1 Chronicles 29

Chin SCB2 (Syin Chin Bible)

← Chapter 28 Jump to:

1David kumpipa in a kikhawmte theampo tungah, “Ka tapa Solomon sia Pathian tealsa hi, ahihang ama sia khangmoi lai a, a heakna kisam lai hi. A nasep tu sia thupi mama hi banghang ziam cile mihing atu kumpi inn a sa hi ngawl a, Topa Pathian atu biakinn sa hi.

2Ka hi zawkza in Biakinnpi sak natu vanhte — khamh, ngunn, taau, thik, thing, suangmanphate le gem suangte, a zepna suangnamte le marble tam ma ka kinging zo hi.

3Hi ka kholsa vanhte bek dom ngawlin Pathian Biakinnpi atu ka deisak manin keima aituam neisa khamh le ngunn zongh ka pia hi.

4Biakinnpi pangte zep natu in khamh phabel tann zakhat vaal le ngunn ciitak tann zanii le sawmli dektak sia

5Nasep thiamte ii vawt tu nate theampo atu zongh ka pia zo hi. Tu in akua dang in Topa tungah ngotakin pia nuam lai nu ziam?” ci hi.

6Tuasia ciang bee le phung lutangte, minam uliante, ngalkaphonpi ukte le kumpi neisa vanh zeakte in

7Biakinnpi sak natu in a nuai ah vanhte: khamh tann 170 vaal, ngunn tann 340 vaal, taau tann 620 dektak, le thik tann 3,400 vaal sia a uuk thu in pia uh hi.

8Suangmanpha neite in Gershon bee le phung pan Levi mi Jehiel ii a uk biakinn sum kholna ah pia tek hi.

9Mipite in lawpna taw tazata a tam vanhte Topa tungah a piak sia lungdam uh hi. David kumpipa zongh a lungdam peuma hi.

10David kumpipa in a kikhawm mihonpi bup mai ah Topa pok hi. Ama in, “Ka taanghpupi Jacob ii Topa Pathian awng, a tawntung a tawntungin nangma kipok tahen!

11Nangma sia a lian, a vaanglian, a minthang, a lamdang le a tuanngen na hi hi. Leitung vantung ah a om theampo nangma aa hi a, nangma kumpi na hi a, tuate theampo a ukpipa na hi hi.

12Hauna le nei le lamh theampo nangma kung pan hong pai hi a; na vaangletna le na thahatna taw na theampo na uk hi; tuaciang kuama po a lian le a thahat na suaksak thei hi.

13Tu in ka Pathian awng ka lungdamnate kong ko uh a na minthang kong pok uh hi.

14“Ahitazong kei le ka mite in a tatakin bangma kong pia thei bua uh hi; banghang ziam cile na theampo nangma ii nong piakthong hi a, nangma aa tengma hong pia kik hi bek khu hi.

15Oh Topa, nong heak hi a, ka nuntakna uh sia ka taanghpupite bangma in, saltaangte le khualmite bangin ka nungta uh hi. Ka ni ka hunte sia hong kaantan limh khat bang hi a, thina pan ka suakta thei bua uh hi.

16Oh Topa, kote Pathian awng, na min thiangtho patoai natu biakinn khat sak natu in, hi nei le lamh theampo kong paipui tek uh hi; ahihang tuate theampo sia nangma kung pan hong paite veu hi a, a vekpi in nangma aa ahi hi.

17Mi theampo ii thinsung na ze et a, a citak mite tungah na lungkim hunlam ka he hi. Thumaanna le thinsung takpi taw keima uuk thu in hi teng theampo kong pia zo hi, tuaciang hi munah hong kikhawm na mite in nang kungah biakpiakna hong paipui tu sia bangza in lungdam ziam ci sia ka mu zo hi.

18Ka taanghpupite uh ahi Abraham, Isaac, le Jacob ii Topa Pathian awng, tuabang hong kipiakna sia nangma mite thinsung ah a tawntungin khosak in a, nangma tungah a thumaante ahi natu in keamcing tawntung in.

19Na thupiak theampo a zui zawk natu le hi bangin Biakinnpi a sak natu ka kinginkhol nate taw a sak nop natu in ka tapa Solomon thin le lung sungah uuk takpina hong piaksak ta'n,” ci hi.

20Tua zawkciang David in mipite tungah: “ Topa na Pathian pok vun!” ci in thupia hi. A kikhawm mihonpi bup in Topa a taanghpupite ii Pathian pok in, a lu uh kun in Topa zatakna pia uh a, kumpipa zongh upatna pia uh hi.

21A zing ciang amate in sangaw biakpiakna in ngannote ngo a Topa tungah aap hi, tua zawkciang, a neak tu in mipite pia uh hi. Tuaban ah amate in khuital tulkhat, tuutal tulkhat le, tuuno tulkhat te sia biaknatau tungah a pum bup in sangaw biakpiakna in hal uh hi. Amate in sapittui biakpiaknate zongh paipui uh hi.

22Tuabangin tua ni in amate sia Topa mai ah anne tuidawn in lungdam ngualnuam mama in om uh hi. Amate in Solomon sia kumpi in a nii veina in thangsak uh hi. Amate in Solomon sia a ukpa tu in Topa min taw sathau noai a, Zadok sia thiampi seamsak uh hi.

23Tuabangin Topa ii kipsak kumpi tokhum tungah a pa David za laih in Solomon to hi. Ama in a cialcing kumpipa khat hi a, Israel minam bup in a thu ni uh hi.

24Uliante le ngalkapte theampo, tuaciang David ii tapa dangte theampo ngawngawn in Solomon kumpipa tungah kong thumaan tu uh ci in kamciam pia uh hi.

25Solomon sia a ngam buppi in kiita in zakta a, Topa in Israel a uk kumpi dang a kuama po sangin a minthang zaw kumpi suaksak hi.

26Jesse tapa David in Israel ngam theampo sia,

27kum 40 sung uk hi. Ama in Hebron khua pan kum sali sung uk a, Jerusalem khua pan kum 33 sung uk hi.

28Ama hau in kizakta a, a khan haam mama zawkciang thi in, a tapa Solomon in a kumpiza laih hi.

29David kumpipa ii taanghthu sia a kipat pan a tawpna dongin kamsaang thumte ahi, Samuel, Nathan, le Gad ii taanghthu khumnate sungah kiciamtee hi.

30Tua tepteenate in a ngam ukzia, vaang a neizia sia ama tung, Israel tung le a kiim a paam kumpi ngamte tungah a piang thute theampo hong lak hi.

← Chapter 28 Jump to: