Mark 3

Chin (Mara Bible RV (BSI))

← Chapter 2 Jump to: Chapter 4 →

1Pakhyna o liata a ngia heih ta, cha liata kusypa pakha y ta.

2Ano ama leih thei nawpa ta, Pahânoh ta a patlâh ma tahpa moh thlâh ha ei ta.

3Zisu ta kusypa hnohta, “A duah teh,” tah ta.

4Zawpi hnohta, “Pahânoh ta khâpa tao awpa ma ryhpa ta a pasai? Hmopha tao awpa ma, pasasa awpa maw? Hrona pachha awpa ma, thie awpa maw?” tah ta. A thlih thlâh ha ei ta.

5Hiehâhpa ta âmo cha moh ta, ama palôh kuhchhapa vâta a palôh pasa ngaita ta, kusypa hnohta, “Na ku pazawh teh” tah ta. A ku pazawh ta, a kusypa cha pha ha ta.

6Phârisaihzy cha pua ei ta, ano ama thie thei nawpa pachâpa ta, Herawda pyzy nata thlai a chhohia ei ta.

7Zisu cha a pachupazy chhaota tipo lâ sie ta, Kâlili nata Zudia râhzy tawhta chyhsa hluhpi ta ano cha zi ei ta.

8Zerusale tawhta zy, Idumia râh tawhta zy, Zawdâh khô lâ tawhta zy, Tyre nata Sidaw khih chheipâh tawh zy ta ano cha zi ei ta. Zawpi hluhpi ta a hmotaopa rônahzie ama thei nahta, ano cha pangai lymâ ei ta.

9Zawpi ama hluh ngaitapa vâta, ano ama chadie lei nawpa ta, balyh chyhpa paruapa awpa ta a pachupazy chho ta.

10Chyhsa hluhpi a patlâhpa vâta, hri ohpazy ta ano ama hria thei nawpa ta thata ama bypa a châ.

11Thlahpa chhiepazy ta Zisu ama hmô nahta, a hmiakô liata pao ei ta, “Khazohpa Sawchapawpa na châ,” tahpa ta awh ei ta.

12Châhrasala a châna phuah lei awpa ta, âmo cha â i ngaitapa ta biepie ta.

13Chatawhcha tlâh lâ khy ta, ano ta a khopazy aw ta, ano lâ a vy ei ta.

14Pahrawh hleino a tlyh ta, âmo cha lyuhchâpazy ta rao ta. A hnohta y awpa nata bie chho awpa ta tuah awpa ta a raopazy châ ei ta,

15ahripazy papua theina biehneina a pie ei.

16Chazy cha Pity tahpa ta moh a bipa Saimaw,

17Tôkalôhpa sawzy tahpa ta ama moh a bipa Zebâdi sawchapawpa Zâmie nata a unawhpa Zawhâna,

18Adaru, Phili, Bâthawlawmu, Mathai, Thawma, Alphu sawchapawpa Zâmie, Thâdia, Kâna chyhsa Saimaw nata

19ano a patusatuhpa Zudâh Iskari zy ama châ.

20Zisu cha o lâ a di ta. Chyhsa hluhpi a hnohta a vypakhy heih ei ta, chavâta Zisu nata a pachupazy cha pati chhao nie hmâ khao leipa ei ta.

21A chhôhkhazy ta cha thâtih cha ama thei nahta, “A palôh â ki khao ei vei chuh,” tah ei ta, a chhi awpa ta sie ei ta.

22Zerusale tawhta ryhpa pachutuhpa a zupazy ta, “Belzebu a hneipa a châ hih, ahripa bei a châpa vâta ahripazy a papua theipa a châ hih,” tah ei ta.

23Zisu ta âmo cha aw ta, ama hnohta pakhona bie hmâpa ta bie reih ta, “Kheihta ma Sâtâ ta Sâtâ a papua thei aw?

24Khinarâh chhao anosasyh ta â dyuh khiahta cha kheihta â duah thei aw?

25Chhôhkha nata chhôhkha a dyuh ei sala, cha chhôhkha cha a duah thei aw vei.

26Sâtâ chhao anosasyh ta â dyuh khiahta cha, a pachhaih aw ta, a duah thei aw vei, a leidia aw.

27Ahy hmahta chyhsa thatlôpa o liata a ngiapa ta a sôhzy hrao a chhuah sala, chyhsa thatlôpa cha a chahry ha tua leipa ta cha hrao thei aw vei. A chahry khai tawhta a o cha a hrao thei aw.

28Hmeiseihta ta ei cha chho ei, chyhsa sawzy moleina zydua nata reipachhiena bie ama reipa zydua a ngiahthai theipa a châ.

29Thlahpa Pathaihpa a reipachhiepa deikua cha, khati nota hmahta a ngiahthaipa châ aw vei, tlyzaw moleina liata thaileichâpa ta a y,” tah ta.

30“Thlahpa chhiepa a hneipa a châ,” ama tahpa vâta, cha bie cha a reipa a châ.

31A nô nata a unawhzy ano lâ a vy ei ta, khôtho liata a duah ei ta. Chyhsa tuapa ta, za paawsa ei ta.

32A kiapâh liata zawpi a tyuh hôlô ei ta, a hnohta, “Na nô nata na unawhzy ta cha tlua ei ta, khôtho liata ama y,” tah ei ta.

33Zisu ta âmo cha a chhy ta, “Ei nô nata ei unawhzy cha ahyzy ma ama châ?” tah ta.

34A kiapâh liata a tyuhpa, ano a chadô thlâh hapazy cha moh ta, “Hezy he ei nô nata ei unawhzy cha ama châ!

35Ahy rai Khazohpa khopa a taopa maih, chazy tlai cha ei unawhzy, ei sietanôzy, ei nôzy ama châ,” tah ta.

← Chapter 2 Jump to: Chapter 4 →