Micah 3

Chin (Mara Bible RV (BSI))

← Chapter 2 Jump to: Chapter 4 →

1Chatawhcha hetana heta ei tah: Nâmo, Zakaw pathla luhpazy nata Izarei phopi ryureituhpazy saih u, He bie he thei teh u! Adona cha nama pahno awpa châ vei ma?

2Nâmo, hmo phapa a hao ei chi ta, Hmo chhiepa a pasôpazy; Nâmo, ei chyhsazy vo hlaih ei chi ta, Ama ruzy tawhta ama sa a kaopazy;

3Nâmo, ei phopi sa nie ei chi ta, Ama vo pahluh ta ama ruzy thliepachhôpa ta, Beih liata chho awpa sa hawhta, Sa chhona beih liata sa hawh tlai ta Ei phopi a pachhaih khaipazy saih u, Adona cha nama pahno awpa châ vei ma?

4Cha tina cha Abeipa pado aw ei ta, Châhrasala âmo chyh-ei aw vei; Ama hmotaopazy cha moleina a châpa vâta, Âmo tawhta a hmia a nyu ha aw.

5Ei phopi a chhi chheipa hrohsopazy kyh liata, Abeipa ta hetana heta a tah: Nie awpa ama hnei nota, Adyhna phuah ei ta; Ama pakah pabie awpa a hnei leipazy hnohta, Adyuhna ama phuah tyh.

6Chavâta zâ cha vaw chhi thlu aw ei ta, Aluahna hmô khao aw veih ei chi; Zohna ta cha vaw khu aw ei ta, Pachaona tao thei khao aw veih ei chi. Hrohsopazy chô liata noh tla aw ta, Nohchhô chhao ama chô liata zohna a châ aw.

7Hrohsopazy nohzaopa ta y aw ei ta, Peihthaipazy nozapa ta ama y aw.

8Kei deikua cha Zakaw hnohta a paraona phuah ta, Izarei hnohta a moleina phuah nawpa ta, Hmotaotheina ta ei bie; Abeipa Thlahpa ta bie na ta, Adona nata thatlôna ta ei bie.

9Nâmo, Zakaw pathla chhituhpazy saih u, Nâmo, Izarei phopi ryureituhpazy saih u, Adona a hao ei chi ta, Apatlâpa a pakosapazy saih u,

10Thisaih ta Zaio padua ei chi ta, Moleina ta Zerusale a paduapazy saih u; He bie he thei teh u.

11Khihpi chhituhpazy ta Panaopapana ta ryureih ei ta, A theihthaipazy ta Ty hneipa ta ama pachu; Hrohsopazy ta tâkâ hmô nawpa ta Pachaona rai ama hria tyh; Chatanachôta Abeipa liata a pahnieh ei ta, “Eima hry liata Abeipa y vei ma? Eima chô liata chhiena vaw tlô aw vei,” Ama tah tyh.

12Chavâta nâma vâta, Zaio cha leipalie hawhta paliepa châ aw ta; Zerusale cha raona a pachona su a châ aw; Achhyna o tlâh chhao, Râhmâhpa tlâh lâta â lie aw.

← Chapter 2 Jump to: Chapter 4 →