1 Timothy 1

Chin (Mara Bible RV (BSI))

Jump to: Chapter 2 →

1Kei, Pawla, Khazohpa miah Pachhatuhpa nata Krista Zisu eima hnabeiseihna biepiepa hawhta Krista Zisu lyuhchâpa ta

2ngiapâna liata ei sawchapaw hmeiseihpa Timawthy ei châ naoh. Paw Khazohpa nata Krista Zisu eima Beipa tawhta ngiachhiena, zawngiahna nata thlalôhna na hnohta y mawh sy.

3Mâsidônia râh lâ ei sie nota, nâ cha Ephesi khih liata châh ta, chyhsa thokhazy hnohta biezyhpa nanopa pachu lei awpa ta biepie awpa ta châ haw na ta.

4Phôhpa nata thyutôna kyh a laichadai tiah leipazy reina liata ngosiah thlâh lei awpa ta biepie awpa ta ei châ haw hra. Cha hawhpa biezy reipa cha ngiapâna kyh liata Khazohpa raihria thapatlôtuhpa châ leipa ta, aeichhiana a taotuhpa tlao a châ.

5Kha hawhta bie eima cha piena chhâpa cha, palôh pathaihpa, chhie nata pha pahnona pathaihpa nata ngiapâna hmeiseihpa tawhta a vaw puapa kyhpachâna ama hnei thei nawpa ta a châ.

6Chyhsa thokha cha, chazy vâta pavia ei ta, hraoleipa biezy reina lâta ama tlei tyh.

7Pahnopasia tlôh leipa ta bie reih ei ta, riahpha kawpa ta bie a duakheipa ta, ryhpa pachutuhpazy châ awpa ama khoh.

8Ryhpa cha, chyhsa ta a phapa ta a hmâh khiahta cha, a pha tahpa eima pahno.

9Ryhpa cha chyhsa dopazy châta taopa châ leipa ta, ryhpa â papeisa leipa nata reingiah leipazy, Khazohpa a pachâ leipa nata moleipazy, pathaih leipa nata zyhna kyh a pachâ leipazy, nô nata paw a thiepazy, lianycheihpazy,

10apatlana moleina a taopazy, chapaw nata chapaw a patlapazy, sei patupa nata zuapa ta sôhpaliepazy, haihthaipazy, haipa ta bie a taihpazy nata biezyhpa dopa a chakhiapa maih châta taopa a châ tahpa pahno teh u.

11Cha ryhpa cha reithai tlâh Khazohpa thâtihpha rônahpa, kei liata pavaosapa nata â hmiepa ta taopa a châ.

12Ngâchhihpa ta na pachâ ta, ano chakao awpa ta na rao ta, thatlôna nâ pietuhpa eima Beipa Krista Zisu hnohta alyna bie ei reih.

13Kha hlâta reipachhietuhpa, taolatuhpa nata pasipasawhtuhpa vaw châ hraw sah la, ngiapâleina vâta pahno leipa ta a taopa ei châpa vâta, zawngiahna ei hmô.

14Chatanachata eima Beipa ngiachhiena cha Krista Zisu liata a ypa ngiapâna nata kyhpachâna chhaota ei chô liata lei thlupa ta a y.

15Krista Zisu cha moleipazy pachha awpa ta khizaw lâta â zu tahpa he, bie ngâchhihpa nata a pyh tlâh ngaitapa a châ. Kei he moleipazy hry liata molei chaipa ei châ hih.

16Châhrasala cha vâna tlai chata zawngiahna hmô na ta, Krista ta keima molei chaipa chô liata a nôphana pakipa palâsa ta, cha cha chhâzaw hrona hmô awpa ta ano a ngiapâpazy châta pamosana a châ.

17Chhâzaw Beipa, thi thei leipa, hmô thei leipa nata Khazohpa a y chhôhpa hnohta chhâzaw nata tlyzaw ta palyupalihna nata rônahna y mawh sy. Amen.

18Ei saw Timawthy y, nâma kyh liata hrohsona bie phuah chhieliepa hawhna khata, adyuhna phapa ta nâ dyuh thei nawpa ta, he biepiepa he na chô liata ei pahnieh.

19Ngiapâna nata chhie nata pha pahnona pathaihpa khâchâ patu mah y. Chyhsa thokha ta chazy cha dytha ei ta, balyh raopa hawhta, amâ ngiapâna ama parao haw.

20Chazy hry liata Humenia nata Alezandâ a hlao ei ta, Khazohpa reipachhiepa a peizie amâ chu thei nawpa ta, Sâtâ hnohta ei hlâ ha ei.

Jump to: Chapter 2 →