Acts 19

Tibetian NTB (བོད་འགྱུར་གསར་མ།)

1དེ་ཡང་ཨ་པོལ་ལོ་ཞེས་བྱ་བ་ཀོ་རིན་ཐུ་རུ་བཞུགས་པའི་དུས༌དེར། ཕོལ་ལོལ་ཁོང་ཉིད་ག་ལད་ཡཱ་དང་ཕུ་ཀེ་ཡཱ་ཡུལ་བརྒྱུད་ནས་ཨེ་ཕེ་སི་རུ་སླེབས་པ༌དང༌། གནས་དེ་རུ་རྗེས་འབྲང་པ་འགར་ཕྲད་ཅིང༌།

2ཁོང་གིས་དེ་རྣམས་ལ་འདི་སྐད༌དུ། ཁྱོད་ཅག་གིས་དད་པ་བྱེད་པའི་དུས་སུ་དམ་པའི་ཐུགས་ཉིད་ཐོབ་མྱོང་ངམ་ཞེས་དྲིས་པ༌ལ། དེ་རྣམས་ན༌རེ། ཐོབ་མ་མྱོང་ལ། དམ་པའི་ཐུགས་ཉིད་ཅེས་པ་ཞིག་ཡོད་པ་ཐོས་ཀྱང་མ་མྱོང་ཞེས་ཞུས་སོ།།

3དེ་ནས་ཕོལ་ལོལ་གྱིས་འདི་སྐད༌དུ། དེས་ན་ཁྱོད་རྣམས་ལ་ཁྲུས་གསོལ་གང་ཐོབ་པ་ཡིན་ནམ་ཞེས་གསུངས་པ༌ན། དེ་རྣམས་ཀྱིས་ཡོ་ཧ་ནན་གྱི་ཁྲུས་གསོལ་ཐོབ་པ་ཡིན་ཞེས་ཞུས་སོ།།

4ཡང་ཕོལ་ལོལ་གྱིས་འདི་སྐད༌དུ། ཡོ་ཧ་ནན་གྱིས་འགྱོད་བཤགས་ཀྱི་རྟགས་སུ་ཁྲུས་གསོལ་བྱས་པ༌དང༌། མི་རྣམས་ལ་རང་གི་རྗེས་སུ་འབྱོན་ངེས་པ་སྟེ་སྐྱབས་མགོན་ཡེ་ཤུ་ལ་དད་པ་བྱེད་དགོས་པར་བསྐུལ་བ་ཡིན་ཞེས་གསུངས་སོ།།

5དེ་རྣམས་ཀྱིས་གསུང་དེ་ཐོས་པ་དང་གཙོ་བོ་ཡེ་ཤུའི་མཚན་ལ་བརྟེན་ནས་ཁྲུས་གསོལ་ལ་ཞུགས་ཤིང༌།

6ཕོལ་ལོལ་གྱིས་དེ་རྣམས་ཀྱི་ལུས་ལ་ཕྱག་བཞག་པ་དང་དེ་རྣམས་ལ་དམ་པའི་ཐུགས་ཉིད་ཐོབ་ཅིང༌། ངག་ནས་སྐད་གཞན་སྨྲ་ཞིང་ལུང་ཡང་བསྟན་ཏོ།།

7བསྡོམས་པས་མི་བཅུ་གཉིས་ཙམ་ཡོད༌དོ།།

8དེ་ནས་ཕོལ་ལོལ་ཆོས་ཁང་དུ་ཕྱིན་ཏེ། ཟླ་བ་གསུམ་གྱི་རིང༌ལ་རྒྱུན་ཆད་མེད་པར་སྙིང་སྟོབས་ཆེན་པོས་ཆོས་གསུངས་པ༌དང༌། དཀོན་མཆོག་གི་རྒྱལ་སྲིད་སྐོར་ལ་རྩོད་གླེང་བྱས་ཏེ་མི་རྣམས་ལ་སྐུལ་མ་གནང༌མོད།

