1 Timothy 2

Chin (Mara Bible RV (BSI))

← Chapter 1 Jump to: Chapter 3 →

1A hmiatua ta, hmo hiapa thlahchhânazy, thlahchhâna sôpipazy, chyhsa châta thlahchhâna nata alyna bie reina thlahchhânazy chyhsa zydua châta tao awpa ta ei châ haw ei.

2Thlalôhpa nata chhôhmohpa ta ypa ta, Khazohpa a pachâpa nata zachhihpazy eima châ lymâ thei nawpa ta, beizy nata biehneituhpa zydua châta thlahchhâ tyh awpa ta ei châ haw ei.

3Cha cha miah Pachhatuhpa Khazohpa mohmô ta pha ta, â lyzie a châ.

4Khazohpa ta chyhsa zydua pachha ama châ khai awpa nata biehmeiseihpa ama pahno khai awpa a khoh.

5Khazohpa cha pakha deita y ta, Khazohpa nata chyhsazy likah liata lyuhchâpa pakha deita a y. Ano cha chyhsapa ta a pihpa Krista Zisu a châ.

6Krista Zisu cha chyhsa zydua chatlai nawpa ta anosasyh ta a pie ta, a daihtita liata chatlaina bie a phuah haw.

7Cha châna chata biechhotuhpa nata lyuhchâpa ta raopa châ na ta, biehmeiseihpa nata ngiapâna kyh liata Zenitaizy pachutuhpa ta raopa ei châ. Biedopa ei reih, haih va na.

8Chapawzy cha su to liata ku pathaihpa avâ lâ pazawhpa ta, hiehâh leipa nata a eichhia leipa ta thlah ama chhâ tyh awpa ei khoh.

9Cha hawhna chata chanôzy chhao â daihpa rakha ta a tobiepa ta, mongiapa nata zachhihpa ta y ei sala ei khoh. Sâ phiehpa ta tlyma, ngôh ta tlyma, taikulô ta tlyma, chysia mâ rupa ta tlyma a tobi leipa ta,

10Khazohpa a uasapa chanôzy châta a tobi awpa rakhapa ta a tobipa ta, hmo pha taopa ta tlao amâ tobi awpa ei khoh.

11Chanô cha reingiahpa nata a chalihpa ta a chu mawh sy.

12Chanô ta a pachu awpa tlyma, chapaw chô liata bie a hnei awpa tlyma pasaih va na. A chalihpa ta a y awpa tlao a châ.

13Âdâh kha tao tuapa châ ta, cha hnôhlâ ta Evâ kha taopa a châ.

14Âdâh kha dôpa ta y leipa ta, chanô kha dôpa ta y ta, paraona liata a paopa kha a châ.

15Châhrasala ngiapâna nata kyhpachâna nata pathaihna hneipa ta, hrozie ngiapa ta ama hroh khiahta cha, saw sana vâta pachhapa ama châ aw.

← Chapter 1 Jump to: Chapter 3 →