Esther 1

Chin TBR17 (Tedim Bible Revision 2017)

Jump to: Chapter 2 →

1Hih lai-a kigelh thupiangte pen India gam panin Ethiopia gam dong, gamneu za khat sawm nih le sagih a uk Ahasuerasʼ hun lai-a piang thu ahi hi.

2Hih hun laitakin kumpi khua ahi Susa khuapi sunga kumpi tokhom tungah amah tu hi.

3Ama uk a kum thumna kumin ama nuai-a a uliante khempeuh le a nasemte adingin pawi khat bawlsak hi. Ama khutnuai-a om Persia le Media galkap maangte le ama nuai-a uliante le ama nuai ah gam a uksawnte a om laitakin,

4a kumpi gam hauhna le ama thupi ziazuana ni tampi sung, ni za le ni sawm giat sung tak a lak hi.

5Hih pawi hun a bei khit ciangin kumpi khua Susa khuapi sunga om mi lian mi neu mi khempeuh adingin kumpipa in pawi khat a bawl hi. Tua pawi pen kumpi inn huang sungah kibawl a, ni sagih sung kibawl hi.

6Tua huang sungah suangkang khuamte kiphut a, khau malneu le khau dupsan tawh ngun kualte ah kikhihin a kikhai dalna puan pakte kikhungin, suangmanpha a san, a dum, a kang le a vom, a nam tuamtuamte kizangin a kizem suangphah kiphah tungah kham le ngun kibawl lupnate kikoih hi.

7Kham hai nam tuamtuamte tawh zu kihawm a, kumpipaʼ hauhna tawh kituakin deihdeihin zu kizang hi.

8Tua lai ah zunekna zia pen kihah piak cih om lo hi; bang hang hiam cih leh mi khempeuh in amauʼ duh zahzah bek a neksakna ding uh kumpipa in a nuai-a a uliante thu pia hi.

9Tua banah Kumpinu Vashti in zong numeite adingin Kumpipa Ahasuerasʼ inn sung mahah pawi khat a bawl hi.

10A ni sagih ni, zunekna hangin a lung a nop ciangin kumpipa in ama na a sem innsung maang sagihte Mehuman, Biztha, Harbona, Bigtha, Abagtha, Zethar le Karkas-te sam a, mite le uliante mai ah Kumpinu Vashti a melhoihna a lah theih nadingin a kumpi lukhu khusa-in ama kiangah a paipih nadingun a sawl hi; bang hang hiam cih leh tua nu a mel a hoih takpi mah ahi hi.

12Ahih hangin Kumpinu Vashti in innsung maangteʼ thupuak kumpipaʼ sapna a nial hi. Hih a nialna thu ah kumpipa heh mahmah a, a hehna hangin a sin so hi.

13Tua ciangin kumpipa in upadi siam a mipilte thu dong hi. Bang hang hiam cih leh upadi le biakna lam thu theite khempeuh thu dot pen kumpipaʼ zat ngei khat ahi hi.

14Ama gei nai pen ah a tu mite pen Persia le Media gam ulian sagihte ahi Karshena, Shethar, Admatha, Tarshish, Meres, Marsena le Memukan-te hi uh a, kumpipa kiangah a hawh thei, kumpi gam sungah ulian pente ahi uh hi.

15“Inn sung mangteʼ tungtawnin keimah kumpi Ahasuerasʼ thupiakna bangin Kumpinu Vashti gamta lo ahih manin Kumpinu Vashti tungah upadi tawh kizui-in bangci kihih ding ahi hiam?” a ci hi.

16Tua ciangin kumpipa le ulianteʼ zakin Memukan in dawng a, “Kumpinu Vashti khial hi; kumpipa tung bek hi loin Kumpipa Ahasuerasʼ ukna gam sung khempeuh a om uliante le mi khempeuh tungah zong a khial ahi hi.

17Kumpinuʼ gamtatna thu numei dangte khempeuh in thei ding uh a, hih thu hangin numeite in a pasalte uh simmawh ding uh a, amaute in, ‘Kumpipa Ahasueras in ama kiangah a pai dingin Kumpinu Vashti thu pia napi-in pai lo hi,’ ci ding uh hi.

18Hih banga kumpinuʼ gamtatna thu a za Persia le Media gam numei liante in kumpipa nuai-a uliante tungah tu ni mahmah in hih thu gen ding uh a, kisimmawhna le kizahtak lohna tampi piangsak ding hi.

19Kumpipa in hoih na sak leh, kumpi thupiakna khat paisak inla, Kumpipa Ahasuerasʼ mai ah Vashti a kilakkik nawn loh nadingin a kikhelkik ngei nawn lo ding Persia mite le Media miteʼ upadi sungah gelhsak in. Tua ciangin amah sangin a kilawm zaw numei khat ama za luahsak in.

20Tua banga kumpipaʼ thupiakna thu kumpi gam sung khempeuh ah a kizak ciangin numei khempeuh in a neu a lian amauʼ pasal ciat zahtak ding uh hi,” a ci hi.

21Kumpipa le uliante in hih ngaihsutna hoih sa uh a, Memukanʼ gen bangin kumpipa a gamta hi.

22Pasal khempeuh pen ama inn sung ukpa ahih nading le ama kampau a kizuih kim nadingin kumpipaʼ ukna gam khempeuh ah amauʼ lai ciat le mi khempeuh tungah amauʼ pau ciatin laikhakte kigelh hi.

Jump to: Chapter 2 →