1 Timothy 4

Chin TBR17 (Tedim Bible Revision 2017)

← Chapter 3 Jump to: Chapter 5 →

1Nidang ciangin a upna panun mi pawl khat pialin, zuau thu gente le dawi thu a kigente a zuih nading uh Kha Siangtho in teltakin a gen hi.

2Tua bang zuau thuhilhnate pen zuau genin mi a khem, sik em sa tawh tat gawp bangin a lungsim un a hoih le a hoih lo a khen thei nawn loteʼ kam panin hong ging khia ding hi.

3Tua bang mite in zi neih le pasal neih ding le an pawl khat nek ding hoih lo hi, ci uh hi. Ahi zongin thu umin, thuman thutak a thei mite in lungdamna ko-in a nek dingin Pasian in tua ante a bawl ahi hi.

4Pasianʼ bawl sa na khempeuh a hoih hi a, nial loin, lungdamna pulakin san ding ahi hi.

5Pasianʼ thu le thungetna hang tawh tuate a hoih a suak ahi hi.

6Nang in na zuih sa upna thu le thuhilhna man na zuih kawmin hih ka hong thugente, i sanggamte kiangah na gen nakleh Khris Jesuʼ nasem a hoih khat na hi ding hi.

7Pasianʼ thu tawh a kituak lo, a haihuai tangthu phuahtawmte ngaihsutin na nei vet kei in. Pasianʼ deihna tawh a kituakin na nuntak zawh nadingin na kisin in.

8Pumpi kisekin kisinna manpha hi. Ahi zongin kha thu ah kisekin kisinna pen tu hun laitak le a hong tung ding hunah nuntakna hong pia thei ahih manin manpha zaw lai hi,

9ci-a kigen pen a man taktak thu hi a, umin sin dingin a kilawm thu ahi hi.

10A diakdiakin ei thu umte in mi khempeuh a Hon khia, a nungta Pasian muangin lamen ihih manin nakpi takin hanciamin na a sem ihi hi.

11Ka hong gen sa thute na hilh sawn in.

12Khangno lai na hihna thu hangin miteʼ simmawh dingin na om kei inla, kampauna, gamtatna, itna, upna le sianthona ah thu um miteʼ etteh dingin na om in.

13Kei ka hong pai matengin mipi mai ah Lai Siangtho simna, a khiatna genna le hanthotnate ah tavuan na la in.

14Kamsangteʼ thugennate le upate in na tungah a khut uh nga-in thu hong ngetsakna ahi nangma hih theih siamnate na valkhongsak kei in.

15Mi khempeuh in na khantohna hong muh theih nadingin hih thute limtakin ngaihsun inla, hahkatin na sem in.

16Na gamtatna le na thuhilhnate ah hoihtakin kidawmin om lecin nangmah a kipan na thugen a za mite adingin phattuamna om ding ahih manin na nasepna ah hoihtakin om in.

← Chapter 3 Jump to: Chapter 5 →