Judges 17

Chin (Mara Bible RV (BSI))

← Chapter 16 Jump to: Chapter 18 →

1Epharai tlâh râh liata chyhsa pakha y ta, a moh cha Mikâ a châ.

2A nô hnohta, “Tâkâ tlaw 1,100 cha parupa ha ei ta, cha kyh liata chhiesa chi ta, keima nakhaoh lia chhao ta na reipa kha, moh teh, kha tâkâ kha keima liata a y, kei ta ei lapa a châ,” tah ta. A nô ta, “Ei sawchapawpa he Abeipa ta byhnâ pie mawh sy,” tah ta.

3Mikâ ta tâkâ tlaw 1,100 cha a nô pie pakhua ta, a nô ta, “He tâkâ he nothlahpa khaipa nata nothlahpa leihpa tao nawpa ta, keima ku tawh tlai ta ei sawchapawpa châta Abeipa lâ ei hlâ. Chavâta tahmâ ei cha pie pakhua ha aw,” tah ta.

4Mikâ ta tâkâ cha a nô a pie nahta, a nô ta tâkâ tlaw 200 la ta, tâkâ daihtuhpa pie ta, tâkâ daihtuhpa ta, cha tâkâ cha hmâpa ta nothlahpa khaipa nata nothlahpa leihpa tao ta. Chazy cha Mikâ o liata y ta.

5Mikâ ta khazoh achhyna su hnei ta, ephaw nothlahpa nata chhôhkha khazoh nothlahpazy tao ta, a sawchapaw pakha cha ano châta theihthaipa châ awpa ta chahnao ta.

6Cha daihtizy liata Izarei liata abei y leipa ei ta, chyhsa to ta âmo mo ta pha ama tahpa maih tao ei ta.

7Zudâh râh Bethlehe khih liata Zudâh satlia pakha y ta, ano he Livai chi châ ta, Epharai tlâh râh lâ khitlyh ta.

8Cha chyhsa cha Zudâh râh Bethlehe khih tawhta pua ta, yna su rypaohpa tluapa ta a sie laihpa a châ. A sie laihna liata, Epharai tlâh râh liata Mikâ o cha kei tlô ta.

9Mikâ ta a hnohta, “Khataih tawhta nâ vy?” tah ta. Ano ta Mikâ hnohta, “Zudâh râh Bethlehe liata Livai chi ei châ. Yna su rypaohpa tluapa ta ei sie laih,” tah ta.

10Mikâ ta a hnohta, “Ei hnohta y la, ei paw nata ei theihthaipa na châpa mah y. Kô kha ta tâkâ tlaw hrawh cha pie aw na ta, chysia nata na nie awpazy ei châ tôh aw,” tah ta. Livai cha o chhôh lâ a ngia ta.

11Cha chyhsa hnohta a ypa cha Livai chhao ta a palôh tlâh kaw ta, cha satliapa cha Mikâ châta a sawchapaw pakha hawhta vaw châ ha ta.

12Chatawhcha Mikâ ta Livai chyhsa cha chahnao ta, satliapa cha Mikâ theihthaipa vaw châ ta, Mikâ o liana cha y ha ta.

13Chatawhcha Mikâ ta, “Tahmâ cha Livai chyhsa theihthaipa ta ei hnei hapa vâta, Abeipa ta byhnâ eina pie bâ aw tahpa ei pahno haw,” tah ta.

← Chapter 16 Jump to: Chapter 18 →