Esther 2

Chin TBR17 (Tedim Bible Revision 2017)

← Chapter 1 Jump to: Chapter 3 →

1Hih thu teng a pian khit, Kumpipa Ahasuerasʼ hehna a dam ciangin, amah in Vashti phawkin, Vashtiʼ gamtatna le amah tawh kisai-in a thupiakna zong thei hi.

2Tua ahih ciangin kumpipaʼ nasemte in ama kiangah, “Kumpipa adingin a melhoih nungak khangnote zongsak in.

3Kumpi khua ahi Susa khuapi a numeiteʼ omna ah a melhoih nungak khangno khempeuh hong paipih nadingun na ukna gam tuamtuam khempeuh ah uliante sawl in. Tua numeite pen numeite a uk, kumpipaʼ innsung maang Hegaiʼ kep dingin ki-ap hen. Tua ciangin tua numeite tungah paknamtui tuamtuam kiguan hen.

4Tua sung panin kumpipaʼ deih bel nungak pen Vashtiʼ tangin kumpinu suak hen,” a ci uh hi. Kumpipa in hih ngaihsutna hoih sa a, tua bangin a gamta hi.

5Tu-in kumpi khua Susa khuapi sungah Benjamin minam Kish, a tapa Shimei, a tapa Jair, a tapa Mordekai a kici Jew mi khat om hi.

6Amah pen, Babylon kumpipa Nebukhadnezzar in Jerusalem panin Judah kumpipa Jekoniah tawh a lak galmatte lak a kihel khat ahi hi.

7Amah in a innlak pate khatʼ tanu, a min masa Hadassah, a nung ciangin Esther a kici, a khoi hi; bang hang hiam cih leh a nu le a pa om nawn lo hi. Tua numei melhoihin a ngaihbaang mahmah khat hi a, a nu le a pa a sih ciangin Mordekai in ama tanu dingin a lak ahi hi.

8Kumpipaʼ thupiakna kithei kimin, Hegaiʼ kep dingin ap dingin kumpi khua Susa khuapi ah numei tampi hong kipaipih ciangin, numeite a uk Hegaiʼ tungah ap dingin kumpipaʼ inn ah Esther zong kipaipih hi.

9Amah in tua nungak hoih sa-in pakta mahmah ahih manin paknamtuite le a annek ding pia pah a, kumpipaʼ inn sung panin a kiteel nasem numei sagih zong guan a, amah le a nasem numeiteʼ tungah numeiteʼ omna a hoih pen mun a pia pah hi.

10Mordekai in kham ahih manin Esther in ama namlephung gen khia lo hi.

11Esther bangci om a, ama tungah bang piang hiam cih a theih nadingin numeiteʼ omna inntual mai ah nisimin Mordekai va pai zel hi.

12Numeite a kigin hun a vekpi-in kha sawm le nih sung hi a, sathau le myrrh paknamtui tawh kha guk sung kipuahin, paknamtui tuamtuamte le kipuahna dangte tawh kha guk sung mah kipuah uh hi.

13Kigin kholhna hun cing a, Kumpipa Ahasuerasʼ kiangah numeite a pai ciangin numeiteʼ omna panin kumpipaʼ inn ah a deih peuhpeuh uh kikengsak hi.

14Nitakin kumpipa kiangah va pai a, a zingsang ciangin numeiteʼ omna a mun dang khat ah kiciahsak a, kumpipaʼ zineute a uk, kumpipaʼ innsung maang Shaashgaz in kem hi. Kumpipa in a deihkik kei leh kumpipa kiangah paikik nawn lo a, kumpipa in a deih leh a minin kisamkik hi.

15Mordekai in ama tanu dingin a lak a innlak pa Abihailʼ tanu Esther pen kumpipa kiangah a pai ding hun a tun ciangin, numeite a uk kumpipaʼ inn sung mangpa Hegaiʼ gen teng lobuang kizepna ding puan dang bangmah ngen thuah lo hi. Tu-in Esther a mu mi peuhmah in hoih sa kim uh hi.

16Ama uk a kum sagihna, kha sawmna ahi Tebeth kha sungin kumpi inn sung Kumpi Ahasuerasʼ kiangah Esther a kipaipih ciangin,

17kumpipa in ama numei dangte khempeuh sangin it zaw a, a nungak dangte khempeuh sangin limbawl zaw hi. Tua hi a, kumpi lukhu amah khusakin Vashtiʼ tangin kumpinu a suaksak hi.

18Tua ciangin kumpipa in Esther pahtawina-in ama uliante le a nasem khempeuh adingin pawi lianpi khat a bawl hi. Amah in ama ukna gam khempeuh ah tua ni nasep khawlin zum a khak nading uh zong thu zasak kim a, kumpipa min tawh a kilawm a kituak letsongte zong a hawm khia hi.

19Tua hun sungin Mordekai in kumpi nasep a ngah hi.

20Ama hilhna tawh kizui-in Esther in ama minam ahi a, a innkuan ahi zongin pulak lo hi. Mordekaiʼ kep sungin ama thu a man mah bangin tu-in zong Mordekaiʼ gen bangin gamta hi.

21Ni khat, kumpi nasemin Mordekai a om hun sungin kongcing ahi kumpipaʼ innsung maangte Bigthana le Teresh heh uh a, Kumpipa Ahasueras thah ding a sawm uh hi.

22Hih thu Mordekai in phawkin Kumpinu Esther kiangah ko a, Esther in Mordekaiʼ hong thupuak, ci-in kumpipa kiangah a gen sawn hi.

23A thu kikanin a manna a kitheih ciangin khuampite tungah tua mi nih tegel kikhailum hi. Hih thupiangte khempeuh kumpipaʼ theihin Kumpi Gam Tangthu Laibu sungah kiciamteh hi.

← Chapter 1 Jump to: Chapter 3 →