John 2

Chin (Mara Bible RV (BSI))

← Chapter 1 Jump to: Chapter 3 →

1A noh thôhna noh ta Kâlili râh Kena khih liata ahneina y ta, cha liata Zisu nô chhao a hlao hra ta.

2Zisu nata a pachupazy chhao ahneina a hlao awpa ta hruapa châ ei ta.

3Kresawhti a daih khao leipa ta, a nô ta Zisu hnohta, “Kresawhti hnei khao veih ei,” tah ta.

4Zisu ta a nô hnohta, “Chanô, cha cha keima pachâ awpa hmo a châ mâ? Ei daihti tlô mâh vei,” tah ta.

5A nô ta chakaotuhpazy hnohta, “Nama hnohta a reipa maih tao lymâ muh vy,” tah ta.

6Zuzy ryhpa hawhta pathaina tao nawpa ta, cha liata alô beihrai miacharu, chhiehraôh sypalih a tlôhpa nata sycharu a tlôhpazy patyuh ei ta.

7Zisu ta ama hnohta, “Alô beihraizy kha ti pabie teh u,” tah ta. A kiah a chipa ta pabie khai ei ta.

8Ama hnohta, “Tahmâ thaih u la, chôtla hyutuhpa lâ vawkhei teh u,” tah ta. Vawkhei ei ta.

9Chôtla hyutuhpa ta ti kresawhti lâta a liepa cha doh ta, khataih tawhta a vypa ma a châ tahpa pahno leipa ta, ti a vaw thaihpa chakaotuhpazy deikua ta pahno ei ta. Chôtla hyutuhpa ta myuhneituhpa cha aw ta,

10a hnohta, “Chyhsa to ta kresawhti phapa rai tua tyh ei ta, a hluh via ta ama doh khai tawhta a pha lei viapa ama rai tyh. Nâ deikua cha tahmâ taihta kresawhti phapa nâ khai thlâh hapa he,” tah ta.

11Zisu ta hmonoâhpa a tao tua chaipa cha, Kâlili râh Kena khih liata tao ta, a rônahzie palâsa ta, chatanachata a pachupazy ta ano cha a ngiapâ ha ei ta.

12Cha khai tawhta Kâpynia khih lâ zu ta, a nô nata a unawhzy nata a pachupazy chhao a hnohta zu hra ei ta. Cha liata noh chyhta y ei ta.

13Zuzy Zawpakhô kyhchhi a hnia ha ta, Zisu cha Zerusale lâ khy ta.

14Achhyna o liata viahchaozy, mietakuzy nata pivawzy a zuahpa sahlao nata tâkâ rituhpa sahlao a tyuhpazy hmô ta.

15Khawhhri charipa ta chheina tao ta, ama mietaku nata viahchaozy chhaota Achhyna o tawhta papua khai ta. Tâkâ rituhpazy tâkâ cha leihtha ta, ama tlâhkhaizy chati pathlah ta.

16Pivaw zuahtuhpazy hnohta, “Kha hmozy kha puakhei teh u. Ei Paw o he sôdaohna o ta tao khah u,” tah ta.

17A pachupazy ta, “Na o châta phahnai ei ngiahna ta eina nie khai aw,” tahpa ropa bie a vaw thei ei ta.

18Zuzy ta a hnohta, “He hmozy na taopa heta khâpa ngiana ma miah na pamosa?” tah ei ta.

19Zisu ta âmo cha a chhy ta, “He o he phie u la, noh thôh chhôh ta ei padua heih aw,” tah ta.

20Zuzy ta, “He o he kô sypalih nata kô charu sapa châ ta, nâ ta noh thôh chhôh ta na padua heih aw ma?” tah ei ta.

21Châhrasala ano pôhpa Achhyna o kyh a reipa tlao a châ.

22Chavâta athihpa hry tawhta pathyupa ta a y tawhna khata, cha kyh cha a reipa a châzie a pachupazy ta a thei ei ta, Biehrai nata Zisu bie reipa cha a ngiapâ ha ei ta.

23Zawpakhô kyhchhi nota Zerusale liata y ta, hmonoâhpa a taopazy ama hmô nahta, chyhsa hluhpi ta a ngiapâ ei ta.

24Châhrasala Zisu cha chyhsapa palôh zydua a pahno khaipa vâta, âmo liata ngâna pahnieh vei.

25Chyhsapa palôh chhôh liata a ypa a pahno khaipa vâta, chyhsapa kyh liata chyhsapa ta a pahnokhei awpa a ngiah vei.

← Chapter 1 Jump to: Chapter 3 →