Nahum 1

Chin (Mara Bible RV (BSI))

Jump to: Chapter 2 →

1He he Ninivâ kyh liata biephuahpa, Ekôsah chyhsa Nâhu ta aluahna a hmôpa a châ.

2Abeipa cha hiatlia a pasapa Khazohpa châ ta, Phuh a lapa Khazohpa a châ; Abeipa cha phuh lana nata pathiiana ta a biepa châ ta, Abeipa cha a khakhaipazy chô liata phuh la ta, A chariahpazy châta pathiiana a pachôtuhpa a châ.

3Abeipa cha hiehâhna kyh liata nainôsôpa châ ta, Hmotaothei ngaitapa a châ; Hmoparaopa deikua cha, Thai pachâ beih aw vei. Khisô nata thlihpipa liata a lâpi y ta, Meihdozy cha a phei doh a châ.

4Tilaipi rapa ta pakua ta, Chavah zydua a pakua khai; Bâsanâ nata Kâmel raoh ei ta, Lebanaw pawpi a uah.

5Ano hmiakô liata la, Tlâhpizy a sih ei ta, Tlâhthlôhzy ama zao khai; Ano mohmô liata la, Alei chhao he a chalyu ta, Khizaw nata a chhôh liata a ypa zydua amâ chalyu.

6A ruchhôna ahy ma a dao thei aw? A hiehâhna rupa ahy ma a tao thei aw? A pathiiana cha mei hawhta patlaipa châ ta, Lôpanôzy a patlaw khai haw.

7Abeipa cha pha ta, Nôpona noh ta thokhy a châ; Ano liata chhaipazy a pahno ei.

8Châhrasala tisaih patlôsa aw ta, A khakhaipazy a pahleipadia khai aw; A chariahpazy chhao, Zohna lâ a chadaipai khai aw ei.

9Khazia Abeipa cha nama tei tly? Tlokhuh chhâna patlôsa aw ta, Ano a thyuhnao chaneipa chariahpa y aw veih ei.

10Ahloh buh a chaviapa hawhta châ ei ta, Sahma doh ta a paripa ama lyu; Sâhkô raohpa hawhta pakâ khaipa ama châ.

11Nâ tawhta chyhsa pakha vaw pua ta, Abeipa a tei paru; Ano cha ryhraotuhpa moleipa a châ.

12Abeipa ta hetana heta a tah: “Ama thatlôpa ta hluh kaw hra ei sala, Chhawh pathlahpa châ aw ei ta ama thi aw; Cha vaw pasasa ha hra aw sah la, Cha pasasa heih khao aw va na.

13Tahmâ cha a raopaky cha thliepa aw na ta, Na bâliazy ei chhie pachhô bâ aw.”

14Abeipa ta nâma kyh liata Hetana heta bie a pie haw: “Na moh y zôzaw khao aw vei; Nothlah khiepa nata nothlah leihpa zy cha, Na khazohzy o tawhta ei chhawh pathlah ha aw. Zakhei nâ chhih tu hapa vâta, Na thlâ ei cha chaopa aw.

15“Moh teh u, tlâhpizy liata thâtihpha vaw tlôkhei ta, Adyhna bie a vaw phuahtuhpa pheizy huh! Hy Zudâh, na kyhchhizy tao lymâ la, Na bietaizy patlô mah y; Moleipa cha tlokhuh chhawh pathlah hapa châ ta, Cha chapia heih beih khao aw vei.”

Jump to: Chapter 2 →