Song of Solomon 8

Chin SCB2 (Syin Chin Bible)

← Chapter 7 Jump to:

1Nang sia ka nu ii a noai taw a vaak ka suapuipa hi lete kong oai hi. Tua hile lampi ah kisi in kong namh zong kuama in hong awlmawk ngawl tu hi.

2Ka nu ii inn ah hong ciapui leng a ki itna zia hong hil lete uuk ing. Na neak tu in sapittui namtui le talee tui kong pia tu hi.

3Na baan veisang nong khamhsak a, na ziatsang khut taw nong koai hi.

4Jerusalem numeite awng, ka ki itna uh nong pheltan ngawl natu uh in kei kamciam hong pia tavun.

5Sennealngam panin a lawmpa taw a kikoai sa in hong pai sia akua ziam? Na suana mun ahi apple kung nuai pan, nang kong phong hi.

6Keima simngawl kuama dang it heak in a, keima simngawl kuama dang koai heak in. Ki itna sia thina bangza in vaanglian a, kingaina zongh thina za in kho hi. Ki itna sia mei bangin kuang a, kaanghmei bangin lengkeak hi.

7Ki itna meikuang sia tui in tulmit zo ngawl a, namthuam in khuum zo ngawl hi. Ahizong khat po in a hauna taw ki itna lei a sawm le simmawkna bek nga tu hi.

8Suapui numeino khat ka nei uh a, a noaite no lai hi. Tangvalno khat hong pai in ama a heal ciang ka suapuinu atu bang vawt tu khu ziam?

9Ama luphung khat hile ngunn tausaang khat ka saksak tu uh hi. Ahizong ama kongpi khat hi le cedar thing pheakte taw ka dal tu uh hi.

10Keima in luphung ka hi a, ka noaite sia a tausaangte ahi hi. Ka ngaino in ama taw lungkimna le thinnopna ka nei sia he hi.

11Baal Hamon a kicina munah Solomon in sapithuan khat nei hi. Ama tung pan lo a saap lotho pawlkhat om hi, amate khat simin ngunn dangka tulkhat tek pia hi.

12Solomon awng na ngunn dangkatang tulkhat la in a, lothote tungah amate tel tu a zaa nii pia in. Kei ka hi le keima aituam sapit huan khat ka nei hi!

13Ka ngaino awng, huan sung panin na aw hong zasak ta'n, ka kithol puite in na pauna aw za tu in hong ngak hi.

14Ka ngaino awng, saza khat bangin, hel namtuite pona mualtung ah a om, sangaital moi khat bangin ka kungah hong pai ta'n.

← Chapter 7 Jump to: