ་སྟེ། དེ་སྔར་དཀོན་མཆོག་གིས་བདག་ཅག་གི་ཕ་མེས་ཡང་མེས་ལ་ཞལ་བཞེས་གནང་བ་དེ༌ནི།

33དཀོན་མཆོག་གིས་ཀྱང་བདག་ཅག་བུ་རབས་ཚ་རྒྱུད་རྣམས་ཀྱི་དུས་འདིར་སྐྱབས་མགོན་ཡེ་ཤུ་སླར་གསོན་པར་མཛད་པའི་སྒོ་ནས་བསྒྲུབས༌པ་ལགས། དེ་ལ་གསུང་མགུར་གཉིས་པ༌ལས། ཁྱོད་ནི་བདག་གི་སྲས་ཡིན༌ཞིང༌།། དེ་རིང་བདག་ལ་འཁྲུངས་པ་ཡིན།། ཞེས་གསུངས་པ་བཞིན༌ནོ།།

34ཡང་དཀོན་མཆོག་གིས་ཁོང་ཉིད་གྲོངས་པ་ནས་སླར་གསོན་པར་མཛད་ཅིང་དུས་ནམ་ཡང་མི་འཇིག་པའི་སྐོར་ལ་ཇི་སྐད༌དུ། ཡང་དག་བདེན་པའི་བྱིན་གྱིས་བརླབས་པ༌ནི།། དཱ་བིད་ཁོང་ལ་ཇི་ལྟར་གནང་བ༌བཞིན།། བདག་གིས་ཁྱོད་ཚོར་དེ་ལྟར་སྦྱིན་པར༌བྱ།། ཞེས་གསུངས༌པའོ།།

35དེའི༌ཕྱིར། གསུང་མགུར་གཞན་ལས་ཀྱང་ཇི་སྐད༌དུ། ཁྱོད་ཀྱིས་རང་གི་སྐྱེས་བུ་དམ་པ༌ནི།། ནམ་ཡང་རུལ་དུ་འཇུག༌པ་མ་ཡིན་ནོ།། ཞེས་གསུངས༌སོ།།

36དཱ་བིད་འཚོ་གཞེས་ཀྱི་དུས༌སུ། དཀོན་མཆོག་གི་དགོངས་པ་བཞིན་དུ་ཞབས་ཕྱི་བསྒྲུབས༌རྗེས། ཁོང་ཚེ་ལས་འདས་པ་དང་རང་གི་ཕ་མེས་ཡང་མེས་དང་མཉམ་དུ་དུར་ལ་བཅུག་པ་དང་བེམ་པོའང་འཇིག་པར་གྱུར་ཏོ།།

37འོན༌ཀྱང༌། དཀོན་མཆོག་གིས་སླར་གསོན་པར་མཛད་པ་དེ་ཉིད་འཇིག་པར་མ་གྱུར་ཏོ།།

38དེའི༌ཕྱིར། སྤུན་ཟླ༌རྣམས། དོན་འདི་ཤེས་པར༌གྱིས། སྡིག་པ་སེལ་བའི་བཀའ་ནི་སྐྱབས་མགོན་ཡེ་ཤུ་བརྒྱུད་ནས་ཁྱོད་རྣམས་ལ་སྒྲོག་པར་བྱེད།

39མོ་ཤེའི་བཀའ་ཁྲིམས་ལ་བརྟེན་ནས་ཁྱོད་ཅག་རྣམ་དག་ཏུ་བརྩི་མི་ནུས༌ཤིང༌། སྐྱབས་མགོན་ཡེ་ཤུ་བརྒྱུད༌ནས་དད་པ་བྱེད་མཁན་ཐམས་ཅད་རྣམ་དག་ཏུ་རྩི་བར་མཛད་དོ།།

40དེ་བས་ལུང་སྟོན་པའི་ལུང་བསྟན་ལས་གསུངས་པ་རྣམས་ཁྱོད་ཅག་ལ་མི་འཕོག་པའི་ཕྱིར་གཟབ་པར༌གྱིས།

41དེ་ལ་ཇི་སྐད༌དུ། བདག་གིས་ཁྱོད་ཚོའི་དུས་འདི༌རུ།། དོན་ཞིག་བསྒྲུབ་ཀྱང་ཁྱོད་རྣམས༌ལ།། གཞན་གྱིས་དོན་དེ་བརྗོད་ན༌ཡང༌།། ཁྱོད་ཅག་ཡིད་ཆེས་མེད་པའི༌ཕྱིར།། འཕྱ་མཁན་ཁྱོད་རྣམས་ལྟོས་ཤིག༌ཀྱེ།། ངོ་མཚར་བ་དང་འཇིག་པར༌ཤོག ། ཅེས་པའོ་ཞེས་གསུངས༌སོ།།

42དེ་ནས་ཁོང་རྣམས་ཆོས་ཁང་ལས་ཕྱིར་བུད་པ༌དང༌། མི་དེ་རྣམས་ཀྱིས་ངལ་གསོ་བའི་ཉིན་རྗེས་མར་ཡང་དོན་འདིའི་སྐོར་ཁོང་རྣམས་ལ་གསུང་བའི་རེ་བ་ཞུས༌ཤིང་།

