Micah 1

Chin (Mara Bible RV (BSI))

Jump to: Chapter 2 →

1He he Zudâh bei Zôthâ, Ahâza nata Hezekia zy amâ bei nota, Môrese khihpa Mikâ hnohta Samâri nata Zerusale kyh Abeipa bie a vaw tlôpa a châ.

2Hy phopizy saih u, thei u la, Nama zydua ta thei teh u; Hy leilô y, nathlie la, A chhôh lia a ypa zydua chhao nathlie teh u. Abeipa Zehôvâh ta cha leih ei ta, Abeipa ta Achhyna o pathaihpa tawhta a cha leih ei.

3Pachâ teh u, Abeipa cha a yna tawhta vaw pua ta, Za chô aw ta alei su sâhpazy phei ta a tly aw.

4Mei liata kheihlôh a zaopa hawhta, Pâdawhpa liata ti a chakhaopa hawhta, Tlâhpizy cha ano ry liata zao aw ei ta, Saikaozy ama kaichheih aw.

5Cha zydua cha Zakaw paraona vâta châ ta, Izarei phopi moleina vâta a châ. Zakaw paraona cha khâpa maw? Samâri châ vei ma? Zudâh su sâhpa cha khâpa maw? Zerusale châ vei ma?

6Chavâta Samâri cha, Lyu liata apuapa pahmaohna ta tao aw na ta, Kre lo nawpa su ta ei tao aw; Alôzy Saikao lâ pahluah aw na ta, Â bônazy ei palâsa aw.

7A nothlahpa khazoh zydua cha, Pakeichheih khaipa châ aw ta, A hlao zydua mei ta rao khaipa a châ aw. A nothlahpa khazoh zydua cha, Ei parao khai aw; Âzuahnô ta â zuana ty hmâpa ta A pahmaohpazy châ ei ta, Âzuahnô ty châta hmâ heihpa ama châ aw.

8Cha vâna chata chapa ta ei rôh aw; Chysia pahluh aw na ta, Thluahruapa ta ei y aw; Changie hawhta chaphôhtu aw na ta, Pavawpi hawhta mâchhie ei sa aw.

9A hmah patlâh thei awpa châ khao vei; A hmah ta Zudâh tlô ha ta, Zerusale liata ei phopi thokhy chhikao taih a tlô haw.

10Kâthâ liata chho leipa u la, A cha rai ta cha khah u; Bethâpharâ khihpi liata Dohlei liata a hluah teh u.

11Hy Saphi mo saih u, Thluahruapa ta sie u la, Nozapa ta sie syulyu ha teh u. Zanâ mo cha vaw pua veih ei; Betheze liata chaphôhtuna y ta, Chavâta cha bao thei khao aw vei.

12Abeipa tawhta chhiena vaw tlô ta, Zerusale thokhy chhikao a vaw tlô hapa vâta, Marô mo cha ngiatiah leipa ta Hmo phapa ama hâ.

13Hy Lakhi mo saih u, Arâzy cha talailih liata buh teh u; Lakhi cha Zaio sawchanô moleina athaona a châ; Izarei moleinazy cha, Nâma liata hmôpa châ tlôh ta.

14Chavâta Môrese Kâthâ hnohta Pathliena hmo pie aw chi ta, Akazi ozy cha, Izarei beizy châta dôveina hmo a châ aw.

15Hy Mâresâ mo saih u, Châ pahnietuhpa a vaw chhi heih aw na ta, Izarei rônahna cha Adulâ taihta a vaw tlô aw.

16Na sâ a ngyupa ta na luh a papôlô teh; Na saw mopakiapazy cha, Seichâna lâ ama cha siesai awpa vâta, Vâkhieh hawhta na luh a papôlô teh.

Jump to: Chapter 2 →