Nahum 2

Chin (Mara Bible RV (BSI))

← Chapter 1 Jump to: Chapter 3 →

1Hy Ninivâ, papaituhpa ta a cha vaw siehnao. Na thokhyzy liata chyhsa soh la, Lâpi vaih teh; Na chai a saih la, Na tha zydua pachhi teh.

2Hraotuhpazy ta Zakaw pathlazy hrao ei ta, A chiahzy ama parao hapa vâta, Abeipa ta Zakaw rônahna cha, Izarei rônahna hawhta a paduapathi hai.

3A pasaiphazy vyhphao cha a saihpa châ ta, A pheisaihzy cha saihlawpa ta amâ tobi. Hrâsie awpa ta â chhuanohna noh liata cha, Thua talailih patliepazy vaw pua ei ta, Meisah vyhpa aseizy amâ chaba.

4Talailihzy khiliah liata thachahra ta a râ ei ta, Tlyliahzy liata amâ râhreih. Meirei hawhta khaih ei ta, Dôhla hawhta ama pathli.

5Ninivâ ta a pheisaih hyutuhpazy aw ta, Châhrasala ama siena liata amâ chapia. Khihpi thokhy lâ a râ ei ta, Avaina pâhchhô ama padua.

6Chavah chhikaozy pahypa châ ta, Abei o cha a zao khai haw.

7Abeinô hmô ei ta, Ama siekhei haw; A seichanôzy chaphôhtu ei ta, Ama chachôhna a chôpa ta, Vachhuh hawhta amâ hrô.

8Ninivâ cha ti ta â râsaipa Tipo hawhta a châ bâ. “A duah teh! A duah teh!” tah ei ta, Châhrasala ahy hmahta hnôh lâ a heih veih ei.

9Tâkâ hrao u la, Ngôh hrao teh u! Ryusôhpa chhâ tiah leipa ei ta, Sôhthih nata hmo sôhpazy chhâ tiah vei.

10Roryhrapa ta y ta, Roryhrana nata raona ta a bie; Palôhzy zao ta, Pakhuzy â chakhyh; Chai zydua pasa ta, Hmia zydua a hlâh khai haw.

11Chakeibarôhneipa lôkhaoh cha, Khataih liata a y? Chakeibarôhneipa lochopazy lao niena su cha, Khataih liata a y? A pachisa awpa y leina Chakeibarôhneipa tawzy yna su, Chakeibarôhneipa tôhpa nata chakeibarôhneipa panô pangaina su cha, Khataih liata a y?

12Chakeibarôhneipa cha, A tawzy nie khi ta sazy hriechheih ta; Chakeibarôhneipa panôzy châta sa a riesao tyh; A lôpuzy cha sa taipa ta pabie ta, A lôkhaohzy cha sa hriechheihpazy ta a pabie.

13“Pachâ teh, ei châ dyuh na,” Pheisaihzy Abeipa ta a tah. “Na talailihzy rao aw na ta, A khuh ta ei pakhusa aw; Na chakeibarôhneipa lochopazy chhao, Zaozi ta pahleipadiapa ama châ aw. Sa na tai awpazy cha, Alei tawhta pachhâsa aw na ta, Na lyuhchâpazy ao theipa châ khao aw vei.”

← Chapter 1 Jump to: Chapter 3 →