43ཆོས་ཁང་གི་ཚོགས་གྲོལ༌རྗེས། ཡ་ཧུ་དཱ་པ་དང་ཡ་ཧུ་དཱ་པའི་ཆོས་ལུགས་ལ་ཞུགས་པའི་མི་མང་པོ་ཞིག་ཕོལ་ལོལ་དང་པཱར་ན་པཱ་གཉིས་ཀྱི་རྗེས་སུ་འབྲངས་པ༌དང༌། ཁོང་གཉིས་ཀྱིས་ཀྱང་མི་དེ་རྣམས་ལ་དུས་རྟག་ཏུ་དཀོན་མཆོག་གི་ཐུགས་རྗེའི་ནང་གནས་པར་སྐུལ་མ་མཛད༌དོ།།

44དེ་ནས་གཟའ་འཁོར་རྗེས་མའི་ངལ་གསོ་བའི་ཉིན་མོར་གྲོང་ཁྱེར་གྱི་མི་མང་ཤོས་ནི་དཀོན་མཆོག་གི་བཀའ་ལ་མཉན་ཕྱིར་ལྷན་དུ་འདུས༌པ་རེད།

45འོན༌ཀྱང༌། ཡ་ཧུ་དཱ་པ་རྣམས་ཀྱིས་མི་དེ་འདྲ་མང་བ་མཐོང་ནས་ཕྲག་དོག་སྐྱེས༌ཏེ། ཕོལ་ལོལ་གྱིས་གསུངས་པ་ལ་དགག་ཅིང་དམའ་འབེབས་བྱས་སོ།།

46དེ་ནས་ཕོལ་ལོལ་དང་པཱར་ན་པཱ་གཉིས་ཀྱིས་སྤོབས་པ་ཆེན་པོས་འདི་སྐད༌དུ། དཀོན་མཆོག་གི་བཀའ་ནི་ཐོག་མར་ཁྱོད་རྣམས་ལ་བསྒྲག་འོས་པ་ཡིན༌མོད། འོན་ཀྱང་ཁྱོད་རྣམས་ཀྱིས་བཀའ་དེ་སྤངས༌ཤིང༌། རང་ཉིད་ལ་མཐའ་མེད་པའི་ཚེ་སྲོག་འཐོབ་མི་འོས་པའི་ཁ་ཚོན་བཅད༌པས། ལྟོས་དང་། ངེད་ཅག་ཕྱི་ཕྱོགས་པ་རྣམས་ལ་བཀའ་བསྒྲག་པར༌འགྲོའོ།།

47རྒྱུ་མཚན་ནི་གཙོ་བོས་ངེད་ཅག་ལ་འདི་སྐད༌དུ། ས་མཐའི་བར་དུ་ཐར་པའི་ཆོས་བསྒྲག༌ཕྱིར།། བདག་གིས་ཁྱོད་ནི་ཕྱི་ཕྱོགས་མི་རྣམས༌ལ།། འཕྲོ་བར་བྱེད་པའི་འོད་དུ་བསྐོས་པ༌ཡིན།། ཞེས་བཀའ་གནང༌ངོ༌།།

48དེ་ནས་ཕྱི་ཕྱོགས་པ་རྣམས་ཀྱིས་གསུང་དེ་ཐོས་ནས་ཤིན་ཏུ་དགའ་བར་གྱུར་ཏེ་གཙོ་བོའི་བཀའ་ལ་བསྟོད་ཅིང་བསྔགས་པ༌དང༌། དཀོན་མཆོག་ཉིད་ཀྱིས་སྔར་ནས་མཐའ་མེད་པའི་ཚེ་སྲོག་འཐོབ་པར་ཅི་ཙམ་ཐག་གིས་བཅད་པ་བཞིན་མི་རྣམས་ཁོང་ལ་དད་པར་གྱུར༌པས།

49གཙོ་བོའི་བཀའ་ཡུལ་དེ་ཐམས་ཅད་ལ་ཁྱབ་པར་གྱུར་ཏོ།།

50འོན་ཀྱང་ཡ་ཧུ་དཱ་པ་རྣམས་ཀྱིས་གྲོང་ཁྱེར་ནང་གི་དད་མོས་ཡོད་པ་དང་བཀུར་འོས་པའི་བུད་མེད་དང་དཔོན་རིགས་རྣམས་ལ་ངན་སྐུལ་བྱས༌ཏེ། ཕོལ་ལོལ་དང་པཱར་ན་པཱ་གཉིས་ལ་བཙན་ཤུགས་བཀོལ་ནས་ཡུལ་དེ་ལས་ཕྱིར་བཏོན་ནོ།།

51དེ་བས་ཁོང་གཉིས་ཀྱིས་མི་དེ་དག་གི་ཕྱོགས་སུ་རྐང་པའི་སྟེང་གི་ས་རྡུལ་སྤྲུགས་ཏེ་ཨི་ཀོན་ཡུ་རུ་ཕྱིན༌པ་དང་།

52རྗེས་འབྲང་པ་རྣམས་ཀྱི་སེམས་ལ་དགའ་སྤྲོས་ཁེངས་ཤིང་དམ་པའི་ཐུགས་ཉིད་ཀྱིས་ཁྱབ་པར་གྱུར༌ཏོ།།

← Chapter 12 Jump to: Chapter 14 →