1 Corinthians 2

Chin TBR17 (Tedim Bible Revision 2017)

← Chapter 1 Jump to: Chapter 3 →

1Sanggamte aw, Pasianʼ thu hilhin note kiangah kong pai lai-in, mipilteʼ zat kam thuk pipi le pilna kamte ka zang kei hi.

2Bang hang hiam cih leh note kiangah ka om laitakin singlamteh tungah Jesu Khris a sihna thu sim loh thudang peuhmah ngaihsut loh dingin ka ngaihsut sa ahi hi.

3Tua ahih manin note kiangah kong pai lai-in thaneemin, launa tawh ka liing a,

4thu kong hilh ciangin zong leitung mipilteʼ zat kammalte le siamnate ka zang kei a, Pasianʼ Kha Siangtho vangliatna tawh thu kong hilh hi.

5Tua ahih manin noteʼ thu upna pen mihingteʼ pilna hang hi loin, Pasianʼ vangliatna hangin a um na hi uh hi.

6Ahi zongin kha thu lamah a khangham mite tungah pilna thu ka gen hi. Tua ka gen pilna pen tu-in a maimang kuankuan ta ding hih leitung miteʼ pilna le vangliatna thu hi lo hi.

7Tua ka gen pilna thu pen miteʼ theih lo dingin Pasian in a ipcip Pasianʼ pilna thusim hi a, eiteʼ minthan nadingin leitung pianmapekin Pasian in a na koih sa thu ahi hi.

8Hih leitung a uk mite kuamah in hih pilna thu thei lo uh hi. Thei hi le-uh, a minthang Topa pen singlamteh tungah na that lo ding uh hi.

9Tua ahih manin Lai Siangtho sungah, “Kuamah in a muh ngei loh, a zak ngei loh, piang thei dingin zong a ngaihsut loh uh thu pen Pasian in amah a it mite adingin a bawl kholh sak sa ahi hi,” ci-in na kigelh hi.

10Ahi zongin Pasian in a Kha Siangtho tawh eite tungah tua thusim a hong langsak hi. Tua Kha Siangtho in na khempeuh kan khia a, Pasianʼ ngimna a ki-imcip a thu tawng dong takin a kan khia hi.

11Mihing khatʼ ngaihsutna pen ama lungsim bek mah in a theih mah bangin Pasianʼ Kha Siangtho bek mah in Pasianʼ thu a cingin a thei hi.

12Eiteʼ ngah lungsim pen leitung miteʼ lungsim hi lo a, Pasian in eite tungah a hong piak na khempeuh i theih nadingin Pasianʼ hong piak Kha Siangtho lungsim ahi hi.

13Tua ahih manin hih bangin thu kong gen uh ciangin zong, mihingteʼ hong hilh pilna kamte a zang hi loin, Kha Siangtho a nei mite tungah kha tawh kisai thu ka gen uh ciangin Kha Siangtho in a hong hilh kammalte zangin a gen ka hi uh hi.

14Ahi zongin Kha Siangtho a nei lo mite in Pasianʼ Kha Siangtho in a hong piak nate sang thei lo uh hi. Kha Siangtho a nei mite bek in theithei uh ahih manin amaute in tel thei lo uh a, amau adingin a haihuai thu khat ahi lel hi.

15Kha Siangtho a nei mite in na khempeuh theithei uh a, ahi zongin leitung mite in bangmah thei lo uh ahih manin a lungmang uh hi.

16Tua ahih manin Lai Siangtho in, “Kua in Topaʼ lungsim thei a, ama gamtat nading lam lak thei ahi hiam?” na ci hi. Ahi zongin eite in Khris lungsim i nei hi.

← Chapter 1 Jump to: Chapter 3 →