9འོན༌ཀྱང༌། ཕྱིས་སུ་མི་ལ་ལའི་སེམས་རྒྱུད་གྱོང་པོར་གྱུར་པ་དང་དད་པའང་མ་བྱས༌པས། མི་ཚོགས་ཀྱི་མདུན་དུ་མཱ་ཤི་ཀའི་ཆོས་ཀྱི་ལམ་དེ་ལ་འཕྱ་སྨོད་བྱས་སོ།། དེ་ནས་ཕོལ་ལོལ་གྱིས་རྗེས་འབྲང་པ་རྣམས་ཁྲིད་ཅིང་དེ་དག་དང་ཁ་བྲལ༌ནས། ཉིན་རེ་བཞིན་ཐཱ་རན་ནུ་ཞེས་པའི་སློབ་གླིང་དུ་རྩོད་གླེང་བྱས།

10ཁོང་གིས་ལོ་གཉིས་ཀྱི་རིང་ལ་དེ་ལྟར་མཛད་པས་ཨེ་ཞི་ཡཱ་ཡུལ་དུ་གནས་པའི་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་ཀྱང་གཙོ་བོའི་བཀའ་ཐོས༌སོ།།

11དེ་ཡང་དཀོན་མཆོག་གིས་ཕོལ་ལོལ་གྱི་ཕྱག་བརྒྱུད་ནས་ཤིན་ཏུ་ངོ་མཚར་ཆེ་བའི་དོན་རྣམས་མཛད་པ༌དང༌།

12ཐ་ན་མི་ལ་ལས་ཕོལ་ལོལ་གྱི་ལུས་ནས་ལག་ཕྱིས་དང་པང་ཁེབས་བླངས༌ཏེ། ནད་པའི་ལུས་སྟེང་དུ་བཀབ་མ་ཐག་ནད་བསལ་ཞིང་གདོན་འདྲེའང་ཕྱིར་ཐོན་པ་རེད།

13དུས༌དེར། ཡུལ་ཕྱོགས་ཀུན་ཏུ་འགྲིམས་ཤིང་སྔགས་བརྒྱབ་སྟེ་གདོན་འདྲེ་ཕྱིར་སྐྲོད་པའི་ཡ་ཧུ་དཱ་པ་འགའ་ཞིག་གིས་གདོན་འདྲེས་བཟུང་བའི་མི་རྣམས་ལ་རང་དགར་གཙོ་བོ་ཡེ་ཤུའི་མཚན་བརྗོད་ཅིང་འདི་ལྟར་སྨྲས༌པ། ངས་ཕོལ་ལོལ་གྱིས་བསྒྲགས་པའི་སྐྱབས་མགོན་ཡེ་ཤུའི་མཚན་ལ་བརྟེན་ནས་གདོན་འདྲེ་ཁྱོད་རྣམས་ཕྱིར་བུད་ཅིག་ཅེས་སྨྲས་པ་ཡིན་ཞེས༌པའོ།།

14དེ་ལྟར་བྱེད་མཁན་ནི་ཡ་ཧུ་དཱ་པའི་མཆོད་དཔོན་ཆེན་པོ་སི་རྐེ་བཱ་ཞེས་པའི་བུ་བདུན་ཡིན༌ལ།

15གདོན་འདྲེས་ཁོ་རྣམས་ལ་ངས་སྐྱབས་མགོན་ཡེ་ཤུ་དང་ཕོལ་ལོལ་གཉིས་ཀ་སུ་ཡིན་པ་ཤེས། འོན༌ཀྱང༌ཁྱོད་ཅག་སུ་ཡིན་ནམ་ཞེས་སྨྲས་པ༌དང༌།

16གདོན་འདྲེས་བཟུང་བའི་མི་དེ་ཁོ་རྣམས་ཀྱི་ལུས་སྟེང་དུ་མཆོངས་པ་དང་དེ་དག་ལས་རྣམ་པར་རྒྱལ་ཞིང་ཁོ་རྣམས་ལ་དབང་བསྒྱུར༌བས། དེ་རྣམས་ལ་རྨས་ཕོགས་ཤིང་ལུས་གཅེར་བུར་ཁང་པ་ལས་ཕྱིར་བྲོས་སོ།།

