1 John 1

Chin (Mara Bible RV (BSI))

Jump to: Chapter 2 →

1Hrona bie, âthaona liata a ypa, eima nah ta thei pi ta, eima mo ta eima hmôpa, moh thlâh ha pi ta, eima ku ta eima hriapa thâtih cha he he a châ.

2Hrona cha a vaw luah ta, hmô pi ta, eima pahnokhei. Cha chhâzaw hrona, Paw hnohta a ypa cha eima hnohta a vaw luah ta, cha thâtih cha nama hnohta eima phuah.

3Nâmo chhao ta miah namâ kao thei hra nawpa ta, eima hmôpa nata eima theipa cha nama hnohta eima phuah. Eimâ kaona cha Paw nata a Sawchapawpa Zisu Krista liata a châ.

4Eimâ lyna â ki thei nawpa ta, he biezy he eima roh.

5He he ano tawhta bietapa eima theipa nata nama hnohta eima phuahpa cha a châ: Khazohpa cha khaihna châ ta, ano liata zohna rai y vei.

6Zohna liata y thlâh ha tlôhpa ta ano ei kao eima tah khiahta cha, haipa bie eima reih, biehmeiseihpa liata hroh ma pi.

7Khaihna liata eima y khiahta deikua cha, ano cha khaihna liata a ypa hawhta, a kao raihrie thei pi ta, a Sawchapawpa Zisu thisaih ta eima moleina zydua tawhta miah a pathaisa tyh.

8Moleina hnei ma pi eima tah khiahta cha, keimosasyh ta eimâ dô, biehmeiseihpa keimo liata y vei.

9Eima moleinazy palâhâh sih la, reihpha eima chei khiahta cha, eima moleinazy a ngiahthai awpa nata eima sialeina zydua pasia awpa ta, ano cha ngâchhihpa nata a siapa a châ.

10Molei ma pi eima tah khiahta cha, ano cha a haihpa ta tao pi ta, a bie keimo liata y vei.

Jump to: Chapter 2 →