Song of Solomon 2

Tibetian NTB (བོད་འགྱུར་གསར་མ།)

← Chapter 1 Jump to: Chapter 3 →

1ང་ནི་ཤཱ་རོན་ཡུལ་གྱི་རྒྱ་སེ་དང་། ། ལུང་པའི་ནང་གི་མེ་ཏོག་ཀུ་མུད་ཡིན། །

2ཚེར་མའི་ཁྲོད་ཀྱི་མེ་ཏོག་ཀུ་མུད་ལྟར། ། ང་ཡི་སྙིང་སྡུག་བུ་མོ་ཀུན་ལས་མཆོག །

3ནགས་ལ་སྐྱེས་པའི་ཀུ་ཤུ་ཤིང་བཞིན་དུ། ། ང་ཡི་དགའ་གྲོགས་སྐྱེས་པའི་ཁྲོད་དུ་ཡོད། ། བདག་ནི་དགའ་ཞིང་ཁོང་གི་གྲིབ་བསིལ་འོག ། བསྡད་དེ་ཁོང་གི་ཤིང་ཏོག་མངར་མོར་རོལ། །

4ཁོང་གིས་བདག་ནི་གསོལ་སྟོན་ཁང་ལ་ཁྲིད། ། ང་ཡི་སྟེང་དུ་བརྩེ་བའི་དར་ཆ་བསྒྲེངས། །

5བདག་ནི་དུངས་སེམས་དབང་གིས་རབ་གདུངས་པས། ། རྒུན་འབྲུམ་སྐམ་པོས་བདག་ལ་སྟོབས་བཅུག་ནས། ། ཀུ་ཤུས་བདག་གི་སེམས་ལ་བདེ་བ་སྩོལ། །

6ཁོང་ཕྱག་གཡོན་པས་བདག་གི་མགོ་བོ་སྐྱོར། ། ཁོང་ཕྱག་གཡས་པས་བདག་གི་ལུས་ཡོངས་འཁྱུད། །

7ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། ང་ཡི་དགའ་གྲོགས་དགྱེས་ཏེ་མ་བཞེངས་བར། ། ཁྱེད་ཚོས་ཁོང་ཉིད་མནལ་ལས་མི་སློང་ཕྱིར། ། བདག་གིས་དགོ་དང་ཐང་གི་ཡུ་མོ་གཉིས། ། དཔང་དུ་བཙུགས་ནས་ཁྱེད་ཚོར་མནའ་འགེལ་ལོ། །

8ང་ཡི་དགའ་གྲོགས་གསུང་སྐད་ལ་ཉོན་དང་། ། ཁོང་ཉིད་རི་དང་ལ་ལུང་བརྒལ་ནས་ནི། ། ཚུར་རོལ་འབྱོན་བཞིན་པ་ལ་ལྟོས་ཤིག་ཀྱེ། །

9ང་ཡི་དགའ་གྲོགས་དགོ་དང་ཤྭ་ཕྲུག་འདྲ། ། ལྟོས་ཤིག་ཁོང་ནི་ངེད་ཀྱི་རྩིག་འདབས་སླེབས། ། དཀར་ཁུང་ནང་དུ་བདག་ལ་གཟིགས་པ་དང་། ཤིང་དྲའི་བར་ནས་བདག་ལ་ནན་གྱིས་ལྟ། །

10ང་ཡི་དགའ་གྲོགས་བདག་ལ་འདི་སྐད་གསུངས། ། ང་ཡི་སྙིང་སྡུག་བཟང་པོ་བཞིན་བཟང་མ། ། ཡར་ལ་བཞེངས་ཏེ་བདག་དང་མཉམ་དུ་འགྲོ། །

11ཅི་ལ་ཟེར་ན་དགུན་དུས་རྫོགས་ཟིན་ལ། ། ཆར་གྱི་དུས་ཀྱང་འདས་ནས་སོང་ཟིན་ཏོ། །

12ས་གཞི་ཡོངས་སུ་མེ་ཏོག་རྣམ་པར་བཀྲ། ། བྱིའུས་གསུང་སྙན་སྒྲོག་པའི་དུས་ལ་བབས། ། ང་ཚོའི་ཡུལ་དུ་ཐི་བའི་གསུང་སྐད་ཐོས། །

13སེ་ཡབ་ཤིང་གི་ཤིང་ཏོག་རིམ་གྱིས་སྨིན། ། རྒུན་འབྲུམ་མེ་ཏོག་དྲི་ཞིམ་ཕྱོགས་བཞིར་འཐུལ། ། ང་ཡི་སྙིང་སྡུག་ང་ཡི་བཞིན་བཟང་མ། ། ཡར་ལ་བཞེངས་ཏེ་ང་དང་མཉམ་དུ་འགྲོ། །

14ཀྱེ་ཀྱེ་ང་ཡི་ཕུག་རོན་ཁྱེད་རང་ནི། ། བྲག་སྲུབ་རི་གཟར་ཕུག་ཏུ་ཡིབ་སྡོད་དེ། ། ཁྱེད་ཀྱི་ཞལ་རས་ང་ལ་སྟོན་པར་མཛོད། ། ཁྱེད་ཀྱི་གསུང་སྐད་ང་ལ་ཐོས་འཇུག་རོགས། ། ཅི་ལ་ཟེར་ན་ཁྱེད་ཀྱི་གསུང་སྐད་སྙན། ། ཁྱེད་ཀྱི་ཞལ་རས་མཛེས་ཤིང་ལྟ་ན་སྡུག །

15ང་ཚོའི་རྒུན་འབྲུམ་ཤིང་ལ་མེ་ཏོག་བཞད། ། དེ་བས་ཁྱེད་ཀྱིས་རྒུན་ཚལ་བརླག་པ་ཡི། ། ཝ་མོ་ཝ་ཕྲུག་ང་ཚོའི་དོན་དུ་འཛིན། །

16ང་ཡི་དགའ་གྲོགས་ང་ལ་དབང་བ་ལྟར། ། ང་ཡི་ཡོད་ཚད་ཁོང་ལ་དབང་བ་ཡིན། ། ཁོང་གིས་ཀུ་མུད་གསེབ་ནས་ལུག་ཁྱུ་འཚོ། །

17ཉི་མ་ནུབ་ནས་བསིལ་རླུང་ལྡང་དུས་སུ། ། ཁྱེད་ནི་དགོ་བ་དང་ནི་ཤྭ་ཕྲུག་ལྟར། ། བེ་ཐེར་རི་ནས་ལོག་ཤོག་ངའི་དགའ་གྲོགས། །

← Chapter 1 Jump to: Chapter 3 →