1 Corinthians 7

Chin TBR17 (Tedim Bible Revision 2017)

← Chapter 6 Jump to: Chapter 8 →

1Tu-in nong laigelhna uh thu tawh kisai-in: Pasal in zi nei kei leh hoih zaw lo ding ahi hiam, na ci uh hi.

2Ahi zongin numei tawh paktatna tam lua ahih manin pasal in ama zi tuam nei henla, numei in ama pasal tuam nei leh hoih hi.

3Pasal in a zi a luppih dingin a kilawm zahin luppih dinga, a zi in zong a pasal a luppih dingin a kilawm zahin a luppih ding ahi hi.

4Zi in ama pumpi a ut bangin zang thei nawn loin a pasalʼ zat ding hi a, tua mah bangin a pasal in zong ama pumpi a ut bangin zang thei nawn loin a ziʼ zat ding ahi hi.

5Thungetna-in hun na zat theih nadingun tawl khat sung tuam om ding thukim khawm masa lopi-in lup khop ding kinial kha kei un. Tua bangin tawl khat sung na tuam om khit uh ciangin noteʼ pumpiʼ deihna hangin Satanʼ ze-etna sungah na puk khak loh nadingun a ngeina bangin lup khop ding kipankik un.

6Hih bangin kong gen ciangin a hoih pen hi, ci-in thugenna hi lo a, noteʼ pianzia tawh kizui-in hi thei tei hi, cihna lel ahi hi.

7Mi khempeuh keimah bangin om ciat le-uh hoih ka sa hi. Ahi zongin mi khempeuh in Pasianʼ piak hih zawhna a tuamtuam nei a, khatlekhat kibang lo hi.

8Pasal nei nai lote le meigongte pen keimah bangin tanggawl om paisuak le-uh hoih ka sa hi.

9Ahi zongin a pumpi uh a ki-uk zawh kei ding uh leh pasal nei le-uh hoih zaw hi. Nei nuam pipi a neih loh tentan sangin pasal neih hoih zaw hi.

10A nei sate tungah, keiʼ ngaihsutna hi lo, Topaʼ ngaihsutna ka gen nop thu in: Zi in a pasal ciah san kei tahen.

11A ciah san leh zong pasal nei loin om paisuak hen. A om paisuak zawh kei leh a pasal ngei mah zuankik hen. Pasal in a zi ma kei tahen.

12A dangte tungah, Topaʼ cih hi lo, keima ngaihsutna ka gen nop thu in: Mi khatpeuh in thu um lo mi khat zi-in a neih leh, pasal mahin neih ding a zi a lungkim ahih nakleh ma kei tahen.

13Numei khat in thu um lo mi khat pasal-in a neih leh, zi mahin neih ding a pasal a lungkim ahih nakleh ma tuan kei tahen.

14Bang hang hiam cih leh thu um lo pasal pen a ziʼ hangin thu um mi suak thei dinga, thu um lo zi pen a pasalʼ hangin thu um mi suak thei ding hi. Tua bang hileh a tate uh thu um mi suak thei ding uh hi. Ahi zongin tua bang hi kei le-uh a tate uh thu um mi suak thei lo ding uh hi.

15Ahi zongin thu um lo zi in ahi a, thu um lo pasal in ahi zongin kikhen ding a ut leh kikhen ta uh hen. Tua bang thute ah thu um zi ahi a, thu um pasal ahi zongin a awk nading thu om lo hi. Pasian in nuam takin a nungta dingin a hong sap ahi hi.

16Thu um zi in, “Ka pasal hon khia zo kei ning,” bangci-in cithei dinga, thu um pasal in, “Ka zi hon khia zo kei ning,” bangci-in cithei zenzen ding ahi hiam?

17Mi khempeuh, Pasian in amauʼ nuntak nadingin a sehna le Pasian in a sap laitakin a om zia bangbangun nungta uh hen. Hih bangzia-in om ding pen pawlpi khempeuh ah hilhin ka neih ngeina khat ahi hi.

18Vun ki-at sa mi khat Pasian in a sap leh, a vun ki-atna lim phiat tuan kei tahen.

19Bang hang hiam cih leh vun atna le vun at lohna a thupi hi lo a, Pasianʼ thupiakte zuih ding a thupi ahi hi.

20Tua ahih manin a kuamah peuh, Pasian in a sap laitakun a om zia bangbangun a om paisuak ding uh ahi hi.

