Hebrews 13

Chin (Mara Bible RV (BSI))

← Chapter 12 Jump to:

1Unawh kyhpachâna y lymâ mawh sy.

2Khichhai chô liata phana papua awpa my khuh vy. Cha hawhta taopa ta, thokhazy ta pahno leipa ta vâlyuhchâpazy ama o liata ama patlôsa tyh.

3Patâhna o liata atâhpazy cha, ama hnohta patâhna o liata y hrapa hawhta a pachâ u la, a thei thlâh ha muh vy. Riethei pataosapazy chhao, sapa ta a ypa nama châ hrapa vâta, a thei thlâh ha teh u.

4Nôvah ahneina he chyhsa zydua hry liata palyupalihpa ta y mawh sy. Nôvah rakhô chhao papuapaleipa châ khah sy. Apatlana moleina a taopazy nata apheipazy cha Khazohpa ta a pachia aw.

5Nama hro cha tâkâ sôh tlaichhaina a hlao leipa châ sala, nama hneipa rakha liata palôhtlâh a pao muh vy. Abeipa ta, “Cha pathlua beih leipa aw ei na ta, cha siesai beih aw veih ei na,” a tah.

6Chavâta riahphapa ta, “Abeipa cha nâ baotuhpa châ ta, Chi aw va na; Chyhsa ta kheihta eina tao thei aw?” Eima tah ngâh.

7Khazohpa bie châ chhotuhpa nama hyutuhpazy a thei thlâh ha u la, ama hro liata hmo phapazy pachâ u la, amâ ngiapâna hâ a la teh u.

8Zisu Krista cha zâhia nata tanoh nata chhâzaw ta a ualua ta a y thlâhpa a châ.

9Pachuna nanopa nata noâhchhihpazy ta paviasapa ta y khuh vy. Palôh he niedo ta thapatlô awpa châ leipa ta, ngiachhiena ta thapatlô awpa tlao a châ. Niedo kyh sai ta a tymâkheipazy châta niedo ta athôhna tlôkhei hlei vei.

10Keimo cha maisâh hnei pi ta, keimo maisâh liata deikua cha, achhyna byureih chakaotuhpazy nie thei veih ei.

11Theihthai beichaipa ta moleina atheihna châta Su Pathaih Chaipa lâ a thisaih â ngiakheipa sahroh pôhpazy cha, riehmo khôtho lâta rao tyhpa a châ.

12Cha hawhna chata Zisu chhao ta ano thisaih tlai ta chyhsazy a pathaisa thei nawpa ta, khihpi thokhy khôtho liata pasa a vaw tao.

13Chavâta riehmo khôtho liata ano yna lâ pua sih la, reipachhiena a phaopazy cha phaokhei suh u.

14He liata khihpi sôhpahlôhpa hnei tlôh lei khâh pi ta, khihpi a vaw y awpa cha tlao eima tlua.

15Chatanachata ano zawhzi ta reithaina atheihna cha Khazohpa hnohta khâ hlâ suh vy. Cha cha a moh achâhkheina hmaozy theilâpa a châ.

16Hmo pha tao my leipa u la, nama hneipazy a chhaih awpa my khuh vy. Cha hawhpa atheihnazy ta Khazohpa a palysa.

17Nama hyutuhpazy rei a ngiah u la, ama biehneina liata a ngiarih teh u. Khazohpa hmiakô liata nama thâtih a reih awpazy châ ei ta, pachârôhna chôta châ leipa ta, a ly kawpa ta nama thâtih ama rei thei nawpa ta nama thlahpa a vaituhpazy ama châ. Pachârôhna chôta nama thâtih reipa cha, nama châta phahnai aw vei.

18Thlah miah chhâpa teh u. Kyh to liata zachhihpa ta y a chhuah pi ta, chhie nata pha pahnona pasohpa eima hnei tahpa a siapa ta eima pahno.

19A chatlie viapa ta nâmo lâ ei vy heih thei nawpa ta, a eih viapa ta thlah eina chhâkhei awpa ei chi ta ei châ haw ei.

20Tahmâ he thlalôhna Khazohpa, eima Beipa Zisu athihpa hry tawhta a pahro heihpa, chhâzaw biehrai thisaih vâta mietaku vaituhpa rônahpa ta

21a khopa nama tao thei nawpa ta hmo pha to ta cha tobi ei sala, a mohmô liata â lynazie ta nama y lymâ thei nawpa ta, Zisu Krista zawhzi ta nâmo liata hria lymâ sala, Zisu Krista hnohta chhâzaw nata tlyzaw ta rônahna y mawh sy. Amen.

22Unawh saih u, nama hnohta pasyuna bie chyuta ei vaw ropa he nama pahno thai awpa ta ei châ haw ei.

23Eima unawhpa Timawthy cha, patâhna o tawhta ama papua haw tahpa vaw pahno muh vy. A vaw tlô patoh khiahta cha, ano nata eima châ vaw hmô aw.

24Nama hyutuhpa zydua nata mopathaihpa zydua nâ naohpa muh vy. Itali râh tawhta a vypazy ta ama châ naoh.

25Nama zydua hnohta ngiachhiena y mawh sy. Amen.

← Chapter 12 Jump to: