Ephesians 1

Chin (Mara Bible RV (BSI))

Jump to: Chapter 2 →

1Pawla, Khazohpa khozie hawhta Krista Zisu lyuhchâpa ta Ephesi khih liata mopathaihpazy nata Krista Zisu liata ngâchhihpazy ei châ naoh ei.

2Khazohpa eima Paw nata Abeipa Zisu Krista tawhta ngiachhiena nata thlalôhna nama hnohta y mawh sy.

3Khazohpa nata eima Beipa Zisu Krista Paw cha reithaipa ta y mawh sy. Ano chata avâ suzy liana khita Krista zawhzi ta thlahpa lâ byhnâ to miah pie ta.

4A hmiakô liata pathaihpa nata seina hnei leipa ta eima y thei nawpa ta, leilô y hlâ tawhta Krista liata miah a tlyh ta. Kyhpachâna ta,

5ano khozie nata â lyzie hawhta, Zisu Krista liata a sawzy ta tao awpa ta miah a vaw rao chhielie haw.

6A ngiachhiena rônahzie reithai awpa ta, saw châna cha a Kyhpachâpa liata a saipa ta miah a pie.

7A thisaih vâta ano liata chatlaina hnei pi ta, cha cha a ngiachhiena hneirôhzie lymâ hawhta, eima paraonazy angiahthaina a châ.

8Cha ngiachhiena vâna chata sona nata novâhna to ta miah a vaohei.

9A hmochhuahpa bienyupa cha, â chhuahpa hawh tlai ta Krista liata a vaw patlôsapa kyh miah a pahnosa haw.

10Chatanachata daihti â ki tita, hmo to, avâ liata a ypa nata alei liata a ypa zydua, Krista liata syhpahmaoh khaipa a châ aw.

11Keimo cha Khazohpa ryhraopa hawhta rao chhieliepazy châ pi ta, Krista liata Khazohpa ryutozy eima châ. Ano ta a khozie hawhta ryhrao ta, hmo to a tao.

12Chatanachata keimo, Krista liata hnabeiseihna a hnei tuapazy pi he a rônahna reithaina eima châ thei aw.

13Nâmo chhao, nama pachhana thâtihpha biehmeiseihpa thei ei chi ta, namâ ngiapâ ha tawhta cha, ano liana chata bietai Thlahpa Pathaihpa ta pa-ipa nama châ.

14Ano cha Khazohpa rônahna reithai nawpa ta, Khazohpa ta a ryutozy a chatlai hlâ chhao ta, cha ryuto cha eima hmô tlai aw tahpa pa-ina sôhkâ a châ.

15Cha vâna chata, Abeipa Zisu liata namâ ngiapâna nata mopathaihpa zydua chô liata nama kyhpachâna zy ei vaw thei nahta,

16ei thlahchhânazy liata nama moh reipa ta, nâmo châta alyna bie rei bâh va na.

17Krista nama pahno pasia thei nawpa ta, eima Beipa Zisu Krista Khazohpa, rônahna Paw ta sona nata aluahna Thlahpa a cha pie awpa ei ta thlah ei cha chhâpa ei.

18Awpa nama châna liata hnabeiseihna pahnopa ta, mopathaihpazy châta a ryuto rônahpa hluhzie nama pahno thei nawpa ta, nama pathipalôh mozy pavâsapa a châ thei nawpa ta thlah ei cha chhâpa hra ei.

19Chatanachata a thatlôna rônahpa raihriazie hawhta, keimo ngiapâtuhpazy chô liata a hmotaotheina rônah ngaitapa cha, khâpa ma a châ tahpa nama pahno thei aw.

20Cha hmotaotheina cha athihpa hry tawhta Krista a pathyu nota nata avâ suzy liata a chachâh lâta a patyusa nota, Krista liata a hriatuhpa hmotaotheina a châ.

21Cha hmotaotheina cha, abeina zydua, biehneina zydua, hmotaotheina zydua nata ryureina zydua chô lâta y ta, he khizaw lia dei châ leipa ta, khizaw vaw y awpa liata chhao, moh bipa to chô lâta a y aw.

22Khazohpa ta hmo to zydua Krista phei ry liata soh ta, hmo to chô liata luh châ awpa ta, Krista cha Awnanopa hnohta a pie.

23Awnanopa cha Krista pôhpa châ ta, ato pakituhpa pakina a châ.

Jump to: Chapter 2 →