1 Corinthians 12

Dagbani Bible (Naawuni Kundi Kasi)

← Chapter 11 Jump to: Chapter 13 →

1M mabihi, pumpɔŋɔ zaŋ chaŋ Naawuni Shia Kasi pina yɛla polo, m bi bɔri ni yi be ʒilinsi ni.

2Yi mi ni yi ni daa nyɛ chɛfirinim’ saha shɛl’ la, buɣa din ku tooi tɔɣisi yɛtɔɣa n-daa sun ya ka birigi ya.

3Dinzuɣu m bɔri ni yi baŋ ni ninvuɣ’ so ŋun tɔɣisiri yɛtɔɣa Naawuni Shia Kasi yiko ni na ʒi n-yɛli noli ti Yisa, ka so mi ku tooi yɛli ni Yisa nyɛla o Duuma, ka pa ni Shia Kasi yiko ni.

4Shia Kasi yino m-beni, amaa ka o pina lee nyɛ balibubalibu.

5Duuma yino m-beni, amaa ka o tuma soya lee nyɛ balibubalibu.

6Tuma maa nyɛla balibubalibu, amaa kulla Naawuni yino maa n-chɛ ka di zaa tumdi sokam zaa ni.

7Ka sokam deeri Naawuni Shia Kasi ni tiri pin’ shɛŋa maa niriba zaa sɔŋsim nyabu zuɣu.

8Naawuni Shia Kasi tiri so yiko ka o tɔɣisiri yɛm yɛtɔɣa, ka chɛ ka so mi tɔɣisiri baŋsim yɛtɔɣa Shi’ yino maa yiko ni.

9Shi’ yino maa n-lan tiri so yɛda niŋbu pini, ka tiri so dɔriti tibbu pina;

10ka tiri so alahiziba tumtumsa tumbu yiko; ka tiri so anabitali yɛtɔɣa tɔɣisibu pini; ka tiri so yiko ka o baŋdi shihi tuma yɛla; ka tiri so tinzun yɛligu balibu kam yɛtɔɣa tɔɣisibu yiko; ka tiri so mi tinzun yɛligu balibu kam yɛtɔɣa gbinni baŋbu yiko.

11Amaa Naawuni Shia Kasi yino maa n-tiri yiko din tumdi dimbɔŋɔnim’ zaa, ka nyɛ ŋun tiri sokam yinoyino kaman o ni yu ni o ti o pin’ shɛli.

12Dama kaman niŋgbuŋ ni nyɛ zaɣ’ yini ka mali yaɣ’ bɔbili, ka di yaɣ’ bɔbili maa zaa nyɛ niŋgbun yin’ la, lala mi n-nyɛ Masia gba.

13Naawuni Shi’ yino maa zuɣu ka ti zaa deei baptaizibu niŋgbun yini maa ni, di yi nyɛla Yɛhudianim’ bee bɛn pa Yɛhudianima ka di yi nyɛla daba bee bilichinnima, Shi’ yino maa ka ti zaa daa laɣim deei.

14Niŋgbuŋ pala yaɣ’ yini ko, amaa di nyɛla yaɣ’ bɔbili.

15Ka napɔŋ yi yɛli ni di pala nuu, dinzuɣu ni di ka niŋgbuŋ ni; lala zuɣu ku chɛ ka di shiri pa niŋgbuŋ maa yaɣ’ shɛli.

16Ka tibili yi yɛli ni di pala nini, dinzuɣu ni di ka niŋgbuŋ ni, lala zuɣu ku chɛ ka di shiri pa niŋgbuŋ maa yaɣ’ shɛli.

17Ka niŋgbuŋ zaa yi di nyɛla nini, wula ka di di yɛn niŋ wum? Ka niŋgbuŋ zaa yi di nyɛla tibili, wula ka di di yɛn wum nyom?

18Amaa Naawuni pun zaŋ niŋgbuŋ yaɣ’ bɔbili maa zaa n-niŋ niŋgbun yini kaman o ni yu shɛm.

19Ka di zaa ha yi di nyɛla yaɣ’ yini, ya ka niŋgbuŋ naan be?

20Di nyɛla yaɣ’ kɔŋkɔba, amaa ka nyɛ niŋgbun yini.

21Nini ku tooi yɛli nuu, “A ka ma buchi;” ka zuɣu mi ku tooi yɛli napɔŋ, “A ka ma buchi.”

22Amaa di lee nyɛla ŋ-ŋɔ: Niŋgbuŋ yaɣ’ shɛŋa din ŋmani bin’ chɔɣima la nyɛla din ku tooi kɔŋ niŋgbuŋ ni;

23ka niŋgbuŋ yaɣ’ shɛŋa ti ni tɛhiri ni di buchi bi yaɣ’ lala la nyɛla ti ni lihiri shɛŋa viɛnyɛliŋga; ka ti niŋgbuŋ yaɣ’ shɛŋa din bi viɛl’ la, dina ka ti lee niŋdi din tu kamaata shɛli

24ti niŋgbuŋ yaɣ’ shɛŋa din viɛl’ la ni bi bɔra. Amaa Naawuni zaŋ niŋgbuŋ tuɣi taba, ka pahiri yaɣ’ shɛŋa din pooi viɛlim la jilima pam

25ni di chɛ ka niŋgbuŋ yaɣa maa zaa ku gaŋdi taba, amaa ka di baɣa lee ni bela tab’ ni.

26Ka yaɣ’ yini yi biɛra, yaɣa maa zaa biɛrimi; ka yaɣ’ yini yi nya jilima, yaɣa maa zaa malila suhupiɛlli.

27Pumpɔŋɔ yi nyɛla Masia niŋgbuŋ, ka yi zaa yinoyino nyɛ o niŋgbuŋ maa yaɣ’ shɛŋa.

28Naawuni ni zali ninvuɣ’ shɛb’ cheechi ni nyɛla bɛmbɔŋɔ: Tuuli, o zali shɛba ka bɛ nyɛla tuumba; bɛn pah’ ayi, anabinima; bɛn pah’ ata, karimbanima; bɛn paya, alahiziba tumtumsa tumdiba; ka bɛn doli bɛ nyaaŋa nyɛla dɔriti tibiriba mini sɔŋdiba ni toondaannima ni bɛn tɔɣisiri tinzun yɛligu balibu kam Naawuni Shia Kasi yiko ni.

29Bɛ zaa n-nyɛ tuumba? Bɛ zaa n-nyɛ anabinima? Bɛ zaa n-nyɛ karimbanima? Bɛ zaa n-tumd’ alahiziba tumtumsa?

30Bɛ zaa m-mali dɔriti tibbu pina? Bɛ zaa n-tɔɣisiri tinzun yɛligu balibu kam yɛtɔɣa Naawuni Shia Kasi yiko ni? Bɛ zaa n-kahigiri tinzun yɛligu balibu kam yɛtɔɣa gbinni wuhira?

31Bomiya Naawuni Shia Kasi pina din so maa viɛnyɛliŋga. Ka n ni lan wuhi ya so’ shɛli din viɛli gari shɛlikam.

← Chapter 11 Jump to: Chapter 13 →