2 Samuel 8

Chin SCB2 (Syin Chin Bible)

← Chapter 7 Jump to: Chapter 9 →

1Hun tawmvei zawkciang Kumpipa David in Philistine te sim kik in zo ahiciang, amate in a ngam uh uk nawn ngawl hi.

2Tua zawkciang Moab te zo hi. A ngal matte lei ah lumsakin thum sung pan nii veu thatlum hi. Tua ahikom Moab te sia a khutnuai mi hong suakin, ama tungah shia pia uh hi.

3Tuaciang, ama in Syria ngamsung Zobah ngamuk kumpipa Rehob ii tapa Hadadezer sia Euphrates ngun naak sangah ngamukna la kik tu in a paina lampi ah ama in zo hi.

4David in siphu ngalkap 1,700 le, lei ngalkap 20,000 matsak hi. Ama in siphu ngalleang zakhat atu a kicing khom siphu la in, a dang teng theampo a peangbaisak siat hi.

5Damascus a om Syria te in Kumpipa Hadadezer hu tu in ngalkaphonpi khat a paisak le David in tuate simin 22,000 that hi.

6Tua zawkciang ama in amate ngam sungah ngal ngiaphualte saat a, amate sia a khutnuai mite hong suakin, shia pia uh hi. Topa in David sia mun theampo ah ngal zosak hi.

7Hadadezer ii a uliante ii toai khamh lumte David in sut a, Jerusalem ah cia pui hi.

8Ama in Hadadezer ii uk khuapite ahi Betah le Berothai pan taau zongh tam mama la hi.

9David in Kumpipa Hadadezer ii ngalkaphonpi zo zo hi ci in Hamath kumpipa Toi in za hi.

10Toi taw tamvei ma a kido ngei Hadadezer sia David in zo ahikom a tapa Joram in muaksak a, tuabangin a lungdampuina ko hi. Joram in David kungah khamh, ngunn le taau taw a kivawt letsongte puak hi.

11Kumpipa David in tuate sia a zawthal sa ngamte ahi

12Edom, Moab, Ammon, Philistia, le Amalek te tung pan a laaksak ngunn le khamh te le Hadadezer kung pan a laaksak vanh pawlkhatte taw zong kopin biakna ah a zak tu in koituam hi.

13Ci Kuam sungah Edom mite 18,000 a thalupna pan a cia kik ciang David minthang zawkan hi.

14Ama in Edom ngamsung theampo ah ngalkap phualte saat a, tuaciang tua munah a om mite ama ii khutnuai mi suak uh hi. Topa in David mun theampo ah ngal zosak hi.

15David in Israel buppi uk a, a mite thumaan tak le a pha takin a kivawt tawntung natu in uk hi.

16A nu Zeruiah ahi Joab sia ngalkaphonpi a ukpa hi; Ahilud ii tapa Jehoshaphat sia thu tepteena teng a lenpa hi;

17Ahitub ii tapa Zadok le Abiathar ii tapa Ahimelech te sia thiampite ahi hi; Seraiah sia kumpipa zum sung thuzeakpi ahi hi;

18Jehoiada ii tapa Benaiah sia David a cingte a ukpa hi a, David ii tapate sia thiampite ahi uh hi.

← Chapter 7 Jump to: Chapter 9 →