Song of Solomon 6

Chin SCB2 (Syin Chin Bible)

← Chapter 5 Jump to: Chapter 7 →

1A mealphabel numei awng, na it na lawmpa koi sungah pai ziam? Na mu natu kong hu thei natu uh in bang lampi tawn ziam, hong son ta'n.

2Ka ngaino sia balsam thing pona mun a huan sungah pai zo hi, Ama in a tuu honte a huan sungah tha a, unok paakte lo hi.

3Ka ngaino sia keima aa hi a, keima in ama aa ka hi hi. Ama in a tuu honte unok paak sungah tha hi.

4Ka ngaino awng, nang sia Tirzah bangin na mealpha a, Jerusalem khuapi bangin ithuai in, hi khuapi liante bangin na mealphatna in husan ngawngawn hong tawpsak tha liang hi.

5Na mittangte kei sang panin heam in, tuate in kei hong cimawsak hi. Na samte sia Gilead mual pangh suk ah keal honte tai valet bangin kithing hi.

6Na hate sia a kisilthiang tuu honte bangin paak hi. Khat beak zongh a peuhe om ngawlin kikim diimdiam hi.

7Na mai sealna dial nungah na biangkhote san sitset hi.

8Kumpipa in zi sawmluk, zino sawmliat, a kisim zo ngawl ngaknu moi nei tahen!

9Ahihang keima in khat bek ka it a, ama sia vakhu khat bangin ithuai hi. Ama sia a nu ii tanu khat bek a nei hi a, a nu ii a it mama tanu ahi hi. Numei theampo in ama en in pok uh hi; a zi le a zinote in ama pokna lasa uh hi.

10Zingsang khuavak taw a kibang hisia nu akua ziam? Ama a mealpha a, taang hiihee a, ni bang tha bangin tee hi.

11Ngamkuam sungah thingnote en tu, sapitkung tungah a teeno suakte en tu le talee kung tungah a paakte en tu in Almond kungte sungah ka paisuk hi.

12Siphu ngalleang hawlpa ii ngal sim tu lawpin a liin bangin nang kong it hu in ka liing hi.

13Shulam ngaknu awng, laam in, laam in, Na lap kong en tu uh hi. A ngual a ngual a hong en te ii kilaklaw ah ka lap sia banghangin hong en nuam nu ziam?

← Chapter 5 Jump to: Chapter 7 →