21Sila ahi mi khat Pasian in a sap leh phamawh lo hi; sila mahin ki-om thei veve hi. Ahi zongin suahtak theih nading lampi a om leh tua hunhoih hamphatna zang tahen.

22Bang hang hiam cih leh Topa in a sap sila ahi mi pen Topa adingin mi suakta hi a, tua mah bangin Khris in a sap a suakta mi pen Khris adingin sila ahi hi.

23Note pen Pasianʼ hong lei sa na hih manun miteʼ sila suak kei un.

24Tua ahih manin sanggamte aw, hong kisap laitakin na om zia uh mah bangin Pasianʼ sungah na om paisuak un.

25Tu-in a nungak lai a tangval laite thu tawh kisai-in: Topa kiang panin thu ngahna ka neih loh hangin Topaʼ hehpihna tawh a muantaak ahi keima ngaihsutna kong gen ding hi.

26Tu laitakin a om bangun om paisuak leh hoih zaw ding hi, cihna thu tawh kisai-in, tu laitak a lungkham huai thu ka ngaihsut ciangin tu laitakin a om bangun om paisuak leh hoih zaw mah dingin ka ngaihsun hi.

27Ahi zongin zi neite in kikhen ding ngaihsutin nei kei tahen. Nungak lai tangval laite in lawm zong kei tahen.

28Ahi zongin pasal in zi a neih hangin a khial hi lo a, numei in zong pasal a neih hangin a khial hi lo hi. Ahi zongin zi nei, pasal neite in leitung lungkhamna tampi thuak uh ahih manin tuate tawh kipelh zaw le-uh hoih ka sa hi.

29Sanggamte aw, tua bang ka cih ciangin a kiseh hun hong nai mahmah ta hi, ka cihnopna ahi hi. Tua ahih manin zi neite pen zi nei lo mah bangin kingaihsun uh henla,

30a dahte pen a dah lo mah bangin kingaihsun uh henla, a lungdamte pen a lungdam lo mah bangin kingaihsun uh henla, na a leite pen bangmah a nei lo mah bangin kingaihsun uh henla,

31leitung na nuam takin a zangte pen a zang lo mah bangin kingaihsun ta uh hen. Bang hang hiam cih leh hih leitung pen sau veipi kip nawn lo ding hi.

32Note, lunghihmawhna tawh na kipelh ding uh ka hong deihsak hi. Zi a nei lote in Topa a lungdamsak theih nadingun Topaʼ thu bek kinin nei uh hi.

33Ahi zongin zi neite in a zi a lungdamsak theih nadingun hih leitung vai kinin nei uh a,

34a ngaihsutna uh khen nih pha hi. Pasal a nei lo numeite in a lungsim le a pumpi uh Topa adingin zang nuam uh ahih manin Topaʼ nasep bek kinin nei uh hi. Ahi zongin pasal a nei numeite in a pasal uh a lungdamsak theih nadingun hih leitung vai kinin nei uh hi.

35Hih bangin kong gen ciangin noteʼ haksat nading deihna hi loin noteʼ hoih nading ka deihna ahi hi. Note a kilawm a kituakin gamta-in, lungsim le thatang siit nei loin Topaʼ na na sep theih nading uh ka hong deihsakna ahi hi.

36Teen pih dingin lawm dong khin napi-in kiteen nawn loh ding a ngaihsunteʼ thu panin: Teen pih kei leng a numei tungah a thuman lo hi ding cihna ahi a, zi a deihna lungsim a lian lua ahi a, teenpih ding mah hoih hi, ci-in ngaihsutna ahi zongin a neih leh a lungkimna bangun gamta-in teenpih uh hen. Tua thu ah bangmah khialhna om lo hi.

37Ahi zongin kuama sawl hi loin zi nei lo dingin a lungsimah khauh takin khensatin, a lungsim ki-uk zo taktakin a ngaihsut sa ahih nakleh a neih loh hangin phamawh lo hi.

38Tua ahih manin a neite zong hoih a, a nei loin a kikem zote hoih zaw lai hi.

39Pasal a nei numei pen a pasal a nuntak lai teng suakta lo hi. A pasal a sih leh a deih peuhpeuh tawh kiteeng thei dinga, ahi zongin thu um mi bek teenpih ding hi.

40Ahi zongin keima ngaihsutna ah pasal a neih se sangin tua ci om leh lungdam zaw dingin ka um a, Pasianʼ Kha Siangthoʼ ngaihsutna mah zong hi-in ka um hi.

← Chapter 6 Jump to: Chapter 8 →