Ecclesiastes 2

Chin (Mara Bible RV (BSI))

← Chapter 1 Jump to: Chapter 3 →

1Ei palôh liata, “Khawh, a vy teh, alyna ta duah ei cha pasia tua aw, a ly kawpa ta y teh,” tah na ta. Châhrasala moh tua u, cha chhao cha hraoleipa a châ.

2Pahneina hnohta, “Hruna a châ,” tah na ta, Alyna hnohta, “Khâpa phahnaina ma a hnei,” ei tah tyh.

3Chyhsa sawzy he hro chhôh noh chyhta ama hnei chhôh ta, avâ ry liata sona hmotaopa ma a pha via, hruna hmotaopa ma, tahpa ei pahno thei nawpa ta, ei palôh cha sona ta pachhihthasa lymâna chôta, ei pôhpa he kresawhti ta palysapa ta hruna patu a chhuah na ta.

4Rai hluhpi hriapa ta, ozy a sa na ta, kre sadôzy ei châta ei tao.

5Sadôzy nata theilâpa thihzy a tao na ta, cha liata theilâpa tho to loh na ta.

6Thody lai haipazy ta a biepa thothihzy a chyh thei awpa ta, tipozy chhao keima châta ei tao.

7Seichapawzy nata seichanôzy chalei na ta, ei o liata a pihpa seizy chhao ei hnei. Viahchao hri hluhpi nata mietaku zaw hluhpi hnei na ta, Zerusale liata a vaw y tuapazy hlâta thata ei hnei hluh via.

8Tâkâ nata ngôh nata abeizy nata râhzy ryusôhpazy pakhy na ta, chapaw nata chanô hlasathaipazy hnei na ta, chyhsa sawchapawzy alyna nôtho hluhpi chhao ei hnei.

9Thata vaw hneirôh na ta, Zerusale liata a vaw pahrâ tuapazy ei ly khai ha ei. Sona chhao ei hnei lymâ.

10Ei mo ta a khopa maih thlyu leipa na ta, ei palôh chhao alyna kheihawhpa liata hmahta pakysa va na. Ei hriapasana zydua liata ei palôh a ly ta, cha cha ei hriapasana zydua vâta ei lymâ a châ.

11Ei hriapasana zydua nata ei ku ta ei hriapa zydua pachâ na ta, moh teh u, cha zydua cha hraoleipa châ ei ta, thlih a chadaipa deita a châ; noh ry liana heta hmo phahnaipa khâpa hmah y vei.

12Chatawhcha sona nata ngâna nata hruna kyh zy lâ a heipa ta pachâ na ta. Abei a thla awpa chyhsa cha, bei tuapazy tao chiehpa tah leipa ta cha, khâpa hropa ma a tao thei aw?

13Khaihna cha zohna hlâta a pha viapa hawhta, sona chhao hruna hlâta a pha via tahpa ei hmô haw.

14Chyhsa sopa cha a luh liata mokhaoh hnei ta, ahrupa deikua cha zohna ry liata a sie tyh. Châhrasala ama to awpa cha ama zydua châta miakhapa a châ tahpa ei pahno.

15Chatawhcha ei palôh ta, “Ahrupa chô liata hmo a tlôpa cha keima chô liata chhao tlô hra tlôh aw ta, cha hawhpa khiahta cha, ei sona heta khâpa phahnaina ma a hnei tly?” tah na ta. Ei palôh liata, cha chhao cha hraoleipa a châ ei tah tyh.

16Asopa chhao, ahrupa chhao, chhâzaw ta a thei thlâh hapa châ aw veih ei. Nohzy khô laih aw ta, mypa ama châ khai aw. Asopa chhao ahrupa hawhta a thi thlâh ha hrapa a châ.

17Chavâta hro he ei hao. Noh ry liata hmotaopa zydua he, ei pachâ nâ parôhtuhpa dei châ ei ta, ato zydua hraoleipa châ ei ta, thlih a chadaipa deita a châ.

18Ei hriapasana zydua he ei hnôhlâ ta a vaw y awpa châta ei râsai awpa deita a châpa ei pahnopa vâta, noh ry liata ei hriapasana zydua he ei hao.

19Cha chyhsa cha asopa ma a châ aw, ahrupa ma tahpa ahy a pahno aw tly? Chatanachôta ei sona hmâpa ta noh ry liata ei hriapasana zydua chô liata biehneituhpa a châ pyly aw. Cha chhao cha hraoleipa deita a châ.

20Chavâta a heihhâ na ta, noh ry liata rai ei hriapasana zydua liata ei hnabei a dy haw.

21Chyhsa ta sona nata novâhna nata zôthaina zy hmâpa ta hriapasa ta, a châh ta cha, a hriapasa leipa to awpa ta siesai awpa a châ thlâh ha tyh. Cha chhao cha hraoleipa nata paraona lai ngaitapa a châ.

22Chyhsa ta tiamapa nata palôh rietheipa ta noh ry liata a hriapasana tawhta khâpa ma a hmô?

23A hro chhôh noh zydua cha vâsâhna sai ta bie ta, a raihria chhao ruchhôna dei a châ. Zâ ta chhao a palôh a pahâ vei. Cha chhao cha hraoleipa deita a châ.

24Chyhsapa châta, niepa ta doh ta, a hriapasana liata alyna hneipa hlâta a pha viapa y vei. Cha chhao cha Khazohpa tawhta a châ tahpa ei hmô haw.

25Ano tawhta a châ vei khiahta cha, ahy ma nie thei aw ta, ahy ma alyna a hnei thei aw?

26Ano a palysatuhpa cha, Khazohpa ta sona nata novâhna nata alyna pie ta, moleipa deikua cha, Khazohpa palôh a patlâhpa hnohta pie awpa lapakhyna nata pahmaohpakhyna rai a pahriasa tyh. Cha chhao cha hraoleipa châ ta, thlih a chadaipa deita a châ.

← Chapter 1 Jump to: Chapter 3 →