1 Samuel 1

Chin (Mara Bible RV (BSI))

Jump to: Chapter 2 →

1Epharai tlâh râh Râmâthaizôphi khih liata chyhsa pakha a moh Elkânâ ama tahpa y ta. Cha chyhsa cha Zerôhâ sawchapawpa châ ta, Zerôhâ cha Elihu sawchapawpa châ ta, Elihu cha Tôhu sawchapawpa châ ta, Tôhu cha Epharai chi Zupha sawchapawpa a châ.

2Elkânâ cha lapinô pano hnei ta, pakha cha Hânâ châ ta, ahropa moh cha Peninâ a châ. Peninâ cha sawzy hnei ta, Hânâ deikua cha saw hnei leipa ta.

3Cha chyhsa cha Pheisaihzy Abeipa a chhy awpa nata atheihna hlâ awpa ta ano khih tawhta Silô khih lâ kô chareih ta sie tyh ta. Eli sawchapawpa pano Hôphani nata Phinehâ zy cha Silô khih liata Abeipa theihthaipazy châ ei ta.

4Atheihna a hlâ noh liata, Elkânâ ta a lapinô Peninâ nata a sawchapaw nata a sawchanô zydua cha sa vyuh kha chyu pie tyh ta.

5Hânâ deikua cha, Abeipa ta a chhi a khaw hapa chhao ta, a kyh a pachâ ngaitapa vâta, vyuh no a pie tyh.

6Hânâ cha Abeipa ta a chhi a khaw hapa vâta, Elkânâ lapinô hropa ta ano cha pasipasawhpa ta a hmia thata pachhie tyh ta.

7Cha hawhna chata kô chareih tao ngâ thlâh ha tyh ta. Abeipa o lâ a khyna maih liata a pachâ a parôhsa ngaita tyh. Chavâta Hânâ cha thata cha tyh ta, pati chhao nie thei khao tyh vei.

8A vahpa Elkânâ ta a hnohta, “Hânâ, khazia na cha? Khazia pati na nie vei? Khazia na palôh a pasa? Sawchapaw pahrawh hlâta na châta pha via va na mâ?” tah ta.

9Silô khih liata pati niepa ta kresawhti ama do khai nahta, Hânâ cha thyu ta. Theihthaipa Eli cha Abeipa Achhyna o chhikao tôh thaby liata dyuchhai liata a vaw tyuh thlâh ha ta.

10Hânâ cha a palôh pasa ngaita ta, Abeipa lâta thlahchhâ ta, thata cha ta.

11Abeipa lâta bietai miakha tao ta, a hnohta, “Hy Pheisaihzy Abeipa, na seichanô taopasazie he hmôpa ta, na seichanô he my leipa la, nâ theipa ta, na seichanô he sawchapaw eina pie khiah chi ta la, a hro chhôh zydua ta Abeipa pie lilaw aw na ta, a luh ngyupa châ aw vei,” tah ta.

12Abeipa hmiakô liata thlah a chhâ pazao ngâ nota, Eli ta Hânâ pakah cha moh thlâh ha ta.

13Hânâ cha a palôh ta bie reih ta, a hmao deita papie ta, a ao theipa a châ leipa vâta, Eli ta sahma a paripa chanô khiah ma tah ta.

14Eli ta a hnohta, “Khachâ ma paripa ta na y aw? Na kresawhti kha soh bâ teh,” tah ta.

15Hânâ ta, “Ei zibeipa y, pari va na, a thlahpa nô a popa chanô na ei châ. Kresawhti tlyma, sahma tlyma doh va na, Abeipa hmiakô liata ei hro ei palâhâhpa tlao a châ.

16Na seichanô he chanô moleipa hawhta rie na pachâ khah y, ei nôpona nata ei pachârôh ngaitanazy ei rei papua ngâpa a châ,” tah ta.

17Eli ta, “Thlalôhpa ta sie mah y, Izarei Khazohpa ta ano lâta na hmo hiapa cha cha pie mawh sy,” tah ta.

18Hânâ ta, “Na seichanô he na modypa rie châ mawh sy,” tah ta. Chatawhcha chanô cha sie ta, pati nie ta, a pachârôhna hmia cha pai ha ta.

19Mydi kari ta thyu ei ta, Abeipa amâ chhy khai nahta, Râmâ liata ama o lâ a lie ei ta. Elkânâ ta a lapinô Hânâ cha a zialâh ta. Abeipa ta Hânâ cha a thei thlâh ha ta.

20Hânâ cha saw phaoh ta, a daihti a vaw tlô nahta, sawchapaw sa ta, “ Abeipa ei hiapa a châ hih,” tah ta, a moh Samuela bi ta.

21Cha chyhsa Elkânâ cha, kô chareih ta atheihna hlâ tyhpa Abeipa lâ hlâ awpa nata a bietai patlô awpa ta, a chhôhkha zydua chhaota khy ta.

22Hânâ deikua cha khy hra leipa ta, a vahpa hnohta, “Hawtipa he sâhpi a pathleihpa nahta, a chhi aw na ta, Abeipa hmiakô liata a luah aw ta, cha liata a y ngâ thlâh ha aw,” tah ta.

23A vahpa Elkânâ ta a hnohta, “Pha na tahpa hawhta tao mah y. Sâhpi a pathleihna taih cha hâ chy la, Abeipa ta a bietai cha patlô mawh sy,” tah ta. Chatanachata chanô cha o liata y ta, hawtipa cha sâhpi a pathleihna taihta mohôh ta.

24Sâhpi a pathleih nahta, viahchao tôhpa kô thôhpa nata viahdie kachu hmo kha nata kresawhti ôh kha cheipa ta, hawtipa cha Silô liata Abeipa o lâ khykhei ta. Hawtipa cha hawti kaw chy ta.

25Viahchao tôhpa cha thie ei ta, hawtipa cha Eli lâ a chhi ei ta.

26Hânâ ta, “Hy ei zibeipa! Na hrona reipa ta ei reih. Ei zibeipa y, kei he he su liata na mohmô liata a duah na ta, Abeipa lâta thlah a chhâpa chanô kha ei châ.

27He hawtipa he hiapa ta thlahchhâ na ta, Abeipa ta ano liata ei hiapa cha eina pie haw.

28Chavâta kei chhao ta hawtipa he Abeipa lâ ei hlâ lilaw haw. A hro chhôh zydua châta Abeipa lâ hlâ hapa a châ,” tah ta. Chatanachata hawtipa cha, cha liata Abeipa a chhypa ta y ha ta.

Jump to: Chapter 2 →