1 Peter 4

Chin (Mara Bible RV (BSI))

← Chapter 3 Jump to: Chapter 5 →

1Krista cha sapa ta pasa a taopa a châpa vâta, nâmo chhao, cha hawhpa pachâna chata a tobi hra teh u. Sapa ta pasa a tao hapa cha moleina a bâhsaipa a châ.

2Chatanachata sapa ta nama hro chhôh zydua chyhsapa aohraohnazy liata hroh khao leipa aw ei chi ta, Khazohpa khozie hawhta nama hroh thei aw.

3Zenitaizy khopa taopa ta, parâna, aohraohna, paripangana, a hlao ta apatlana, sahma do pahmaohna nata nothlahpa achhyna pasichhihpa zy liata nama vaw tlaih tyhpa kha â daih ha bâ.

4Cha kyh liata phasa ngaitapa ta ama y tyhpa liata namâ hlao khao leipa ama noâh kaw ta, ama cha reipachhie tyh.

5Ahrohpa nata athihpa pachia awpa ta a mâ chiehpa ta a y thlâh hapa hnohta ama thâtih âmo tlai ta amâ reih aw.

6Cha vâna chata athihpa hnoh chhao ta thâtihpha chhopa a châ. Sapa ta a ypa chyhsazy hawhta pachiapa ama châpa chhao ta, Khazohpa hawhta thlahpa ta ama hroh ha aw.

7Hmo zydua chhâna â hnia haw. Chavâta thlah nama chhâ thei nawpa ta palôh pasohpa nata a sohsi ngaitapa ta y teh u.

8Kyhpachâna ta moleina hluhpi khu ta, chavâta ato zydua hlâta kyhpachâna pachâ peimawh viapa ta, palôh hmeiseihpa ta kyh khâ a pachâ teh u.

9A pasô raihrie u la, paphôh khuh vy.

10Chyhsa to hmopiepa to chyu ei chi ta, Khazohpa ngiachhiena nanopa nama topazy a châpa pahnopa ta, hmopiepa nama topazy cha a chakao raihrie nawpa châta hmâh teh u.

11Ahy rai bie a reihpa maih Khazohpa bie hawhta reih sala, a chakaopa maih Khazohpa ta thatlôna a piepa lymâ hawhta chakao mawh sy. Chatanachata Zisu Krista vâta Khazohpa cha kyh to liata palyupalihpa ta a y thei aw. Rônahna nata hmotaotheina cha chhâzaw nata tlyzaw ta ano eih châ tlôh ta. Amen.

12Kho ngaitapa saih u, pasiana ru ngaitapa a tyhpa ta pasa nama tao tita, nama chô liata hmo a tlôpa cha noâh tah khuh vy.

13Krista rônahna â vaw luah tita, thaphapa ta namâ ly thei nawpa ta, Krista pasataona a hlykheituhpazy nama châ.

14Krista moh vâta pasipasawhpa nama châ khiahta cha, rônahna Thlahpa nata Khazohpa Thlahpa cha nama chô liata y ta, chavâta nama nohlao aw.

15Lianycheina vâta tlyma, paruna vâta tlyma, paraona vâta tlyma, hohiahna vâta tlyma deikua cha, nama hry liata ahy hmah pasa tao khah sy.

16Krizyhpa a châpa vâta pasa a taopa cha, a noza leipa sala, Krista moh ta Khazohpa tlao palyupalih mawh sy.

17Pachiana cha Khazohpa chhôhkhazy liata pathao a daih ha ta, keimo lia hmahta pachiana a pathao khiahta cha, Khazohpa thâtihpha bie a zyh leipazy chhâna awpa chhochhi cha kheihta ma a châ aw tly?

18“Mosiapa hmahta pachha lyliapa a châ khiahta cha, Khazohpa a uasa leipa nata moleipa chhochhi cha, Kheihta rimâ ma ama châ aw tly?”

19Chavâta Khazohpa khozie hawhta pasa a taopazy cha, hmo pha taona chôta, Taotuhpa ngâchhihpa liata ama thlahpa pavaosa mawh ei sy.

← Chapter 3 Jump to: Chapter 5 →