Song of Solomon 8

Tibetian NTB (བོད་འགྱུར་གསར་མ།)

← Chapter 7 Jump to:

1ཁྱེད་ནི་ང་དང་མ་གཅིག་ཅིང་། ། ཁོང་མོའི་ནུ་མ་ནུས་པ་ཡི། ། མིང་པོ་ཡིན་ན་ཅི་མ་རུང་། ། དེ་ནས་ང་དང་ཁྱེད་གཉིས་ནི། ། ཕྱི་རུ་འཕྲད་དུས་ཁ་སྐྱེལ་ཡང་། ། སུས་ཀྱང་མཐོང་ཆུང་བྱེད་མི་འགྱུར། །

2དེ་ནས་ང་ཡིས་ཁྱེད་ཁྲིད་དེ། ། མ་ཡི་ཁང་པར་གདན་འདྲེན་བྱ། ། ཁོང་མོས་ང་ལ་ཞལ་ཏ་གནང་། ། བདག་གི་སེ་འབྲུ་ལས་བསྙལ་བའི། ། དྲི་ཞིམ་བདུད་རྩི་ཁྱེད་ལ་འདྲེན། །

3ཁོང་ཕྱག་གཡོན་པས་བདག་གི་མགོ་བོ་སྐྱོར། ། ཁོང་ཕྱག་གཡས་པས་བདག་གི་ལུས་ཡོངས་འཁྱུད། །

4ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། ང་ཡི་དགའ་གྲོགས་དགྱེས་ཏེ་མ་བཞེངས་བར། ། ཁྱེད་ཚོས་ཁོང་ཉིད་མནལ་ལས་མི་སློང་རོགས། །

5དབེན་སྟོང་ཡུལ་ནས་དགའ་གྲོགས་ལ་བསྙེས་ཏེ། ། ཡར་ལ་བྱོན་པ་དེ་ནི་སུ་ཡིན་ལགས། ། བདག་གིས་ཀུ་ཤུ་ཤིང་གི་འོག་ཏུ་ནི། ། ཁྱེད་རང་གཉིད་ལས་སད་དུ་བཅུག་པ་དང་། ། གནས་དེར་ཁྱེད་ཀྱི་ཡུམ་ལ་ཁྱེད་བལྟམས་ནས། ། ཁྱེད་ཀྱི་ཆེད་དུ་སྡུག་བསྔལ་གང་མང་མྱངས། །

6རྟགས་ཐམ་བཞིན་དུ་བདག་ཁྱེད་སེམས་ལ་ཟུངས། ། ཐེལ་ཙེ་བཞིན་དུ་ཕྱག་ངར་འདོགས་པར་མཛོད། ། དུངས་སེམས་འཆི་བ་ལྟར་དུ་སྟོབས་ཤུགས་ཆེ། ། ཕྲག་དོག་གཤིན་ཡུལ་ནང་བཞིན་རྩུབ་པོ་ཡིན། ། དེ་ནི་མེ་དཔུང་དྲག་པོའི་མེ་ལྕེ་ཡིན། ། དེ་ནི་ཡ་ཝཱེའི་མེ་དཔུང་དྲག་པོ་ཡིན། །

7ཆུ་བོ་མང་པོས་དུངས་སེམས་གསོད་མི་ནུས། ། གཙང་པོ་རྣམས་ཀྱིས་དེ་ནི་བསྣུབ་མི་ཐུབ། ། སུ་ཡིས་རང་གི་རྒྱུ་ནོར་ཀུན་བཏང་ནས། ། དུངས་སེམས་ཉོ་བར་འདོད་ན་སྨད་པའི་གནས། །

8ངེད་ཅག་རྣམས་ལ་སྲིང་མོ་ཞིག་ཡོད་དེ། ། ཁོ་མོར་ད་དུང་ལང་ཚོ་དར་མེད་པས། ། མི་ཞིག་བག་མར་སློང་དུ་འོང་དུས་སུ། ། ང་ཚོས་ཁོ་མོའི་དོན་དུ་གཏམ་ཅི་སྨྲ། །

9ཇི་སྟེ་མོ་ནི་ལྕགས་རི་ཞིག་ཡིན་ན། ། ངེད་ཀྱིས་ཐོག་ཏུ་དངུལ་གྱི་ལྕོག་མཁར་བརྩིག ། ཇི་སྟེ་མོ་ནི་སྒོ་ཞིག་ཡིན་པའི་ཚེ། ། ཐང་ཤིང་སྤང་ལེབ་ཀྱིས་ནི་བསྲུང་བར་བྱ། །

10ང་ནི་ལྕགས་རི་ཡིན་པ་དང་། ནུ་མ་ཟུང་ནི་ལྕོག་མཁར་འདྲ། ། ཁོང་གི་སྤྱན་དྲུང་ང་རང་ནི། ། བདེ་ལ་བབས་པའི་མི་བཞིན་ཡིན། །

11སོ་ལོ་མོན་ལ་པཱ་ཨལ་ཧ་མོན་དུ། ། རྒུན་འབྲུམ་ར་བ་ཞིག་ནི་ཡོད་པ་དང་། ། ཁོང་གིས་རྒུན་ཚལ་སྲུང་མཁན་དག་ལ་གླས། ། དེ་རྣམས་རེ་རེས་ཐོབ་པའི་ཤིང་ཏོག་ཕྱིར། ། དངུལ་སྲང་ཆིག་སྟོང་ཁོང་ལ་སྤྲོད་དགོས་སོ། །

12བདག་ལ་རྒུན་འབྲུམ་ར་བ་ཞིག་ཡོད་དེ། ། དངུལ་སྲང་ཆིག་སྟོང་སོ་ལོ་མོན་ལ་དབང་། ། ཉིས་བརྒྱ་ཤིང་ཏོག་སྲུང་མཁན་རྣམས་ཀྱི་ཡིན། །

13ཀྱེ་ཀྱེ་སྐྱེད་ཚལ་རྣམས་སུ་བཞུགས་པ་ཁྱེད། ། ཟླ་གྲོགས་རྣམས་ཀྱིས་ཁྱེད་ཀྱི་གསུང་སྐད་ཉན། ། གསུང་སྐད་དེ་ནི་བདག་ལ་ཐོས་པར་མཛོད། །

14ཀྱེ་ཀྱེ་ང་ཡི་དགའ་གྲོགས་ལགས། ། དྲི་ཞིམ་རྩྭ་ཡི་རི་བོ་ལ། ། དགོ་བ་དང་ནི་ཤྭ་ཕྲུག་བཞིན། ། མྱུར་བ་མྱུར་དུ་ཡར་ཕེབས་ཤོག ། །།

← Chapter 7 Jump to: