2 Samuel 9

Chin SCB2 (Syin Chin Bible)

← Chapter 8 Jump to: Chapter 10 →

1Ni khat ni in David in, “Saul ii bangkua sung pan a nungta lai om ziam? Tuabang a om le Jonathan hu in dikna lak nuam khi hi,” ci hi.

2Saul ii innkuan naseampa Ziba a kici khat om a, David kungah ama kipaisak hi. “Nang Ziba ni ziam?” ci in kumpipa in dongh hi. “Na naseampa hi khi hi, topa,” ci in ama in zo hi.

3“Pathian tungah kamciamna ka piak bangma, Saul ii bangkua tungah thumaanna le dikna ka lak natu in Saul ii bangkua sungah khat po a kikhe a om ziam?” ci in dongh hi. Ziba in, “Jonathan ii tapa khat om lai hi; Ama a peangbai hi,” ci in zo hi.

4Kumpipa in, “Koi sungah ama om ziam?” ci in dongh hi. Ziba in “Lodebar khua, Ammiel ii tapa Machir inn ah om hi,” ci in zo hi.

5Tua ahikom David kumpipa in ama samsak hi.

6Saul ii tupa, Jonathan ii tapa, Mephibosheth a thet ciang David mai ah zatak pia in kun hi. David in, “Mephibosheth awng,” ci in sam a, ama in “Na naseampa hi khi hi, topa,” ci in zo hi.

7David in, “Lau heak in. Na pa Jonathan hu in nang tungah hong dik tu khi hi. Na pu Saul ii leitang theampo nang kong pia kik tu a, tuaciang nang sia ka sabuai ah an na ne tawntung tu hi,” ci hi.

8Mephibosheth kun kik a, “Kei sia ui thisa khat bang bek hi khi hi, topa awng! Banghangin kei tungah tuaza in hong dik tu ni ziam?” ci hi.

9Tua zawkciang kumpipa in Saul ii naseampa Ziba sam a, “Na topa ii tupa Mephibosheth tungah Saul le a bangkua ii neisa theampo pia khi hi.

10Nang, na tapate le na naseamte in na topa Saul ii innkuanpuite atu tua leitang tho in, lo an tun ciang amate na puak tu uh hi. Ahihang Mephibosheth ahile keima sabuai ah leangna thupi khat hi tawntung tu hi,” ci hi. (Ziba in tapa sawm le nga le naseam kul nei hi.)

11Ziba in, “Kumpipa ii nong thupiak babang ka seam tu hi,” ci in zo hi. Tuabangin Mephibosheth in kumpipa ii tapate khat bangin kumpi sabuai ah an ne hi.

12Mephibosheth in tapano Mica a kici khat nei hi. Ziba ii innkuanpuite theampo Mephibosheth ii naseamte suak siat uh hi.

13Tua ahikom, a peangte ngeal a zaw Mephibosheth sia Jerusalem khua ah teangin, a an neak theampo kumpi sabuai ah ne hi.

← Chapter 8 Jump to: Chapter 10 →