2 Thessalonians 1

Chin TBR17 (Tedim Bible Revision 2017)

Jump to: Chapter 2 →

1Keimah Paul le Silas le Timoti te in: Pasian le Topa Jesu Khris sungah a om, Thesalonika khua-a om pawlpi mite tungah lai ka hong khak uh hi.

2Pa Pasian le Topa Jesu Khris in note tungah dikna le nopsakna thupha hong tungsak tahen.

3Sanggamte aw, noteʼ upna nakpi takin khang a, note khatlekhat na ki-itna uh lian semsem ahih manin Pasian tungah lungdamna koh ding a kilawm ahih mah bangin, note hangin ama tungah lungdamna ka ko tawntung uh hi.

4Bawlsiatna le gimna na thuakna khempeuh uh ah na upna uh khahsuah loin thuak zo paisuak na hih manun midangte kiangah Pasianʼ pawlpi ka na kisialh pih uh hi.

5Tu-a na thuaknate uh hangin Pasianʼ Ukna sungah a om dingin a kilawm mi suak na hih manun Pasianʼ thukhenna a man ahihna hong kilangsak hi.

6Pasian in a manin na sem ding ahih manin note a hong gimsak mite tungah Pasian in gimna pia dinga,

7tu-a gimna a thuak note le kote tungah zong nopsakna hong pia ding hi. Vantung panin Topa Jesu le a vanglian a vantung mite, meikuang tawh hong kilat ciangin,

8Pasian a thei lo mite le i Topa Jesu tawh kisai Lungdamna Thu a um lo mite tungah gimna a tungsak ding hi.

9Ama mite khempeuh le thu um mite khempeuh hangin minthanna le pahtawina a ngah dingin Topa hong pai Ni ciangin a noptuak mahmah Topaʼ minthanna huam sung panin amaute kihawl khia dinga, tawntung suksiatna dan a thuak ding uh hi. Ahi zongin note in kong gen uh thute um na hih manun tua nopna sungah na om ding uh hi.

11Tua ahih manin ama hong sapna tawh a kilawm a kituak nuntakna na nuntak theih nading uh le ama vangliatna tawh a hoih na hih nop khempeuh uh hih zo-in, na upna uh hangin na khempeuh na zawh theih nadingun Pasian kiangah thu ka hong ngetsak tawntung uh hi.

12Tua hileh, eiteʼ Pa Pasian le Topa Jesu Khris hong hehpihna hangin note in ama tung panin minthanna ngahin, ama min zong a thangsak na hi ding uh hi.

Jump to: Chapter 2 →