1 John 4

Chin (Mara Bible RV (BSI))

← Chapter 3 Jump to: Chapter 5 →

1Kho ngaitapa saih u, thlahpa momaih zo khuh vy. Hrohso pakheipa hluhpi khizaw liata ama vaw pua hapa vâta, thlahpazy cha Khazohpa tawhta a châ ma, châ vei ma tahpa pasia tyh muh vy.

2He liana heta Khazohpa Thlahpa cha nama pahno aw: Zisu Krista cha sapa ta â vy tahpa a châkheipa thlahpa maih cha, Khazohpa tawhta châ ta,

3Zisu a châhkhei leipa thlahpa maih cha Khazohpa tawhta châ vei. Cha cha Krista dyuhtuhpa thlahpa, a vy awpa nama theipa nata tahmâ chhao khizaw liata a y hapa he a châ.

4Sawzy saih u, nâmo la, Khazohpa tawhtapa châ ei chi ta, nâmo liata a ypa cha khizaw liata a ypa hlâta a rônah viapa vâta, chazy cha nama tiah haw.

5Âmo cha khizaw tawhtapa châ ei ta, chavâta khizaw saizie ta bie reih ei ta, khizaw ta ama bie a nathlie.

6Keimo cha Khazohpa tawhtapa châ pi ta, Khazohpa a pahnopa maihta eima bie nathlie ei ta, Khazohpa tawhtapa a châ leipazy deikua cha, eima bie nathlie veih ei. Cha liana chata Thlahpa dopa nata thlahpa doleipa eima pahno.

7Kho ngaitapa saih u, kyh a pachâ raihrie ei suh u. Kyhpachâna cha Khazohpa tawhta a puapa châ ta, kyhpachâna a hneipa maih Khazohpa sapa châ ei ta, Khazohpa a pahnopa ama châ.

8Khazohpa cha kyhpachâna châ tlôh ta, kyhpachâna a hnei leipa cha Khazohpa pahno vei.

9Ano vâta eima hroh thei nawpa ta, Khazohpa ta a Sawchapaw matlupa khizaw lâ a vaw tuapa liana heta, Khazohpa kyhpachâna cha eima hry liata palâsapa ta a y.

10He he kyhpachâna cha a châ: Keimo ta Khazohpa kyh eima pachâpa vâta châ leipa ta, ano ta kyh miah pachâ ta, eima moleinazy reihpha chei nawpa ta a Sawchapawpa a vaw tuapa hih.

11Kho ngaitapa saih u, Khazohpa ta cha tlatlu ta kyh miah a pachâ khiahta cha, keimo chhao kyh eimâ pachâ raihrie awpa a châ.

12Ahy hmahta Khazohpa hmô beih veih ei. Kyh eimâ pachâ raihrie khiahta cha, Khazohpa cha keimo liata pahrâ aw ta, a kyhpachâna cha keimo liata pakipa ta a y aw.

13A Thlahpa miah a piepa liana heta, ano liata y pi ta, ano chhao keimo liata a y tahpa eima pahno.

14Chatanachata Paw ta a Sawchapawpa cha khizaw Pachhatuhpa châ awpa ta a vaw tuah tahpa hmô pi ta, eimâ duakhei.

15Ahy rai Zisu cha Khazohpa Sawchapawpa a châ tahpa a châkheipa maih cha, ano liata Khazohpa y thlâh ha ta, ano chhao Khazohpa liata a y thlâh ha hra.

16Chatanachata Khazohpa ta kyh miah a pachâ tahpa pahno pi ta, eimâ ngiapâ. Khazohpa cha kyhpachâna a châ. Chavâta kyhpachâna liata a ypa cha Khazohpa liata a ypa châ ta, Khazohpa chhao ano liata a y.

17Cha hawhna chata kyhpachâna cha keimo liata pakipa ta y ta, he khizaw liata ano lyupa ta eima ypa vâta, ryureina noh châta thlalôhna eima hnei thei haw.

18Kyhpachâna liata la china rai y vei. Kyhpachâna pakipa ta china a papai tyh. Hriena a ypa vâta china y ta, china a hnei thlâh chypazy cha, kyhpachâna liata pakipa ta y mâh veih ei.

19Ano ta kyh miah a pachâ tuapa vâta a kyh eima pachâ hra.

20Chyhsa ta, “Khazohpa kyh ei pachâ,” tah sala, a unawhpa â hao tlôh khiahta cha, a haihpa a châ. A unawhpa a hmô thlâh hapa hmahta kyh a pachâ vei khiahta cha, a hmô leipa Khazohpa chhochhi cha kheihta ma kyh a pachâ thei aw?

21He biepiepa he Khazohpa tawhta eima daopa a châ: Khazohpa kyh a pachâpa cha, a unawhpa chhao kyhpachâ hra mawh sy.

← Chapter 3 Jump to: Chapter 5 →