1 Timothy 6

Chin TBR17 (Tedim Bible Revision 2017)

← Chapter 5 Jump to:

1Kuamah in Pasianʼ min le i thuhilhnate hong gensiatsak loh nadingin sila khempeuh in a tote uh zahtak bawl ta uh hen.

2Thu um mi to-in a nei silate in upna sungah sanggam khat hi hang, ci-in ngaihsutna tawh a tote uh zahtak bawl loin om kha kei uh hen. Amauteʼ nasepna hangin hamphatna a ngah mite pen thu um mi le a it uh mite ahih manin a hoih zaw-in a sepsak ding uh a kilawm zaw ahi hi. Tu-a kong gen ding thute mi khempeuh tungah hilhin gen in.

3Topa Jesu Khris thu tawh a kituak lo, i biakna paizia tawh a kilehngatin thu tuamdang a hilh mite pen,

4a kiphasak mawkmawk hi uh a, bangmah a thei het lo ahi uh hi. Tua bang mite in thu kiseel thu kinial cihte ut belin nei uh a, hazatna, lungsim kituah lohna, kizahkona, a sia lamin ki-upmawhnate piangsak uh a,

5thuman thutak zui loin, a lungsim paizia uh a man nawn lo, biakna pen hauh theih nading lampi bekin a ngaihsun mite in a tawntungin kitot kiseelna a piangsak uh ahi hi.

6Pasian biakna hangin a neihsa teng tawh a lungkim mite pen biakna in mihau a suaksak takpi mah ahi hi.

7A taktakin ci lehang, leitungah mihingin i suah laitakin sumlepai tawh i suak kei a, i sih ciangin zong leitung panin bangmah i keng thei tuan kei hi.

8Tua ahih manin an nek tui dawn, nikten puansilh i neih nakleh a pha zo ahi hi.

9Ahi zongin a hau nuam mite in ze-etna a tuamtuam thuak a, duhhopna, huaihamna a haivai thute ah awkcipin, haksatna le siatna a tuah lawh uh hi.

10Sum deih luatna in siatna namkim piangsak hi. Mi pawl khat in sum deih lua liang uh ahih manin a upna panun pial khia-in gimna lungkhamna tampi a thuak lawh uh hi.

11Ahi zongin Pasianʼ mi ahi nangmah in tua thute khempeuh pelh inla, thuman thutak, Pasianʼ deih bangin nuntakna, upna, itna, kipna le lungnemna na neih zawh nadingin hanciam in.

12Upna thu ah hoihtakin nawk suak inla, mi tampiʼ zakin na pulak sa, Pasian in nangmah a hong piak nuntak tawntungna lenkip in.

13Na khempeuh tungah nuntakna a pia Pasian le Pontias Pilat mai ah hang takin thu a gen ngam Khris Jesuʼ mai ah nang ka hong thupiakna in:

14I Topa Jesu hong kilatkik Ni dongin paubaanna le mawhsakna om het loin nang hong kipia thute na zui in.

15Kumpiteʼ Kumpi, topateʼ Topa, thupha ngahin amah bek a lian pen ahi Pasian in hun a sak khatpeuh ciangin Jesu hong kilangsakkik ding hi.

16Tua i Pasian bek mah a si thei lo hi a, khuavak pha mahmah sungah om ahih manin kuamah in a kiang neh thei lo hi. Kuamah in amah mu ngei lo a, zong mu thei lo hi. A tawntungin amah kipahtawi henla, vanglian tawntung tahen. Amen.

17Tu hun a a hau mite kisathei kha loin, a kip lo hauhnate muan le suanin nei kha loin, eite in nuam takin i zat theih dingin citna tawh a hong pia Pasian a muan a suan nadingun na hilh in.

18A hoih nate semin, gamtat pha-in, citna lungsim nei-in midangte a hopnop nadingun na hilh in.

19Tua hileh mai lamah amauteʼ nuntak nading bulpi taktak ahi neihsate, amau adingin a khol mite ahi ding uh hi.

20Timoti aw, nang tungah a hong kipia thute hoihtakin na zui in. Mi pawl khatte in, “Thu theihna,” ci-in a ngaihsut khak uh, Pasianʼ thu tawh a kituak lo, thu kihai selnate na pelh in.

21Mi pawl khatte in tua bang pilna a nei-in kingaihsun uh a, upna thu bulpi khahsuahna-in a nei uh hi. Note khempeuh tungah Pasianʼ dikna thupha hong tung tahen.

← Chapter 5 Jump to: