Hebrews 8

Chin (Mara Bible RV (BSI))

← Chapter 7 Jump to: Chapter 9 →

1Rei eimâ chhuahpa cha he he a châ: Cha hawhpa theihthai beichaipa cha hnei pi ta, ano cha vârâh liata Beichaipa beidyuchhai chachâh lâta a tyuhpa châ ta,

2chyhsapa paduapa châ leipa ta, Abeipa paduapa achhyna byureih hmeiseihpa supathaihpazy liata chakaotuhpa a châ.

3Theihthai beichaipa maih cha hmopiepa nata atheihnazy hlâ awpa ta raopa ama châ. Chavâta he theihthai beichaipa chhao he, khâpa chhâ tlyma hlâ awpa a hnei awpa a byuh.

4Alei liata a ypa châ sala, ryhpa hawhta hmopiepa a hlâ awpa theihthaipazy ama ypa vâta, ano la theihthaipa a châ awpa byuh aw vei.

5Theihthaipazy cha vârâh hmo nothlahpa nata nohpahlipazy ama chakao tyh. Mawsi kha achhyna byureih a sa chy ta a hnohta, “Hmo to a taozie awpa tlâh liata ei cha pahmôpa hawhna khata na tao khai awpa a châ,” tahpa ta a taozie chhopa a châ.

6Tahmâ deikua, Krista cha biehrai pha viapa lyuhchâpa a châpa hawhta, chakaona rai pha via syulyupa to ha ta, cha biehrai cha bietai pha viapazy chô liata taopa a châ.

7Biehrai hmiatuapa kha seina hnei leipa vaw châ ha sala, biehrai hropa tlua a byuh lei awpa tlai.

8Sei nawpa ama hneipazy Khazohpa ta hmô ta, hetana heta a tah: “Pachâ teh u, Nohzy a vaw tlô hai, Abeipa ta a tah. Cha nohzy liata, Izarei phopi hnohta biehrai thiehpa tao aw na ta, Zudâh phopi hnohta chhao ei tao aw.

9Ama pathlatuhzy Izi râh tawhta a chhi papua awpa ta, Ama ku ta ei patu noh ta, Ama hnohta bie ei hraipa hawhpa kha châ aw vei. Ei biehrai liata ama y thlâh ha leipa vâta, Âmo pachâ khao veih ei na, Abeipa ta a tah.

10Cha nohzy hnôhlâ ta, Izarei pathlazy hnohta biehrai ei tao awpa cha he he a châ, Abeipa ta a tah: Ama pachânazy liata ei ryhpa biezy soh aw na ta, Ama palôhzy liata ei roh aw; Ama Khazohpa châ aw na ta, Ei phopi ama châ aw.

11‘Abeipa pahno teh,’ tahpa ta, Vaih nata vaih a pachu raihrie khao leipa aw ei ta, Unawh nata unawh a pachu raihrie khao aw veih ei; A chyh chaipa tawhta a lai chaipa taihta, Ama zydua ta eina pahno khai aw ei.

12Ama paraopazy liata zawh a ngiah aw na ta, Ama moleinazy a thei khao aw va na.”

13Biehrai thiehpa thâtih a reipa liata, a hmiatuapa cha a parohpa ta tao ta, paroh lymâ ta, a vaw machâ hapa cha, a lei patoh awpa a châ.

← Chapter 7 Jump to: Chapter 9 →