17ཨེ་ཕེ་སི་རུ་སྡོད་པའི་ཡ་ཧུ་དཱ་པ་དང་གྷི་རིག་པ་ཐམས་ཅད་ཀྱིས་དོན་དེ་ཤེས་ནས་འཇིགས་པར་གྱུར་པ༌དང༌། གཙོ་བོ་ཡེ་ཤུའི་མཚན་སྙན་གྲགས་ཀྱང་ཤིན་ཏུ་རྒྱས་པར་གྱུར་ཏོ།།

18དེ་ནས་དད་པ་བྱེད་མཁན་གསར་པ་མང་པོ་ཞིག་ཡོང་ནས་རང་གིས་བྱས་པའི་ཉེས་སྐྱོན་ཁས་བླངས་ཤིང་མཐོལ་བཤགས་བྱས་པ་རེད།

19ཡང་སྒྱུ་མ་མཁན་མང་པོས་ཀྱང་མི་རྣམས་ཀྱི་མདུན་དུ་རང་གི་དཔེ་ཆ་སྤུངས་ནས་མེར་བསྲེགས་ཤིང་། དེ་དག་གིས་མེར་བསྲེགས་པའི་དཔེ་རིན་བརྩིས་པ་ལ་བསྡོམས་པས་དངུལ་སྒོར་ཁྲི་ལྔ་ཡོད་པ་ཤེས་སོ།།

20དེ་ལྟར་གཙོ་བོའི་བཀའ་ཤིན་ཏུ་དར་ཞིང་རྒྱས་པ་དང་མི་མཐུན་ཕྱོགས་ལས་རྣམ་པར་རྒྱལ༌ཏོ།།

21དོན་དེ་རྣམས་མཇུག་རྫོགས༌རྗེས། ཕོལ་ལོལ་གྱིས་རང་ཉིད་མ་ཀེ་དོན་ཡཱ་དང་ཨ་ཀ་ཡཱ་ཡུལ་བརྒྱུད་ནས་ཡེ་རུ་སཱ་ལེམ་དུ་འགྲོ་བར་སེམས་ཐག་བཅད་དེ། ང་རང་དེ་རུ་སླེབས་རྗེས་ངེས་པར་རོ་མཱ་ལ་བལྟ་རུ་འགྲོའོ་ཞེས་གསུངས་སོ།།

22དེ་ནས་ཁོང་ལ་རོགས་བྱེད་མཁན་རྣམས་ལས་ཐི་མོ་ཐེ་དང་ཨེ་རས་ཏི་གཉིས་མ་ཀེ་དོན་ཡཱ་ཡུལ་དུ་མངགས༌ཤིང༌། རང་ཉིད་རེ་ཞིག་ཨེ་ཞི་ཡཱ་ཡུལ་དུ་བཞུགས༌སོ།།

23དུས༌དེར། མཱ་ཤི་ཀའི་ཆོས་ཀྱི་ལམ་དེའི་རྐྱེན་གྱིས་ཟིང་ཆ་ཆེན་པོ་བྱུང༌བ་རེད།

24མིང་ལ་ཏི་མེ་ཏྲེ་ཟེར་བའི་དངུལ་མགར་ཞིག་ཡོད་པ་དེ་ནི་རྒྱུན་དུ་ལྷ་མོ་ཨར་ཏེ་མེ་ཞེས་པའི་མཆོད་ཁང་གི་འདྲ་གཟུགས་དངུལ་གྱིས་བཟོ་མཁན་ཞིག་ཡིན༌པས། དངུལ་མགར་རྣམས་ལ་ཁེ་བཟང་ཆེན་པོ་ཐོབ༌པར་བྱས།

25ཁོས་ལས་གྲོགས་དེ་དག་དང་དངུལ་མགར་གཞན་རྣམས་བསྡུས་ཏེ་ན༌རེ། གྲོགས་པོ༌རྣམ་པ། བདག་ཅག་ལས་ཀ་འདི་ཁོ་ནར་བརྟེན་ནས་འབྱོར་བ་རྒྱས་པ་ཁྱོད་རྣམས་ཀྱིས་ཤེས༌པ་ཡིན།

