Mark 1

Chin (Mara Bible RV (BSI))

Jump to: Chapter 2 →

1He he Khazohpa Sawchapawpa Zisu Krista thâtihpha athaona a châ.

2Hrohsopa Isai châbu liata, “Moh teh, na lâpi a chhuahdy awpa ta, Ei lyuhchâpa na hmia lâta tuah na ta,

3Râhchawhpa liata awhpa ao ta, ‘Abeipa lâthlôh a chhuahdy u la, A lâpizy patlâsa teh u,’ a tah,” tahpa ta ropa hawhta,

4Zawhâna a vy ta, râhchawhpa liata bâti pachâsa ta, moleinazy ngiahthai nawpa ta rona bâtina bie phuah ta.

5Zudia râh nata Zerusale khih tawhta chyhsa zydua ano lâ a vy ei ta, ama moleinazy palâhâh ei ta, Zawdâh chavah liata bâti a pachâsa lymâ ei.

6Zawhâna cha râraoseihpa hmi chysia a tobi ta, a chai savo chaisaihna ta a saih ta, a pati cha khawsu nata kheihti a châ.

7Zawpi hnohta, “Keima hlâta chyhsa rônah viapa ei hnôhlâ ta â vy hai. Kei cha a bôh ta, a pheiky ri a pathlâ tlâh awpa chhao châ va na.

8Kei ta ti ta cha bâti ei na ta, ano ta la Thlahpa Pathaihpa ta a cha bâti aw ei,” tahpa ta phuah ta.

9Cha nohzy liata, Zisu cha Kâlili râh Nâzari khih tawhta a vy ta, Zawdâh chavah liata Zawhâna ta bâti pachâsa ta.

10Ti tawhta a kaw puapa nahta, avâ a pahypa hmô ta, Thlahpa cha vachhuh hawhta a chô liata a zâ choh ta.

11Avâ tawhta ao za pua ta, “Ei Sawchapaw kyh ei pachâpa na châ, na chô liata ei ly ngaita,” tah ta.

12Thlahpa ta Zisu cha râhchawhpa lâ thlai a chhi ta.

13Râhchawhpa liata noh sypalih chhôh Sâtâ reipasaopa ta y ta. Râhsazy hnohta pahrâ ta, vâlyuhchâpazy ta ano cha chakao ei ta.

14Zawhâna ama patu tawhta, Zisu cha Kâlili lâ a vy ta. Khazohpa Thâtihpha chho ta,

15ama hnohta, “A daihti a ki ha ta, Khazohpa khinarâh â hnia haw. Ro u la, thâtihpha a ngiapâ teh u,” tah ta.

16Kâlili Tipo kiah liata a sie hai nota, Saimaw nata a unawhpa Adaru cha tipo liata sao ama parai ngâpa hmô ta. Âmo cha nga patutuhpazy ama châ.

17Zisu ta ama hnohta, “Na zi teh u, chyhsa patutuhpa ta ei cha tao aw ei,” tah ta.

18Ama saozy thlai siesaipa ta Zisu cha zi ha ei ta.

19Bâhta a kei sie via nahta, Zebâdi sawchapawpa Zâmie nata a unawhpa Zawhâna cha balyh liata sao ama thei ngâpa hmô ta.

20Âmo cha thlai aw ta, ama paw Zebâdi nata ama pahlaosapa chyhsazy cha balyh liata siesaipa ta, Zisu cha thlai zi ha ei ta.

21Chatawhcha Kâpynia khih lâ sie ei ta, Pahânoh ta pakhyna o liata thlai a ngia ta, zawpi pachu ta.

22Ryhpa pachutuhpazy hawhta châ leipa ta, biehneina chhaota a pachupa vâta, a pachuna kyh liata ama noâh kaw ta.

23Amâ pakhyna o liata thlahpa puapa a hneipa chyhsa pakha y ta, thlai vaw awh ta,

24“Nâzari Zisu, kheihta tao awpa ma miah na khoh? Miah pahleipadia awpa ta ma nâ vy? Khazohpa Chyhsa Pathaihpa na châ tahpa ei pahno,” tah ta.

25Zisu ta thlahpa cha ra ta, a hnohta, “A chalih la, a chhôh tawhta pua teh” tah ta.

26Thlahpa puapa ta chyhsa cha thata padaosa ta, ao paro ngaitapa ta awh ta, a chhôh tawhta pua ha ta.

27Ama zydua ta noâh tah ngaita ei ta, “He he khâpa ma a châ tly? Biehneina chhaota pachuna thiehpa a châ he! Thlahpa puapazy chhao taihta bie pie ta, a bie amâ ngiah thlâh hapa he,” tah ei ta.

28Chatanachata Kâlili râh chhôh zydua liata a thâtih thlai pathâh ha ta.

29Pakhyna o tawhta ama puapa nahta, Zâmie nata Zawhâna chhaota Saimaw nata Adaru o liata thlai a ngia ta.

30Saimaw lapinô nô cha chasipa ta tlâh leipa ta, a zia thlâh ha ta. A thâtih cha Zisu thlai chho ei ta.

31Ano lâ vawh ta, a ku patupa ta pathyu ta, a chasipa cha pai ta, âmo cha chakao ta.

32Cha noh zâlâ noh a tla tawhta, tlâhleipa nata ahripa ta a patupa zydua ano lâ a vaw chhi ei ta.

33A khihpi ta ochhi thaby liata a vaw hmaohpakhy ei ta.

34Tlâhleipa hluhpi, pasana hri nanopa a ohpazy patlâh ta, ahripa hluhpi papua hra ta. Ahripazy ta ano cha ama pahnopasiapa vâta, bie ama rei awpa pasaih leipa ta.

35Mydi kari khih a pavâ hlâta thyu ta, su dâhthlohpa lâ sie ta, cha liata thlahchhâ ta.

36Saimaw nata a hnohta a ypazy ta ano cha tlua ei ta,

37ama hmô nahta, a hnohta, “Chyhsa to ta ama cha tlua ngâ kaw,” tah ei ta.

38Zisu ta ama hnohta, “A vaw daihpa khihzy lâ hao sie suh vy, hao khihzy liata bie ei chho thei hra nawpa ta; cha cha ei vyna chhâpa châ tlôh ta,” tah ta.

39Kâlili râh zydua chahryh ta, amâ pakhyna ozy liata bie chho ta, ahripazy papua ta.

40Phawhpa pakha ano lâ a vy ta, a hmiakô liata pakhu paneih ta, a hnohta, “Na khoh khiahta la, eina pathaisa thei chi na,” tahpa ta a haw ta.

41Zisu cha a thapasa ngaita ta, a ku ta kei paza ta, ano cha hria ta, a hnohta, “Ei khoh na, pathaihpa ta y mah y,” tah ta.

42A phawhpa cha thlai lei ta, a vaw pathaih haw.

43Bie liahsa a taih khai tawhta pasiesa ta,

44a hnohta, “Ahy hnohta hmahta khâpa hmah reih leipa la, sie la, theihthaipa a kei pamosa la, zawpi pahno awpa ta, Mawsi biepiepa hawhta nâ pathaisana châta atheihna kei hlâ mah y,” tah ta.

45Châhrasala cha chyhsa cha pua ta, a pathaih hana kyh cha reih lymâpa ta, thâtih tlao pathâhsa lymâ ta. Chavâta Zisu cha â lâhâhpa ta khihpi liata a ngia thei khao leipa ta, su dâhthlohpazy liata tlao y ta, su to tawhta ano cha ama pangai lymâ.

Jump to: Chapter 2 →