1 Chronicles 25

Chin SCB2 (Syin Chin Bible)

← Chapter 24 Jump to: Chapter 26 →

1David kumpipa le Levi lampuite in a nuai a Levi bee le phungte sia biakna lampui tu in teal a: Asaph, Heman, le Jeduthun te ahi hi. Amate sia tengtongh le daalkopsai tumna taw thua in Pathian thu thangsak tute ahi hi. Hi sia in a pawl sim ii biakna vawtzia zui a, lampui tu in a kiteal mihingte min tepteena ahi hi:

2Asaph tapa li teng: Zaccur, Joseph, Nethaniah, le Asharelah te ahi hi. Amate sia Asaph khutnuai hi a, ama sia kumpipa ii thupiak simin Pathian thu a thangsak pa hi.

3Jeduthun ii tapa luk teng: Gedaliah, Zeri, Jeshaiah, Shimei, Hashabiah, le Mattithiah te ahi hi. A pa sawl bangin amate in tengtongh te tum kawmin Pathian thu thangsak a, Topa tungah pokna le lungdamkona lasak uh hi.

4Heman tapa sawm le li teng: Bukkiah, Mattaniah, Uzziel, Shebuel; Jerimoth, Hananiah, Hanani, Eliathah, Giddalti, Romamti Ezer, Joshbekashah, Mallothi, Hothir, le Mahazioth te ahi hi.

5Pathian in a kamciamsa om bangin kumpipa ii kamsaangpa Heman tungah vaang a piakna in hi tapa sawm le li, le tanu thum te zongh pia hi.

6Biakinn biak kikhopna ah a pa sawl bangin lampui in a tapate theampo in tengtongh le daalkopsai te tum uh hi. Asaph, Jeduthun, le Heman te sia kumpipa thupiak bangin ngamta uh hi.

7Hi pasal 24 sia a vekpi in music vai a thiam mamate ahi hi; tuaciang a nasep pui Levi te sia music sinsa te veu hi. A vekpi in pasal 288 pha hi.

8Nasep a kisee ciang khangmoi ahizong, khanghaam ahizong, a thiam sate ahibuale, a sin tuungte ahizong a vekpi in lai meetang sawk tek hi.

← Chapter 24 Jump to: Chapter 26 →