26ཕོལ་ལོལ་གྱིས་ཨེ་ཕེ་སི་ལས༌གཞན། ད་དུང་ཨེ་ཞི་ཡཱ་ཡུལ་གྱི་སྐྱེ་བོ་ཕལ་མོ་ཆེ་ནས་མིའི་ལག་པས་བཟོས་པ་དེ་དག་ལྷ་ནི་མ་ཡིན་ཞེས་སྨྲས་ཤིང་མི་མང་པོར་བསླུ་བྲིད་བྱས་པ་ཁྱོད་ཅག་གིས་ཀྱང་མཐོང་ཐོས་སུ་མྱོང༌ངོ་།།

27དེ་ལྟར་བྱས་ན་བདག་ཅག་གི་ལས་ཀ་འདིར་མི་གཞན་རྣམས་ཀྱིས་མཐོང་ཆུང་བྱེད་སྲིད་པར་མ༌ཟད། ལྷ་མོ་ཆེན་མོ་ཨར་ཏེ་མེའི་མཆོད་ཁང་ཡང་སྣང་མེད་དུ་འཇོག་སྲིད༌ཅིང༌། ཨེ་ཞི་ཡཱ་ཡུལ་དང་བཅས་པའི་འཇིག་རྟེན་གྱི་མི་ཐམས་ཅད་ཀྱིས་བསྙེན་བཀུར་བྱེད་པའི་ལྷ་མོ་ཆེན་མོའི་གཟི་བརྗིད་ཀྱང་ཉམས་པར་འགྱུར་ཞེས་སྨྲས་པ༌དང༌།

28མི་རྣམས་ཀྱིས་གཏམ་དེ་ཐོས་པ་དང་ཤིན་ཏུ་ཁྲོས་ཏེ་སྐད་ཆེན༌པོས། ཀྱེ། ཨེ་ཕེ་སི་ཞེས་པའི་ལྷ་མོ་ཨར་ཏེ་མེ་མཆོག་ཏུ་གྱུར་པ་ཡིན་ཞེས་འུར་བརྒྱབ་བོ།།

29དེ་ལྟར་གྲོང་ཁྱེར་ཡོངས་ལ་ཟིང་ཆ་ལངས་པ༌དང༌། མི་དེ་རྣམས་ཀྱིས་ཕོལ་ལོལ་གྱི་ལམ་གྲོགས་ཏེ་མ་ཀེ་དོན་ཡཱ་ཡུལ་གྱི་ཀེ་ཡུ་དང་ཨ་རི་སྟར་ཀུ་གཉིས་བཟུང་ནས་ཟློས་གར་ཚོགས་རའི་ནང་མཉམ་དུ་བཙན་གྱིས་ཁྲིད།

30ཕོལ་ལོལ་ཡང་མི་དེ་རྣམས་ཀྱི་ཁྲོད་དུ་འགྲོ་བསམས་ཀྱང་རྗེས་འབྲང་པ་རྣམས་ཀྱིས་ཁོང་ཉིད་འགྲོ་རུ་མ་བཅུག་གོ།

31ཕོལ་ལོལ་གྱི་གྲོགས་པོ་ཨེ་ཞི་ཡཱ་ཡུལ་གྱི་ས་གནས་དཔོན་པོ་ཁ་ཤས་ཀྱིས་ཀྱང་མི་མངགས་ཏེ་ཁོང་ཉིད་ཟློས་གར་ཚོགས་རར་མི་འགྲོ་བར་ནན་གྱིས་བསྐུལ་བ་རེད།

32དེ་ནས་ཚོགས་ར་དེར་འདུས་པའི་མི་དེ་རྣམས་ཟང་ཟིང་ལང་ལོང་དུ་གྱུར༌པས། མི་མང་ཤོས་ཀྱིས་ཅིའི་ཕྱིར་འདུས་པ་མ་ཤེས་པར་ཅི་བཤད་འདི་བཤད་མེད་པར་སྐད་ཅོར་བརྒྱབ་བོ།།

