Judges 18

Chin TBR17 (Tedim Bible Revision 2017)

← Chapter 17 Jump to: Chapter 19 →

1Tua hun lai-in Israel-te sungah kumpi om lo hi. Tua hun lai-in Dan minamte in a ten nading uh leitang zong uh hi. Bang hang hiam cih leh tua hun dong mateng Israel minamte sung panin amau ading gamhluah bangmah kia lo hi.

2Tua ahih ciangin Dan mite in gam ensimin a va zong dingin amauʼ minam bup khempeuh lak panin misiam nga Zorah le Eshtaol panin a sawl uh hi. Amaute in tua mite kiangah, “Pai unla gam va zong un,” a ci uh hi. Amaute Efraim mual tung gam, Mikahʼ inn ah hong tung uh a, tua lai ah a taam uh hi.

3Amaute Mikahʼ inn ah a om uh ciangin Levi mi tangvalʼ aw khat khen thei uh hi. Amaute kihei-in ama kiangah, “Kua in hih lai ah nang hong paipih ahi hiam? Hih lai munah bang hih na hi hiam? Hih lai ah na nasep bang ahi hiam?” a ci uh hi.

4Amah in amaute kiangah, “Tua bang tua bangin Mikah in kei hong bawl hi. Amah in kei hong cialin kei pen ama siampi ka suak hi,” a ci hi.

5Tua ciangin amaute in ama kiangah, “Koteʼ kuan khiat khualzinna a tangtung ding hiam cih ka theih nadingun Pasian hong dotsak in, kong thum uh hi,” a ci uh hi.

6Tua ciangin siampipa in amaute kiangah, “Lung nuamin pai un. Noteʼ khualzinna thu ah Topa in hong panpih hi,” a ci hi.

7Tua ciangin mi ngate pai khia-in Laish tung uh a, tua lai-a om mite, Sidon miteʼ om bang danin daitakin omin bangmah a upmawh lohna, leitungah bangmah kisam loin a hauhna le amaute Sidon-teʼ kiang panin gamla omin kuamah tawh kizopna a neih lohna, lungmuang takin a teenna uh a mu uh hi.

8Amaute Zorah le Eshtaol-a a sanggamte uh kiangah hong tunkik uh ciangin, a sanggamte un amaute kiangah, “Bang thu gen ding nong nei uh hiam?” a ci uh hi.

9Amaute in, “Ding un, amaute a sim dingin pai to ni. Bang hang hiam cih leh a leitang ka mu khin uh a, a leihoih mahmah hi. Bangmah hih loin om mawk ding na hi uh hiam? Pai ding zekai kei un; lutin leitang va luah ni.

10Na pai uh ciangin bangmah a ummawh lo mite kiang na tung ding uh hi. Leitang zai mahmah hi. Pasian in na khut sung uh ah leitungah bangmah a kisap lohna mun hong pia khinzo takpi hi,” a ci uh hi.

11Tua ciangin Dan minamte galhiam a tawi mihing za guk Zorah le Eshtaol panin kuan khia uh a,

12amaute pai to-in Judah gam sung Kiriath-jearim ah giahphual sat uh hi. Hih thu hangin tu hun dongin tua mun pen Mahanehdan kici hi. Tua pen Kiriath-jearim nitumna lamah om hi.

13Amaute tua lai mun panin Efraim mual tung gamah pai suakin Mikahʼ inn ah a tung uh hi.

14Tua ciangin Laish gam a ensim dingin a pai mi ngate in a sanggamte uh kiangah, “Hih innte khat sungah siampi puan khat, inn sung pasian-te, a kiseek milim khat le a kisung milim khat a om lam thei lo na hi uh hiam? Tua ahih ciangin tu-in na hih ding uh ngaihsun un,” a ci uh hi.

15Tua ciangin amaute kihei-in Mikahʼ inn-a Levi tangvalpaʼ omna ah tung uh a, ama om zia dong uh hi.

16Tua hunsung tengin galhiam a tawi Dan mi za gukte kulh kongpi lutna ah ding uh hi.

17Tua ciangin, galhiam a tawi mi za gukte tawh kulh kongpi lutna ah siampipa a din khop laitakin gam ensim dingin a kuan khia mi ngate tumin a kiseek milim, a siampi puan, a inn sung pasian-te le a kisung milim la uh hi.

18Hih mite Mikahʼ inn sungah tumin a kiseek milim, a siampi puan, a inn sung pasian-te le a kisung milim a lak uh ciangin siampipa in amaute kiangah, “Bang hih na hi uh hiam?” a ci hi.

19Amaute in ama kiangah, “Pau kei in; na khutin na kam hum inla, kote tawh hong pai-in kote adingin pa le siampi hong hi in. Nang adingin mi khatʼ inn sungah siampi hih ding hoih zaw ahi hiam, tua ahih kei leh Israel-teʼ sungah minam le beh siampi hih ding hoih zaw ahi hiam?” a ci uh hi.

20Tua ciangin siampipa a lungkim hi. Amah in a siampi puan, a inn sung pasian-te le a kiseek milim la-in miteʼ lakah a pai hi.

21Tua ahih ciangin amauteʼ mai ah a taneute le a ganhingte le a vante uh omsakin, amaute paikhia uh hi.

22Amaute Mikahʼ inn panin a gamla khop khat a tun uh ciangin Mikahʼ inn veeng a om mite kikaikhawm uh a, Dan mite delhin a pha uh hi.

23Amaute in Dan mite a ot san uh ciangin Dan mite hong kihei-in Mikah kiangah, “Hih bang mihon tawh nong delh nading bang thu om ahi hiam?” a ci uh hi.

24Amah in, “Note in keima bawl sa ka pasian-te le ka siampipa la-in na paikhia uh hi. Keimah in bang nei nawn ka hi hiam? Tua ahih ciangin, ‘Bang thu ahi hiam?’ bang hangin hong ci thei na hi uh hiam?” a ci hi.

25Dan mite in ama kiangah, “Koteʼ lakah na aw hong kizasak kei in; tua hikeileh ka lawmte uh hehin nang hong hih ding uh a, na innkuanpihte tawh na si kha ding uh hi,” a ci uh hi.

26Tua ciangin Dan mite pai uh hi. Mikah in ama adingin amaute thahat lua hi, ci-in a muh ciangin amah kihei-in a inn ah a ciahkik hi.

27Dan mite in Mikahʼ bawl sate le a siampipa paipihin, gamdai-in a om, bangmah a ummawh lo miteʼ omna Laish tung uh a, namsau tawh amaute vatin mei tawh a khuapi a hal uh hi.

28Amaute pen Sidon panin gamla uh ahih manin a hon khia ding om lo a, amaute in kuamah tawh kizopna nei lo uh hi. Tua mun pen Beth-rehob miteʼ neihsa kuam sungah om hi. Amaute in khuapi lamkikin a sungah teeng uh hi.

29Amaute in tua khuapi min pen Israelʼ suan amauʼ pianna Dan tamin Dan a phuak uh hi. Ahih hangin a masa-in tua khuapi min pen Laish ahi hi.

30Tua ciangin Dan mite in a kiseek milim amau adingin phut uh a, Mosesʼ tupa, Gershomʼ tapa Jonathan le ama tapate pen tua gam a kilak hun dong Dan minamte adingin siampi ahi uh hi.

31Tua ahih ciangin Shiloh ah Pasianʼ biakbuk a om sungteng Mikahʼ bawl sa a kiseek milim tua lai ah a om hi.

← Chapter 17 Jump to: Chapter 19 →