Ephesians 5

Chin (Mara Bible RV (BSI))

← Chapter 4 Jump to: Chapter 6 →

1Chavâta Khazohpa kyhpachâpa sawzy nama châpa hawhta, a hâ a latuhpazy châ teh u.

2Krista ta kyh miah pachâ ta, ropahâhpa châta Khazohpa lâta hmohlâpa ta nata atheihna ta keimo châta â piepa hawhna khata, kyhpachâna hro ta nâmo chhao hroh teh u.

3Mopathaihpazy nama châ tawhta cha, apatlana, puana zydua nata uahvana zy nama hry liata a rei chhao reipa châ khah sy.

4Bie puapa reipa zy, bie hrupa reipa zy, saiso pathaih leipa bie reipa zy a ngia vei. Chazy taopa hlâta cha alyna bie tlao reih tyh muh vy.

5He he a siapa ta pahno teh u: Apatlana moleina a taopa tlyma, chyhsa puapa tlyma, uahvana a hneipa tlyma, cha hawhpa chyhsazy chata Krista nata Khazohpa khinarâh liata ryu to hnei aw veih ei. Uahvana a hneipa cha nothlahpa achhypa a châ.

6Ahy hmahta hraoleipa bie ta cha dôvei khah ei sy. Cha hmozy vâna chata Khazohpa pathiiana cha ngiapâleipa sawzy chô liata a tlô tyh.

7Chavâta âmo cha a hlykhei khuh vy.

8Hlâno cha zohpa châ ei chi ta, tahmâ deikua, Abeipa liata khaihpa nama vaw châ haw. Khaihpa sawzy hawhta hroh teh u.

9Khaihna theilâpa cha phana nata siana nata biehmeiseihpa to liata â lâ tyh.

10Abeipa khopa khâpa ma a châ tahpa pahnopasia a chhuah teh u.

11Zohna hmotaopa a pathei beih leipazy liata a hlao leipa u la, zohna hmotaopazy cha tlao palâhâh teh u.

12Arulâta ama tao tyhpazy cha, reipa chhao ta nozachhihpa hmo a châ.

13Châhrasala hmo kheihawhpa rai, khaihpa ta a palâsa tita cha, hmô theipa ta a y tyh.

14Hmô theipa ta a ypa maih cha khaihpa a châ. Chavâta, “Nâ, a môpa, a hra la, Athihpa hry tawhta thyu teh! Krista ta a cha khaipahlie aw,” tahpa a châpa kha.

15Chatanachata asoleipazy hawhta y leipa u la, asopazy hawhta ypa ta, nama yzie liata a chado teh u.

16Nohzy he a pha leipa vâta, daihti rypaohpa patu thai teh u.

17Chavâta hru leipa u la, Abeipa khopa khâpa ma a châ tahpa tlao pahno teh u.

18Kresawhti paripa ta y khah u, parina liata a sohsi leina y tlôh ta, Thlahpa ta biepa ta tlao y teh u.

19Reithaina hlazy, Khazohpa hlazy, thlahpa hlazy ta bie a chho raihrie u la, nama pathipalôh ta Abeipa lâ hla sapa ta, totâ tô teh u.

20Eima Beipa Zisu Krista moh ta, ato liata Paw Khazohpa hnohta alyna bie khâ reih u la,

21Krista nama chizana palâsapa ta, a ngiarih raihrie teh u.

22Lapinô saih u, Abeipa liata namâ ngiarihpa hawhta, nama vahpazy liata a ngiarih teh u.

23Krista cha ano pôhpa Awnanopa luh châ ta, Awnanopa pachhatuhpa a châpa hawhta, vahpa cha lapinô luh a châ.

24Awnanopa ta Krista liata â ngiarihpa hawhta, lapinôzy chhao ato liata ama vahpazy liata amâ ngiarih awpa a châ.

25Vahpa saih u, Krista ta Awnanopa kyhpachâ ta, Awnanopa châta â pie khaipa hawhta, nâmo chhao nama lapinôzy kyhpachâ teh u.

26Awnanopa cha bie nata ti ta pasipa ta, a pathaisa thei nawpa ta, Krista cha Awnanopa châta â pie.

27Chatanachata Awnanopa cha a puapa rai a kiah leipa, a vo a dao leipa nata cha hawhpa hmo rai a phaoh leipa châ thei aw ta, pathaihpa nata seina hnei leipa Awnanopa rônahpa châ awpa ta, Krista ano tlai ta a tao aw.

28Cha hawhna chata, vahpazy ta ama lapinôzy cha âmo pôhpa hawhta pachâpa ta, ama lapinôzy kyh ama pachâ awpa a châ. A lapinô kyh a pachâpa cha anosasyh kyh a pachâpa a châ.

29Ahy hmahta ano pôhpa a hao beih vei. Krista ta Awnanopa chyh ta, a mohôhpa hawhta, chyhsa ta a pôhpa cha chyh ta a mohôh tyh.

30Krista pôhpa pachiahpazy eima châ.

31“Chavâta chapaw ta a nô nata paw siesai aw ta, a lapinô a patu aw; chatanachata pôhpa miakha ama vaw châ ha aw.”

32He he bienyupa a thu ngaitapa châ ta, châhrasala kei ta la Krista nata Awnanopa thâtih reina a châpa ta ei pahno.

33Khâpa rai châ sala, ahy rai ta ano kyh â pachâpa hawhta a lapinô kyhpachâ sala, lapinô chhao ta a vahpa za thai mawh sy.

← Chapter 4 Jump to: Chapter 6 →