33ཡ་ཧུ་དཱ་པ་རྣམས་ཀྱིས་ཨ་ལིག་སན་དིར་ཞེས་པ་མདུན་དུ་གཏད༌ཅིང༌། མི་ཚོགས་ལས་འགའ་ཞིག་གིས་ཀྱང་ཁོ་རང་ལ་ངན་སྐུལ་བྱས་པས། ཨ་ལིག་སན་དིར་གྱིས་མི་ཚོགས་ལ་དག་འབུད་བྱེད་པར་ལག་བརྡ་བྱས༌ནའང༌།

34མི་དེ་རྣམས་ཀྱིས་ཁོ་རང་ཡ་ཧུ་དཱ་པ་ཡིན་པ་ཤེས་ནས་ཚང་མས་མགྲིན་གཅིག༌ཏུ། ཀྱེ། ཨེ་ཕེ་སི་ཡི་ལྷ་མོ་ཨར་ཏེ་མེ་མཆོག་ཏུ་གྱུར་པ་ཡིན་ཞེས་ཆུ་ཚོད་གཉིས་ཙམ་རིང་ལ་འུར་བརྒྱབ་བོ།།

35དེ་ནས་གྲོང་ཁྱེར་དེའི་དྲུང་ཡིག་པས་མི་དེ་རྣམས་ཁ་རོག་ལ་སྡོད་དུ་བཅུག་སྟེ་འདི་ལྟར། ཀྱེ། ཨེ་ཕེ་སི་པ༌རྣམས། ཨེ་ཕེ་སི་ནི་ལྷ་མོ་ཆེན་མོ་ཨར་ཏེ་མེའི་མཆོད་ཁང་དང་ནམ་མཁའ་ནས་ལྷུང་བའི་ཨར་ཏེ་མེའི་ལྷ་སྐུ་སྲུང་མཁན་ཡིན་པ་སུས་མི་ཤེས༌སམ།

36དོན་དེ་སུས་ཀྱང་བཟློག་ཐབས་མེད་པས་ཁྱོད་རྣམས་ལྷོད་འཇགས་སུ་སྡོད་པ་ལས་ཧོལ་རྒྱུག་བྱ་མི་རུང༌།

37ཁྱོད་ཅག་གིས་འདིར་བཙན་ཁྲིད་བྱས་པའི་མི་འདི་རྣམས་ཀྱིས་མཆོད་ཁང་ནས་དངོས་རྫས་མ་བརྐུས་ལ་བདག་ཅག་གི་ལྷ་མོར་སྐུར་བའང་མ་བཏབ།

38གལ༌ཏེ། ཏི་མེ་ཏྲེ་དང་ཁོའི་ལས་གྲོགས་རྣམས་ལ་གཏུག་བཤེར་བྱེད་པའི་དོན་ཡོད༌ན། ཁྲིམས་ར་དང་ཁྲིམས་དཔོན་རྣམས་ཀྱང་ཡོད་པས་ཕན་ཚུན་གཏུག་རེས་བྱས་ཆོག

39གལ༌ཏེ། ཁྱོད་རྣམས་ལ་དོན་གཞན་ཡོད༌ན། རྒྱུན་སྲོལ་ལྟར་ཁྲིམས་རར་འདུས་ནས་ཐག་གཅོད་བྱ༌དགོས།

40དེ་རིང་གི་ཟིང་ཆ་འདི་ལ་རྒྱུ་རྐྱེན་ཅི་ཡང་མེད་པས་ངེད་ཅག་ལའང་གོང་རིམ་གྱིས་འདྲི་གཅོད་བྱེད་ཉེན༌ཆེ། མི་ཚོགས་འདུས་པའི་ཟིང་ཆ་འདིར་ངེད་ཅག་ལའང་རྒྱུ་མཚན་བཤད་རྒྱུ་མེད་ཅེས་སྨྲས་པ༌དང༌།

41མི་དེ་རྣམས་སོ་སོར་གྱེས་སུ་བཅུག༌གོ།

← Chapter 18 Jump to: Chapter 20 →