Judges 21

Chin (Mara Bible RV (BSI))

← Chapter 20 Jump to:

1Izarei pheisaihzy cha Mizpâ liata bie a taih ei ta, “Eima hry liata ahy hmahta eima sawchanô Benzami lapinô ta eima pie awpa châ vei,” tah ei ta.

2Izarei phopi cha Bethel lâ sie ei ta, cha liata zâlâ taih Khazohpa hmiakô liata a tyuh ei ta, a paropa ta palôh pasa ngaitapa ta cha ei ta.

3“Hy Abeipa Izarei Khazohpa, kheihtazieta ma Izarei liata he hawhpa hmo he a vaw y thlâh ha tly, khazia tanoh he Izarei liata chi kha y khao leipa ta a y aw?” tah ei ta.

4A mylâ ta Izarei phopi cha mydi ta thyu ei ta, cha liata maisâh tao ei ta, raopa hlânazy nata aryhna hlânazy hlâ ei ta.

5Chatawhcha Izarei sawzy ta, “Kheihawhpa Izarei chi ma Abeipa lâta pakhypi liata a hlao hra vei,” tah ei ta. Mizpâ liata Abeipa lâta pakhypi a hlao hra leipa kyh liata, “Thie thlyu awpa a châ,” tahpa ta bietai rônahpa ama vaw tao hapa kha châ ta.

6Izarei sawzy ta ama unawhpa Benzami cha ngiachhie kaw ei ta, “Tanoh he Izarei tawhta chi kha chhawh pathlahpa châ ha ta.

7Eima sawchanôzy ama lapinô châta pie lei awpa ta Abeipa moh ta bie a taih ha tlôh pi ta, Benzami laibâhpazy lapinô awpa cha kheihta ma eima tao aw?” tah ei ta.

8“Izarei chizy hry liata kheihawhpa chi ma Mizpâ liata Abeipa lâta pakhypi a kaw hlao hra vei?” tah ei ta. Zabekilia tawhta pakhypi riehmo lâ a khypa pakha hmahta hmô leipa ei ta.

9Phopi maluh reih ei ta, moh teh u, cha liata Zabekilia mo pakha hmahta y veih ei.

10Chavâta zawpi a hmaohpakhypazy ta ama pasaipha chaipazy 12,000 tuah ei ta, ama hnohta, “Sie u la, zaozi ta Zabekilia mo kei chhawhsao teh u. Chanô nata hawtizy chhao nama chhawhsao khai aw.

11He hawhta nama tao aw: chapaw zydua pahleipadia khai aw ei chi ta, chapaw a zialâh hapa chanô zydua chhao nama pahleipadia khai aw,” tahpa ta biepie ei ta.

12Zabekilia mo hry liata laihsa kôpa, chapaw rai a zialâh mâh leipa nata a pahno mâh leipa 400 hmô ei ta, âmo cha Kâna râh liata Silô riehmo lâ a chhi ei ta.

13Chatawhcha zawpi a hmaohpakhypa zydua chata chyhsa tuah ei ta, Rimô lôkâhpa liata a ypa Benzami sawzy cha bie kei pachhosapa ta, âmo lâta aryhna bie phuah ei ta.

14Cha daihti liata Benzami cha vaw kua ta, Izarei sawzy ta Zabekilia chanô ama pahlôhpazy cha âmo pie ei ta, châhrasala a khi leipa ei ta.

15Abeipa ta Izarei chizy liata pyu a paaw hapa vâta, Izarei phopi ta Benzami cha ngiachhie kaw ei ta.

16Chatanachata Izarei machâzy ta, “A laibâhpazy lapinô awpa he kheihta ma eima tao aw, Benzami chanôzy pahleipadia khai hapa châ tlôh ei ta?” tah ei ta.

17“Izarei tawhta chi kha pamuapa ta a y lei nawpa ta, Benzami laibâhpazy heta ryutotuhpazy ama hnei awpa a châ.

18Eima sawchanôzy hra lapinô ta pie thei tlôh pi vâ,” tah ei ta. Izarei sawzy ta, “Benzami hnohta lapinô a piepa cha chhiesapa ta y mawh sy,” tahpa ta bie amâ vaw taih hapa châ ta.

19Chavâta Izarei sawzy ta, “Pachâ teh u, Silô liata kô chareih ta Abeipa kyhchhi y tyh ta, he he Bethel maw lâta y ta, Bethel tawhta Sekhe lâ siena lâlai nochhi lâ daih liata Lebônah chho lâta a ypa a châ,” tah ei ta.

20Benzami sawzy cha biepie ei ta, ama hnohta, “Sie u la, kre zôhzy hry liata arulâta a kei byh teh u.

21Moh aw ei chi ta, Silô laihsazy ta lânazy liata lâ awpa ta ama vaw puapa nama hmô khiahta cha, kre zôhzy hry tawhta vaw pua aw ei chi ta, Silô laihsazy cha nama lapinô châta patu chyu aw ei chi ta, Benzami râh lâ nama siekhei aw.

22Ama pawzy tlyma, ama rilâhpazy tlyma ta keimo lâ a vypa ta ama vaw paphôh khiahta cha, ama hnohta, ‘Zawh miah a ngiah u la, âmo he pasai teh u, adyuhna liata ama zydua châta lapinô patupa khai thei leipa pi ta, nâmo hra ta lapinô pie thei tlôh leipa ei chi ta, chavâta thailei nama châ tlamaw aw,’ tahpa ta eima chho aw,” tah ei ta.

23Benzami sawzy ta cha hawhna chata tao ei ta, lâ awpa ta a vypazy hry tawhta ama lapinô châta patu chyu ei ta, siekhei ei ta. Sie ei ta, ama ryuto râh lâ a lie ei ta, ama khihpizy paduapathi ei ta, cha liata pahrâ ei ta.

24Cha daihti liata, Izarei sawzy cha cha su tawhta pua ei ta, âmo chi nata chhôhkha chyu lâta a lie ei ta, cha su tawhna chata ama ryuto râh chyu lâta sie ha ei ta.

25Cha daihti cha Izarei liata bei a y leina daihti a châpa vâta, chyhsa to ta âmo pachâ ta pha ama tahpa maih ama taona daihti a châ.

← Chapter 20 Jump to: