Zechariah 9

Chin (Mara Bible RV (BSI))

← Chapter 8 Jump to: Chapter 10 →

1Abeipa aluahna bie ta Hâdarâh râh a dyuh ta, Dâmaskâ cha â pahâna su a châ. Abeipa mokhaoh cha chyhsapa chô liata a choh ta, Izarei chi zydua chô liata â choh thlâh haw.

2Ama râhri liata a ypa Hâmathi chô liata chhao a choh ta, Tyre nata Sidaw chô liata chhao â choh thlâh haw, Ama so kaw tarawpa ta.

3Tyre cha thokhy a taopa ta, Dohlei hawhta tâkâ pathlu ta, Khiliah chiatlao hawhta ngôh a pathlu.

4Châhrasala moh teh u, Abeipa ta a hneipazy a lapa aw; Tilaipi liata a thatlôna parao aw ta, Mei ta a kâ khai aw.

5Askelaw ta cha cha hmô aw ta, A chi kaw aw; Kâza chhao ta hmô aw ta, Pasa tah ngaitapa ta â taikalô aw; Ekaraw chhao â taikalô hra aw, A hnabeiseihna a lei hapa vâta. Kâza cha abeina pahlei aw ta, Askelaw liata chyhsa pahrâ khao aw veih ei.

6Kâpiapazy ta Asadô khih pahrâ aw ei ta, Philistia mo apalaikheipa chhao, Ei chhawh pathlah aw.

7A pakah tawhta a thisaih thy aw na ta, A hâh tho tawhta hmo pasichhihpazy ei thaoh aw. Ano chhao eima Khazohpa châta laibâhpa châ aw ta, Zudâh chi liata pho kha hawhta a châ aw; Ekaraw chhao Zebu mo hawhta a vaw châ aw.

8Hrâsiepazy tawhta vaih awpa ta, Ei o liata riehmo ei paryh aw; Chatanachata ama siena lâta tlyma, Amâ liena lâta tlyma, A siehnaopa y khao aw veih ei. Tahmâ cha keima mo tlai ta ei vaih ha awpa vâta, Tlybaituhpa ta sie thlu khao aw vei.

9Hy Zaio sawchanô, thapha ngaitapa ta y la, Hy Zerusale sawchanô, thata awh teh! Moh tua, na bei cha nâ lâta â vy hai; Mosiapa nata pachhatuhpa a châ; Areisipa ta alâ vaw kiah ta, Alâtaw, alâ panô taw tlai vaw kiah ta â vy.

10Epharai tawhta talailih chhawh pathlah aw na ta, Zerusale tawhta adyuhna arâ ei chhawh pathlah aw; Adyuhna libaw thlie pachhôpa châ aw ta, Phopizy hnohta adyhna bie a phuah aw; A ryureina cha tilaipi tawhta tilaipi taihta châ aw ta, Chavah tawhta khizaw kaokih chhâna taihta a châ aw.

11Nâma kyh liata chhao, Na hnohta ei hraipa ei biehrai thisaih vâta, Na chyhsa atâhpazy cha, Ti y leina khaohtlô tawhta ei thaoh papua aw ei.

12Hnabeiseihna a hneipa atâhpazy saih u, Nama thokhy lâ kua teh u; Tanoh tlai ta ei phuah, A lie no ta ei cha thô aw ei.

13Zudâh cha ei libaw châta a kei na ta, Epharai cha a châtai ta ei tao haw. Hy Zaio, na sawchapawzy ei pathyu aw, Hy Krikâh, na sawchapawzy ei dyuh aw, Pasaipha zaozi hawhta ei cha pahieh aw.

14Abeipa ama chô liata a vaw luah aw ta, A châtai dôhla hawhta a pathli aw; Abeipa Zehôvâh ta chiahmie tô aw ta, Chho khisôzy chhaota hrâ a sie aw.

15Pheisaihzy Abeipa ta âmo cha vaih aw ta, Cheisiah lôzy hmâpa ta ama chariahzy pahnie aw ei ta, Ama parao aw; Doh aw ei ta, Kresawhti paripa hawhta ama palopasah aw; Biebuh hawhta ti ta pabiepa châ aw ei ta, Maisâh kizy hawhta dâ kaniehpa ta ama y aw.

16Cha noh liata, A phopi mietaku zaw hawhta, Abeipa ama Khazohpa ta Âmo cha a pachha aw ei; Chatanachata beilakho liata lôsôhpazy hawhta, A râh liata ama khaih aw.

17Kho amâ chhih awpazie nata amâ ngia awpazie rimâ cha! Kôvei phapa ta satliazy pasosâhsa aw ta, Kresawhti thiehpa ta laihsazy a pasosâhsa aw.

← Chapter 8 Jump to: Chapter 10 →