2 Samuel 4

Chin TBR17 (Tedim Bible Revision 2017)

← Chapter 3 Jump to: Chapter 5 →

1Saulʼ tapa Ishbosheth in Hebron ah Abner a sihna thu a zak ciangin a tha kiam a, Israel-te khempeuh lungkia hi.

2Saulʼ tapa in galsim pawlte a makai mi nih nei hi. Khat paʼ min Baanah hi-in, a dang khat paʼ min Rekhab hi a, Beeroth khua pan Benjamin mi Rimmonʼ tapate ahi uh hi. (Bang hang hiam cih leh Beeroth zong Benjamin aʼ in kisim hi.

3Beeroth mite Gittaim ah tai uh a, tu ni dongin tua lai ah peemta-in om uh hi.)

4Saulʼ tapa Jonathan in a khe zaw tapa khat nei hi. Jezreel panin Saul le Jonathanʼ thu hong tunin amah kum nga pha hi. Amah a cingnu in amah la-in taipih a, tua nu a nawh taina lamin naupang kia-in a khe zaw hi. Ama min Mefibosheth ahi hi.

5Tu-in Beeroth mi Rimmonʼ tapate Rekhab le Baanah ding khia uh a, sun nisat hun pawlin Ishboshethʼ inn ah a sun tawlngak laitakin hong tung uh hi.

6Inn kongcing nu mangbuh a su khin hi a, a lusuk suakin ihmu hi. Tua ahih ciangin Rekhab le a sanggampa Baanah simlut uh hi.

7Amaute inn sungah a tun uh ciangin a lupna dei sunga lupna tungah Ishbosheth lumin a om laitakin amaute in amah satin that uh a, a lu tan uh hi. Amaute in ama lu la-in Arabah lam tawnin zan tawntung pai uh a,

8Ishboshethʼ lutang Hebron-a Davidʼ kiang tunpih uh hi. Amaute in kumpipa kiangah, “Hih lai ah, thah dingin nang a hong zong, na gal Saulʼ tapa Ishboshethʼ lutang om hi. Topa in tu ni-in Saul le a suanlekhakte tungah koteʼ to kumpipa adingin hong thuksak hi,” a ci uh hi.

9Ahih hangin David in Beeroth mi Rimmonʼ tapate Rekhab le a sanggampa Baanah dawngin, “Haksatna khempeuh panin ka nuntakna hong hon khia Topa a nungta ahih mah bangin,

10mi khat in kei kiangah, ‘En in, Saul si hi,’ ci-in hong gen ciangin, amah thuhoih puakin kingaihsun a, ama thu puak thaman ka piakna-in amah manin Ziklag ah ka that hi.

11Migilote in a thuman mi khat ama inn sung a lupna tungah a thah ciangin noteʼ tungah ama phu hong la-in, leitung panin note hong susia zaw kan ding hi lo ahi hiam?” a ci hi.

12Tua ciangin David in a tangvalte thu pia a, tangvalte in amaute thatin a khut le a khete sattan uh a, Hebron-a bual gei ah amaute khai uh hi. Ahih hangin amaute in Ishboshethʼ lutang la-in Hebron-a Abnerʼ hanah a vui uh hi.

← Chapter 3 Jump to: Chapter 5 →