Numbers 30

Bugis

← Chapter 29 Jump to: Chapter 31 →

1Nabbéréyanni Musa iyaé sining peraturangngé lao risining pamimpinna suku-sukunna bangsa Israélié.

2Rékko séddié tau worowané mattinja iyaré'ga majjanci sibawa mattanro ri yolona Puwangnge, angkanna nasiyoi aléna riséuwaé janci, harusu'i napogau' aga iya najjanciyangngéro, sibawa dé' nawedding massakkarengngi ada-adanna.

3Rékko séddié ana' dara iya monroé ri bolana ambo'na mattinja lao ri Puwangnge, sibawa siyoi aléna riséuwaé janci, na ambo'na dé'é nappotane wettunna naéngkalinga gau'éro, iyaro ana' daraé harusu'i narupai sininna tinja'na sibawa jancinnaro.

5Iyakiya rékko wettunna naéngkalinga gau'éro mappotane'i ambo'na, iyaro ana' daraé dé' natassiyo ri tinja'na sibawa jancinna. Puwangnge matu maddampengengngi, nasaba riyattéyangngi ri ambo'na.

6Rékko séddié makkunrai iya dé'éppa nakawing mattinja iyaré'ga siyoi aléna riséuwaé janci, natimbaggi lebbi riyolo iyaré'ga makkuwamiro bawang, tassiyoi ri tinja'na iyaré'ga ri jancinnaro. Rékko ri munri kawingngi, tette'i tassiyo ri tinja'na sibawa jancinnaro, assaleng dé' nappotane lakkainna wettunna naéngkalinga passalenna gau'éro.

8Iyakiya rékko wettuna naéngkalinga riyattéyangngi ri lakkainna, dé'na natassiyo ri tinja sibawa jancinna. Puwangnge maddampengengngi matu.

9Rékko séddié janda iyaré'ga makkunrai iya ritelle'énna mattinja iyaré'ga majjanci iya siyoéngngi aléna, tassiyoi ritinja'na iyaré'ga janciéro sibawa harusu'i narupai.

10Rékko séddié makkunrai iya kawingngénna mattinja'i iyaré'ga majjanciwi iya siyoéngngi aléna,

11harusu'i narupai sininna iya najjanciyangngéro, assaleng dé' nappotane lakkainna wettunna naéngkalinga gau'éro.

12Iyakiya rékko wettunna naéngkalinga iyaro gau'é riyattéyangngi ri lakkainna, iyaro makkunraié dé'na natassiyo ri tinja'na iyaré'ga jancinna. Puwangnge maddampengengngi matu, nasaba riyattéyangngi ri lakkainna.

13Mappunnaiwi ha' lakkaié untu' situjuiwi iyaré'ga sampéyangngi tungke' tinja iyaré'ga janci iya naébbué bainéna.

14Iyakiya rékko wettunna naéngkalinga iyaro gau'é dé' nappotane lakkainna, iyaro makkunraié harusu'i narupai sininna tinja'na iyaré'ga jancinna. Nasitujuiwi lakkainna iyaro tinja'é iyaré'ga jancié nasaba dé' nappotane wettunna naéngkalinga.

15Rékko ri munri iyaro lakkainna dé' nasitujuiwi tinja'na iyaré'ga jancinna bainéna, lakkainna ritu harusu tanggungngi addimonrinna passampéyannaro.

16Iyanaro sining peraturang iya nabbéréyangngé Puwangnge lao ri Musa passalenna tinja'é sibawa jancié iya naébbué séddié ana' dara iya monroé ri bolana ambo'na, iyaré'ga séddié makkunrai iya kawingngénna.

← Chapter 29 Jump to: Chapter 31 →