Zechariah 13

Chin (Mara Bible RV (BSI))

← Chapter 12 Jump to: Chapter 14 →

1“Cha noh liata, ama moleina pathai nawpa nata ama puana pasi nawpa ta, Dâvi pathlazy nata Zerusale mozy lâta tihnawh pahypa a châ aw.”

2“Pheisaihzy Abeipa ta hetana heta a tah: Cha noh liata khazoh nothlahpa mohzy cha râh tawhta phie aw na ta, a thei thlâh khao aw veih ei. Hrohsopazy nata thlahpa puapazy chhao râh tawhta ei papua khai ha aw ei.

3Cha khai tawhta chhochhieliena bie a reihpa ama y thlah ha chy khiahta cha, a nô nata a paw, ano a satuhpazy cheingei ta a hnohta, ‘Hroh khao aw va chi, Abeipa moh ta haipa bie na reipa vâta,’ tah aw ei ta, chhochhieliena bie a rei hai no tlai ta ano a satuhpa a nô nata a paw cheingei ta amâ chôsao aw.

4Cha noh liata cha, hrohsopa ta ano aluahna hmôpa nata ano cheingei ta chhochhieliena bie a reipazy cha zakhei aw ta, hrohsopa sahmi viahkao pasipa chhao, chyhsa dôvei nawpa ta a ky khao aw vei.

5‘Hrohsopa châ va na, lei palietuhpa châ na ta, ei thyutlia no tawhta chhaohlei he ei nietluana a châ’ a tah aw.

6Chyhsa ta, ‘Na ky liata hmahzy kha kheihta a hmôpa ma na châ tly?’ tahpa ta a hiahri khiahta cha, ‘Ei viasazy o liata hmah ei hmôpazy a châ,’ tahpa ta â chhy aw.”

7“Hy Zaozi, a hra teh; Ei mietaku vaituhpazy a dyuh la, Nâ chakaotuhpa a dyuh teh,” Pheisaihzy Abeipa ta a tah. “Mietaku vaituhpa tu la, Mietakuzy pai aw ei ta, Mietakutawzy chô liata ei ku ei pazawh aw.

8Râh pôhpalôhpa liata, Su thôh su no chhawh pathlahpa ta thi aw ei ta, Su thôh su kha ahrohpa ta pahlôhpa ama châ aw.

9A su thôhna cha mei ta ei pasia aw ei; Tâkâ pathaisapa hawhta pathaisa aw ei na ta, Ngôh pasiapa hawhta ei pasia aw ei. Ei moh pado aw ei ta, Ei chhy aw ei. Kei ta, ‘Ei phopi ama châ,’ tah aw na ta, Âmo ta, ‘ Abeipa cha eima Khazohpa a châ,’ ama tah aw,” Abeipa ta a tah.

← Chapter 12 Jump to: Chapter 14 →