1 Peter 5

Chin (Mara Bible RV (BSI))

← Chapter 4 Jump to:

1Nama hry liata Awnanopa chhituhpazy kha, kei, nama chhituh heihpa, Krista pasa taonazy a pahnotuhpa nata rônahna a vaw luah awpa a to hra awpa heta ei cha pasyu ei.

2Nama hry liata Khazohpa mietaku zaw kha vaih u la, mohôh teh u. Tao awpa a châpa vâta tao leipa ta, Khazohpa bie hawhta byuh ngaitapa ta taopa châ mawh sy. Avyuhna puapa khopa vâta châ leipa sala, chakaona rai hria khohpa vâta châ mawh sy.

3Nama mohôhpa mietakuzy chô liata a pabeisa leipa u la, mietaku zaw châta a mopâ tlâhpa ta tlao y muh vy.

4Chatanachata Mietaku Vaituhpa Beichaipa â vaw luah tita, rônahna beilakho rao thei leipa nama hmô aw.

5Cha hawhna chata nâmo, hawti viapazy saih u, uhthei viapazy liata a ngiarih teh u. Nama zydua ta areisina chysia ta a tobi u la, a chakao raihrie teh u. “Khazohpa ta apalaipazy a dyuh ta, areisipazy deikua cha a ngiachhie tyh.”

6Chavâta Khazohpa ku thatlôpa ry liata a panawh teh u. Chatanachata a daihtita liata a cha palyupalih aw ei.

7Khazohpa ta cha pachâ ngaita ei ta, chavâta nama nôpona zydua a chô liata pahnieh teh u.

8Palôh pasohpa ta y u la, a hrohrua teh u. Nama khakhaipa ahripa cha chakeibarôhneipa a rôhpa hawhta a rôh ta, a nie thei awpa tluapa ta â khie tyh.

9Khizaw zydua liata nama unawhzy chô liata chhao, cha hawhta pasataona cha a tlô hra tahpa pahnopa ta, ngiapâna liata â ipa ta y u la, ahripa a dyuh teh u.

10Ngiachhiena zydua Khazohpa, a chhâzaw rônahna to awpa ta Krista liata châ awtuhpa ei chata, bohpi leipa pasa nama tao khai tawhta, cha paduapathi aw ei ta, cha pa-ipa ta tha cha patlô aw ei ta, a cha padua aw ei.

11Hmotaotheina cha a hnohta chhâzaw nata tlyzaw ta y mawh sy. Amen.

12Unawh ngâchhihpa ta ei pachâpa Silvanâ baona ta nâmo lâ pasyuna châ chyuta vaw roh na ta, cha cha Khazohpa ngiachhiena hmeiseihpa a châ tahpa ei reih. Cha liana chata â ipa ta a duah muh vy.

13Babylaw khih liata a ypa, nâmo hawhta atlyhpa chanô ta a châ naoh ei. Cha hawhna chata ei sawchapawpa Mâka chhao ta a châ naoh ei.

14Kyhpachâna ta a pahnâpa ta a naoh raihrie teh u. Krista liata a ypa nama zydua hnohta thlalôhna y mawh sy.

← Chapter 4 Jump to: